Սաւուղ թագաւորին մահը

1Եւ Փղշտացիք Իսրայէլի հետ պատերազմ ըրին, ու Իսրայէլի մարդիկը Փղըշտացւոց առջևէն փախան. ու Գեղբուէ լեռանը վրայ սպաննուած ինկան: 2Եւ Փղշտացիք Սաւուղի ու անոր որդիներուն ետևէն հասան. Ու Փղշտացիք Սաւուղի որդիները, Յովնաթանը, Աբինադաբը ու Մեղքիսաւէն զարկին: 3Եւ պատերազմը Սաւուղի վրայ սաստկացաւ. ու աղեղնաւորները զանիկա գտան, ու աղեղնաւորներէն վիրաւորուեցաւ: 4Եւ Սաւուղ իր կապարճակիրին ըսաւ, Սուրդ քաշէ ու անով զիս խոցէ, չըլլայ. որ այս անթըլփատները գան ու զիս ծաղր ընեն. բայց կապարճակիրը չուզեց, քանզի շատ վախցաւ: Եւ Սաւուղ սուրը առաւ ու անոր վրայ ինկաւ: 5Եւ անոր կապարճակիրը Սաւուղի մեռնիլը տեսնելով` ան ալ իր սուրին վրայ ինկաւ ու մեռաւ: 6Այսպէս մեռան Սաւուղ ու անոր երեք որդիները. անոր բոլոր տունն ալ մէկտեղ մեռան: 7Ու հովիտին մէջ եղող բոլոր Իսրայէլի մարդիկը անոնց փախչիլը, և Սաւուղի ու անոր որդիներուն մեռնիլը տեսնելով` իրենց քաղաքները թողուցին փախան. և Փղշտացիք եկան ու անոնց մէջ բնակեցան: 8Եւ հետևեալ օրը Փղշտացիք եկան որպէս զի մեռելները մերկացնեն, ու Սաւուղը և անոր որդիները Գեղբուէի լեռան վրայ ինկած գտան. 9Ու զանիկա մերկացուցին, և անոր գլուխը ու զէնքերը առին. ու Փղշտացւոց երկրին չորս կողմը իրենց կուռքերուն ու ժողովուրդին այս բաներուն աւետիսը տալու համար մարդ ղրկեցին: 10Եւ անոր զէնքերը իրենց աստուծոյն տունը դրին, ու անոր գլուխը Դագոնի տանը մէջ գամեցին: 11Եւ Գաղաադու Յաբիսի բոլոր բնակիչները երբ լսեցին այն ամէնը զոր Փղըշտացիք Սաւուղի ըրած են, 12Բոլոր զօրաւոր մարդիկը ոտք ելան, և Սաւուղի մարմինը ու անոր որդիներուն մարմինները վերցուցին, և զանոնք Յաբիս բերին. և անոնց ոսկորները Յաբիսի մէջ բևեկնիին տակ թաղեցին, ու եօթը օր ծոմ պահեցին: 13Այսպէս մեռաւ Սաւուղ Տէրոջը դէմ ըրած ապստամբութեան մեղքին համար. որովհետև Տէրոջը խօսքը չպահեց, ու նաև վհուկ փնտռեց բան հարցնելու համար, 14Ու Տէրոջը չհարցուց. ուստի Տէրը զանիկա մեռցուց, ու թագաւորութիւնը Յեսսէի որդւոյն Դաւիթի դարձուց: