2Մեծ է Տէր եւ օրհնեալ է յոյժ՝ ի քաղաք Աստուծոյ մերոյ, ի լեառն սուրբ նորա։ 3Հաստարմատ ցնծասցէ ցնծութեամբ ամենայն երկիր, լերինք Սիոնի, կողմանք՝՝ հիւսիսոյ, քաղաք Թագաւորի մեծի։ 4Աստուած ի տաճարի իւրում յայտնի, ի ժամանակի որպէս օգնական լինէր նոցա։՝՝ 5Ահաւասիկ թագաւորութիւնք երկրի ժողովեցան, եւ անցին ի միասին։ 6Ինքեանք տեսին այսպէս եւ զարմացան, խռովեցան, սասանեցան։ 7Եւ դողումն կալաւ զնոսա անդ. երկունք որպէս ի ծննդեան։ 8Ի հողմ սաստիկ փշրեսցես զնաւս ի Թարսիս՝՝։ 9Որպէս լուաք՝ սոյնպէս եւ տեսաք, ի քաղաք Տեառն զօրութեանց՝ ի քաղաք Աստուծոյ մերոյ. Աստուած հիմունս արկ նմա յաւիտեան։ 10Ընկալաք, Աստուած, զողորմութիւն քո ի մէջ ժողովրդեան քո։ 11Ըստ անուան քում, Աստուած, սոյնպէս եւ օրհնութիւն քո ընդ ամենայն տիեզերս, եւ արդարութեամբ լի է աջ քո։ 12Ուրախ եղիցի լեառն Սիոն, եւ ցնծասցեն դստերք Յուդայ, վասն իրաւանց քոց, Տէր։

13Շրջեցարուք զՍիովնիւ, պաշարեցէք զնա, եւ պատեցէք զաշտարակս նորա։ 14Դիք զսիրտս ձեր ի վերայ զօրութեանց նորա, բաժանեցէք զամուրս՝՝ նորա, զի պատմել կարասջիք յազգ յայլ։ 15Սա է Աստուած, Աստուած մեր յաւիտեանս յաւիտենից, եւ սա հովուեսցէ զմեզ մինչեւ յաւիտեան։