ՍԱՂՄՈՍ ՂԷ (ՂԸ)

Սաղմոս Դաւթի։

1Օրհնեցէք զՏէր յօրհնութիւն նոր, զի սքանչելիս արար. փրկեաց զնա աջ իւր եւ բազուկ սուրբ իւր։ 2Եցոյց Տէր զփրկութիւն իւր, առաջի ազգաց յայտնեաց զարդարութիւն իւր։ 3Յիշեաց զողորմութիւն իւր Յակոբայ, զճշմարտութիւն՝՝ իւր ի վերայ տանն Իսրայելի. եւ տեսին ամենայն ծագք երկրի զփրկութիւն Աստուծոյ մերոյ։ 4Աղաղակեցէք առ Տէր, ամենայն երկիր, օրհնեցէք, ցնծացէք եւ սաղմոս ասացէք։ 5Սաղմոս ասացէք Աստուծոյ մերում օրհնութեամբ, օրհնութեամբ եւ ի ձայն սաղմոսաց։ 6Ի ձայն օրհնութեան կռածոյ փողոյ, օրհնութեամբ, ցնծութեամբ եւ ի ձայն եղջեր փողոյ, աղաղակեցէք առաջի Թագաւորին, Տեառն։ 7Խռովեսցի ծով լրիւ իւրով, տիեզերք եւ ամենայն բնակիչք նորա. 8եւ գետք ծափս հարցեն ի միասին ձեռամբ, լերինք ցնծասցեն 9առաջի Տեառն, զի գայ եւ հասեալ է Տէր ի դատել զերկիր. դատի զաշխարհս արդարութեամբ, եւ զժողովուրդս իւր ուղղութեամբ։