1Եւ եցոյց ինձ մաքուր գետ կենդանի ջրոյ սառնատեսակ՝՝, որ ելանէր յաթոռոյն Աստուծոյ եւ Գառինն։ 2Եւ գնայր ի մէջ հրապարակաց քաղաքին. եւ զեզերբ գետոյն՝՝ աստի եւ անտի ծառ կենաց որ բերէր պտուղս երկոտասան, ըստ միոյ միոյ ամսոյ տային զպտուղս իւրեանց. եւ տերեւ ծառոյն էր բժշկութիւն հեթանոսաց։ 3Եւ նզովք անդ ոչ եւս էին. եւ աթոռն Աստուծոյ եւ Գառին նորա էր ի նմա, եւ ծառայք նորա պաշտէին զնա. 4եւ տեսանէին զերեսս նորա. եւ անուն նորա գրեալ էր ի ճակատս նոցա։ 5Եւ գիշեր ոչ անդ, եւ չէր ինչ անդ պէտք ճրագի եւ լուսոյ արեգական, վասն զի Տէր Աստուած լուսաւորէր զնոսա. եւ թագաւորեսցեն յաւիտեանս յաւիտենից։

6Եւ ասէ ցիս. Այս բանք հաւատարիմ են եւ ճշմարիտ, եւ Տէր Աստուած մարգարէից սրբոց՝՝ առաքեաց զհրեշտակ իւր ծառայիդ իւրում՝՝ ցուցանել զոր լինելոց է վաղվաղակի։ 7Ահա գամ վաղվաղակի. երանի որ պահէ զբան մարգարէութեանս զայս՝՝։

8Եւ ես Յովհաննէս լուայ եւ տեսի զայս ամենայն. եւ յորժամ լուայ եւ տեսի, անկայ եւ երկիր պագի՝՝ հրեշտակին որ ցուցանէր ինձ զայս ամենայն։ 9Եւ ասէ ցիս. Մի՛ անկանիր առաջի իմ եւ երկիր պագաներ՝՝. քանզի եւ ես ծառայակից քո եմ եւ եղբարց քոց որ պահեսցեն զբան մարգարէութեան գրոյս այսորիկ. Աստուծոյ երկիր պագ։ 10Եւ ասէ ցիս դարձեալ. Մի՛ կնքեր զբանս մարգարէական գրոցս այսմիկ, քանզի ժամանակս մերձ է։ 11Որ ամպարշտելոցն է՝՝ ամպարշտեսցի, եւ որ աղտեղանալոցն է՝՝ աղտեղասցի, եւ որ արդարանալոցն է՝՝ արդարասցի, եւ որ սրբելոցն է՝՝ սրբեսցի։ 12Ահա գամ վաղվաղակի, եւ վարձք իմ ընդ իս՝ հատուցանել իւրաքանչիւր ըստ գործս իւրեանց։ 13Ես եմ Ալփա եւ Ով, Սկիզբն եւ Կատարած, Առաջին եւ Վերջին։ 14Երանելիք են որ պահեն զպատուիրանս նորա. նոքա ունին իշխանութիւն ուտել ի փայտէն՝՝ կենաց եւ մտանել ընդ դրունս քաղաքին։ 15Այլ ելցեն արտաքս շունք եւ դեղատուք եւ սպանողք եւ կռապաշտք, եւ ամենեքեան որ սիրեն զստութիւն։

16Ես Յիսուս առաքեցի զհրեշտակ իմ վկայել զայս ձեզ եկեղեցեացդ. ես արմատ եւ սեռ ի Դաւթայ՝՝, եւ աստղ պայծառ առաւօտին։ 17Եւ Հոգի, եւ Փեսայն՝ որ գալոցն եմ. եւ որ լսէ՝ ասելով թէ՝ Եկ, եւ որ ծարաւի իցէ՝ եկեսցէ, եւ որ ոք կամի առնուլ՝՝ զջուրն կենաց ձրի։

18Վկայեմ եւ ես ամենայնի որ լսէ զբանս մարգարէութեան գրոցս այսմիկ, թէ ոք յաւելցէ ի սա, յաւելցէ Աստուած ի վերայ նորա զեւթն հարուածսն՝՝ գրեալս ի գիրս յայս։ 19Եւ եթէ ոք պակասեցուսցէ ի բանից մարգարէութեան գրոյս այսմիկ, պակասեցուսցէ եւ հատցէ Աստուած զբաժին նորա ի ծառոյն կենաց եւ ի քաղաքէն սրբոյ, որ գրեալ է ի գիրս յայս՝՝։ 20Ասաց որ վկայեացն զայս. Գամ ես վաղվաղակի։ Ամէն։ Եկ, Տէր Յիսուս Քրիստոս։ 21Շնորհք Տեառն մերոյ Յիսուսի Քրիստոսի ի վերայ ամենայն սրբոց՝՝։ Ամէն։ՎԱԽՃԱՆ ՆՈՐՈՅ ԿՏԱԿԱՐԱՆԻ