1Ահա աւուրք Տեառն եկեսցեն՝՝, եւ բաժանեսցի աւարն քո ի քեզ. 2եւ ժողովեսցէ՝՝ զամենայն ազգս ի վերայ Երուսաղեմի ի պատերազմ, եւ առցի քաղաքն, եւ յափշտակեսցին տունք, եւ պղծեսցին կանայք, եւ ելցէ կէս քաղաքին ի գերութիւն. եւ մնացորդք ժողովրդեան իմոյ մի սատակեսցին ի քաղաքէ անտի։ 3Եւ ելցէ Տէր եւ տացէ պատերազմ ընդ ազգսն ընդ այնոսիկ. իբրեւ յաւուր ճակատու իւրոյ յաւուր պատերազմի. 4եւ կացցեն ոտք նորա յաւուր յայնմիկ ի վերայ լերինն Ձիթենեաց՝ հանդէպ Երուսաղեմի յարեւելից. եւ պատառեսցի լեառնն Ձիթենեաց՝ կէսն նորա յարեւելս եւ կէսն նորա ի ծով, վիհ մեծ յոյժ. եւ խոնարհեսցի կէս լերինն առ հիւսիսի, եւ կէս նորա առ հարաւ։ 5Եւ խցցի ձոր լերանց իմոց, եւ՝՝ կցեսցի ձոր լերանցն մինչեւ ցԱսայէլ. եւ խցցի զոր օրինակ խցաւ՝՝ յերեսաց շարժմանն՝ յաւուրս Ոզիայ արքայի Յուդայ. եւ եկեսցէ հասցէ Տէր Աստուած իմ եւ ամենայն սուրբք ընդ նմա։ 6Եւ եղիցի յաւուր յայնմիկ՝ ոչ եղիցի լոյս. եւ ցուրտ եւ պարզ՝ եղիցի օր մի։ 7Եւ՝՝ օրն այն յայտնի Տեառն, ոչ տիւ իցէ եւ ոչ գիշեր, եւ ընդ երեկս եղիցի լոյս։ 8Յաւուր յայնմիկ բղխեսցէ ջուր կենդանի յԵրուսաղէմ, կէս նորա ի ծովն առաջին, եւ կէս նորա ի ծովն որ յետոյ՝՝. զամառն եւ զգարուն նոյնպէս եղիցի։ 9Եւ եղիցի Տէր Թագաւոր ի վերայ ամենայն երկրի. յաւուր յայնմիկ եղիցի Տէր մի, եւ անուն նորա մի, 10պատել զամենայն երկիր, զանապատն՝ ի Գաբայ՝՝ մինչեւ ցՌեմոն ընդ կողմն հարաւոյ Երուսաղեմի. եւ Հռամ ի տեղւոջ իւրում կացցէ՝՝ ի դրանէն Բենիամինի մինչեւ ի տեղի դրանն Առաջնոյ, մինչեւ ի դուռն Անկեանցն, եւ մինչեւ ցաշտարակն Անամայելի՝՝ մինչեւ ի հնձանս թագաւորին։ 11Եւ բնակեսցեն ի նմա, եւ նզովք ոչ եւս լիցին. եւ բնակեսցէ Երուսաղէմ յուսով։

12Եւ այս իցեն հարուածք զոր հարցէ Տէր զազգս ամենայն որ զօրաժողով եղեն ի վերայ Երուսաղեմի. հալեսցին մարմինք նոցա՝ մինչդեռ կայցեն ի վերայ ոտից իւրեանց, եւ ծորեսցին աչք նոցա ի կապճաց իւրեանց, եւ լեզուք նոցա հալեսցին ի բերանս իւրեանց։ 13Եւ եղիցի յաւուր յայնմիկ ահ մեծ ի Տեառնէ ի վերայ նոցա. եւ բուռն հարկանիցեն իւրաքանչիւր զձեռանէ ընկերի իւրոյ, եւ խառնեսցէ զձեռն իւր ընդ ձեռն՝՝ ընկերի իւրոյ։ 14Եւ Յուդա ճակատեսցի յԵրուսաղէմ, եւ ժողովեսցէ զզօրութիւն ամենայն ազգաց շուրջանակի, ոսկի եւ արծաթ եւ հանդերձ բազում յոյժ։ 15Եւ այս իցեն հարուածք ձիոց եւ ջորւոց եւ ուղտուց եւ իշոց, եւ ամենայն անասնոց որ իցեն ի բանակսն յայնոսիկ ըստ նմին հարուածոց։ 16Եւ եղիցի որ միանգամ մնասցեն յամենայն ազգաց եկելոցն ի վերայ Երուսաղեմի, ելանիցեն ամ յամէ երկիր պագանել Թագաւորին Տեառն Աստուծոյ ամենակալի՝՝, եւ առնել զտօն տաղաւարահարացն։ 17Եւ եղիցի որ միանգամ ոչ ելանիցէ յամենայն ազգաց երկրի յԵրուսաղէմ, երկիր պագանել Թագաւորին Տեառն Աստուծոյ ամենակալի՝՝, ոչ եղիցի ի վերայ նոցա անձրեւ։ 18Եւ եթէ ազգն Եգիպտացւոց ոչ ելանիցէ եւ գայցէ, եւ ի վերայ նոցա եղիցին՝՝ հարուածքն, զոր հարցէ Տէր զամենայն ազգսն որ ոչ ելանիցեն առնել զտօն տաղաւարահարացն։ 19Նոյն եղիցի ի մեղս Եգիպտացւոցն, եւ ի մեղս ամենայն ազգաց, որ ոչ ելանիցեն առնել զտօն տաղաւարահարացն։

20Յաւուր յայնմիկ ի սանձս ձիոցն իցէ Սրբութիւն Տեառն։ Եւ եղիցին սանք ի տան Տեառն՝ իբրեւ զտաշտս առաջի սեղանոյն։ 21Եւ եղիցի ամենայն սան որ յԵրուսաղէմ եւ որ ի Յուդա՝ նուիրեալ Տեառն ամենակալի. եւ եկեսցեն ամենեքեան որ մատուցանիցեն պատարագ՝ առնուցուն ի նոցանէ եւ եփեսցեն նոքօք. եւ ոչ եւս եղիցի Քանանացի ի տան Տեառն ամենակալի յաւուր յայնմիկ։