1Ո՜վ տայր քեզ, եղբօրորդի իմ,՝՝ դիել զստինս մօր իմոյ. գտեալ զքեզ արտաքոյ՝ համբուրեցից զքեզ, եւ ոչ անգոսնեսցես զիս։ 2Առեալ ածից զքեզ ի տուն մօր իմոյ, եւ ի սենեակ յղացելոյն՝՝ զիս. արբուցից քեզ ի գինւոյ իւղագործաց, յօշարակէ նռնենեաց իմոց։ 3Ձախ նորա ընդ գլխով իմով, եւ աջ նորա պատեսցէ զինեւ։

4Երդմնեցուցից զձեզ, դստերք Երուսաղեմի, ի զօրութիւնս եւ ի հաստատութիւնս ագարակի, եթէ յառնիցէք զարթուսջիք՝՝ զսէրն մինչեւ կամեսցի։

5Դստերքն եւ թագուհիքն ասեն.՝՝ Ո՞վ է սա որ ելեալ գայ սպիտակացեալ, յենու գայ յեղբօրորդի՝՝ իւր։ Փեսայն ցհարսնն ասէ.՝՝ Ի ներքոյ խնձորւոյն զարթուցի զքեզ. անդ երկնեաց զքեզ մայր քո, անդ երկնեաց որ ծնաւն զքեզ։

6Դիր զիս իբրեւ զկնիք ի սրտի քում, եւ իբրեւ զմատանի ի վերայ բազկի քո, զի բուռն է իբրեւ զմահ սէր, եւ խիստ՝ իբրեւ զդժոխս նախանձ. թռիչք նորա իբրեւ զթռիչս բոցոյ հրոյ։ 7Ջուրք բազումք ոչ կարասցեն զսէր շիջուցանել, եւ գետք ոչ արգելցեն զնա. եթէ տացէ այր զամենայն զկեանս իւր ընդ սիրոյ, անգոսնելով անգոսնեսցեն զնա։

8Քոյր մեր փոքրիկ եւ ստինք ոչ գոյ նորա. զի՞նչ արասցուք քեռ մերում յաւուր յորում պատմեսցի նմա՝՝։ 9Եթէ պարիսպ իցէ՝ շինեսցուք ի վերայ նորա մահարձանս արծաթիս, եթէ դուռն իցէ՝ յօրինեսցուք ի նմա տախտակս եղեւնափայտեայս։

10Հարսնն համարձակի եւ ասէ.՝՝ Ես եմ պարիսպ եւ ստինք իմ իբրեւ զաշտարակս, ես էի յաչս նորա՝ որպէս որ գտանիցէ զխաղաղութիւն։

11Այգի եղեւ Սողոմոնի ի Բեէղմաւոն. ետ զայգին իւր ցպահապանսն. բերցէ այր իւրաքանչիւր ընդ պտղոյ նորա հազարս արծաթոյ։

12Այգի իմ ինձ առաջի իմ. հազարքն Սողոմոնի՝՝, եւ երկերիւրք պահապանաց որ պահեն զպտուղ նորա։

13Հարսնն ասէ.՝՝ Որ նստիսդ ի պարտէզս՝ այլք անսան քեզ. լսելի արա ինձ զբարբառ քո։

14Փախիր, եղբօրորդի իմ, եւ նմանեաց այծեման, կամ որթուց եղանց ի վերայ լերանց խնկաբերաց։

Օրիորդքն եւ թագուհիքն ասեն.

15Գիտացի զի մարմին զբօսացուցանէ զմանկութիւն, բարձրացուսցէ ի շտեմարանս իւր. թագաւոր մեր ի գահոյս մեր. իբրեւ արմաւ ոսկեղէն զմռսալից լցցին տաշտք մեր։ 16Դարձցի թագաւորն անդրէն ի մանկութիւն։ 17Սիրելին ի սենեակս մեր. երգեսցուք զսէրն։ 18Փեսայն ասէ. Ես իսկ եմ ի սաղմոսարանին. երգեցից ընդ ընկերս իմ. երգեսցուք եւ ուրախ լիցուք։ 19Հարսնն եւ դստերքն եւ օրիորդքն ասեն. Թագաւոր սիրելի, թէպէտ եւ ծածկեցաք ի տեսլենէ, աչք մեր յսնաւորք։ 20Տէր արար զքեզ, հաստատեաց զքեզ, պատրաստեաց զքեզ յարգանդէ, գեղեցիկդ ի կանայս. մայր քո ծնցի մարմին անտխեղծ։ Առ նոյն՝ յայլմէ տեսչութենէ, զի այսպէս ունէր։՝՝