ՍԱՂՄՈՍ ՂԳ (ՂԴ)

Սաղմոս Դաւթի. չորեքշաբաթու։՝՝

1Աստուած՝ վրէժխնդիր Տէր, Աստուած վրէժխնդիր յայտնեցար։ 2Բարձր լեր որ դատիս զերկիր, հատո զհատուցումն ամբարտաւանից։ 3Մինչեւ յե՞րբ մեղաւորք, Տէր, մինչեւ յե՞րբ մեղաւորք պարծեսցին։ 4Բարբառեալ խօսեսցին զանիրաւութիւն, խօսեսցին ամենեքեան որ գործեն զանօրէնութիւն։ 5Զժողովուրդս քո, Տէր, խոնարհ արարին, եւ զժառանգութիւն քո չարչարեցին։ 6Զայրին եւ զպանդուխտն սպանին, զորբսն կոտորեցին. 7եւ ասացին. Ոչ տեսանէ զայս Տէր, եւ ոչ ի միտ առնու Աստուած Յակոբայ։ 8Իմացարուք, անզգամք ժողովրդոց եւ անմիտք, մինչեւ յե՞րբ ոչ առնուք ի միտ։ 9Որպէս զի թէ որ տնկեաց զունկն՝ ինքն ո՞չ լուիցէ, կամ որ ստեղծ զակն՝ ինքն ո՞չ տեսանիցէ։ 10Որ խրատէ զազինս՝ որպէս թէ ո՞չ յանդիմանեսցէ, ո ուսուցանէ մարդոյ զգիտութիւն։ 11Տէր ճանաչէ զխորհուրդս մարդկան՝ զի են ընդունայն։

12Երանի՛ մարդոյ զոր խրատես դու, Տէր, եւ յօրինաց քոց ուսուցանես դու նմա։ 13Ցածուցանես դու նմա զաւուրս՝՝ չարութեան, մինչեւ փորեսցի խորխորատ մեղաւորի։ 14Ոչ մերժէ Տէր զժողովուրդ իւր, եւ զժառանգութիւն իւր ոչ առնէ անտես։ 15Մինչեւ դարձցին իրաւունք յարդարութիւն, ընկալցին զնա ամենեքեան ոյք ուղիղ են սրտիւք։ 16Ո՞ յարիցէ ընդ իս ի վերայ չարաց, կամ ո՞ հաւասարեսցէ ինձ ի վերայ՝՝ այնոցիկ որ գործեն զանօրէնութիւն։ 17Եթէ ոչ Տեառն օգնեալ էր ինձ, փոքր մի եւս բնակեալ էր անձն իմ ի դժոխս։ 18Եթէ ասէի թէ՝ Ահա սասանեցան ոտք իմ, ողորմութիւն քո, Տէր, օգնէր ինձ։ 19Ըստ բազում ցաւոց սրտի իմոյ՝ մխիթարութիւն քո ուրախ առնէր զանձն իմ։

20Մի՛ հաւասարեսցի՞ քեզ աթոռ անօրէնութեան, ո պատճառէ զվաստակս ընդդէմ հրամանի։ 21Որսացան զանձն արդարոյ, եւ զարիւն ամբիծ պարտաւոր առնէին։ 22Եղեւ Տէր ապաւէն իմ, Աստուած օգնական յուսոյ իմոյ։ 23Հատուսցէ նոցա Տէր ըստ անօրէնութեան նոցա, եւ ըստ չարութեան նոցա կործանեսցէ զնոսա Տէր Աստուած մեր։