Բենիամինին ցեղէն Դաւիթին նախկին հետևորդները

1Եւ ասոնք են որ Սիկելակ եկան Դաւիթի քով` երբ անիկա դեռ Կիսեան Սաւուղի երեսէն պահուած էր, ու ասոնք զօրաւորներէն ըլլալով` պատերազմի մէջ օգնութիւն կ’ընէին: 2Քանզի աղեղնաւորներ էին, ու պարսով քարերը ու աղեղով նետերը նետելու` թէ՛ աջ և թէ՛ ձախ ձեռքերնին կը գործածէին. անոնք Սաւուղի եղբայրներէն, Բենիամինեաններէն, էին: 3Անոնց գլուխը Աքիեզեր էր, ետքը Յովաս, Գաբաացի Սամաայի որդիները. և Յեզիէլ ու Փաղէտ, Ազամօթի որդիները, և Բարաքա ու Անաթովթացի Յէու, 4Ու երեսունին մէջ զօրաւոր` ու երեսունին վերակացուն Գաբաւոնացի Իսմայիա, ու Երեմիա ու Յազիէլ և Յօհանան ու Գադերացի Յովզաբադ, 5Եղիոզայ ու Յերիմովթ և Բաաղիա ու Սամարիա և Յարուփացի Սափատիա, 6Եղկանա, Յեսիա, Ազարիէլ, Յովեզեր ու Յեսբաամ` Կորխացիք. 7Ու Գեդովրացի, Յերոամի որդիները, Յովէլա ու Զաբադիա:

Գադի ցեղէն Դաւիթին հետևորդները

8Եւ Գադեաններէն ալ Դաւիթի քով` անապատին մէջ բերդը քաշուեցան զօրաւոր, քաջ, պատերազմական, վահան ու նիզակ գործածող մարդիկ. անոնց դէմքը առիւծի դեմքիկը նմանէր, ու լեռներու վրայի այծեամներուն պէս թեթևաշարժ էին: 9Առաջինը Եզեր, երկրորդը Աբդիա, երրորդը Եղիաբ, 10Չորրորդը Մասմանա, հինգերորդը Երեմիա, 11Վեցերորդը Եթթի, եօթներորդը Եղիէլ, 12Ութերորդը Յօհանան, իններորդը Եղզաբաթ, 13Տասներորդը Երեմիա, մետասաներորդը Մաքաբանայ էր: 14Ասոնք Գադի որդիներէն զօրքին իշխաններն էին. պզտիկներէն մէկը հարիւրի վրայ, ու մեծերէն մէկը հազարի վրայ էր: 15Ասոնք են որ առաջին ամսուն մէջ Յորդանանէ անցան` երբ ջուրը իր բոլոր եզերքները կոխեր էր, և դէպ ի արեւելք ու արեւմուտք բոլոր հովիտի բնակիչները փախցուցին:

Բենիամինէն և Յուդայէն հետևորդներ

16Ու բերդը Դաւիթի քով Բենիամինի ու Յուդայի որդիներէն ալ եկան: 17Եւ Դաւիթ անոնց առջև ելաւ ու պատասխան տուաւ անոնց` ըսելով, Եթէ խաղաղութեամբ ինծի օգնութիւն ընելու երկեր էք, իմ սիրտս ձեզի հետ պիտի ըլլայ. բայց եթէ խաբէութեամբ զիս իմ թշնամիներուս ձեռքը մատնելու համար եկեր էք, (որ իմ ձեռքերուս մէջ անօրէնութիւն մը չկայ,) մեր հայրերուն Աստուածը տեսնէ ու յանդիմանէ: 18Եւ իշխաններուն գլուխը Ամեսայի Հոգւով լեցուեցաւ, ու ըսաւ, Մենք քուկդ ենք, ով Դաւիթ, Ու քեզի հետ պիտի ըլլանք, ով Յեսսէի որդի. Խաղաղութիւն, խաղաղութիւն քեզի, Ու քու օգնականներուդ խաղաղութիւն ըլլայ, Քանզի քու Աստուածդ քեզի օգնական է: Այն ատեն Դաւիթ զանոնք ընդունեց, ու զանոնք իր գունդին իշխաններուն մէջ դրաւ:

Մանասէէն հետևորդներ

19Մանասէէ ալ Դաւիթի անցան, երբ անիկա Փղշտացւոց հետ Սաւուղի վրայ պատերազմելու գնաց, բայց անոնց օգնութիւն չըրին, քանզի Փղշտացւոց նախարարները խորհրդով զանիկա ետ ղրկեցին` ըսելով, Ասիկա մեր գլուխներուն վնասովը, իր տէրոջը, Սաւուղի, պիտի անցնի: 20Երբ անիկա Սիկելակ կ’երթար, Մանասէէ Մանասէի հազարապետները, Եդնա, Յովզաբադ, Յեդիէլ, Միքայէլ, Յովզաբադ, Եղիուս ու Սաղթի անոր անցան. 21Եւ ասոնք Դաւիթի օգնութիւն ըրին ասպատակներուն գունդին վրայ յարձակելով. քանզի ամէնն ալ զօրաւոր կտրիճներ էին, ու զօրաց իշխաններ եղան. 22Վասն զի այն ատեն օրէ օր Դաւիթի կու գային անոր օգնութիւն ընելու համար, մինչև որ Աստուծոյ բանակին պէս մեծ բանակ մը եղաւ:

Դաւիթին զօրքերուն ցանկը

23Եւ ասոնք են այն սպառազինեալ զօրքերուն համրանքները` որոնք Քեբրոն եկան Դաւիթի. որպէս զի Տէրոջը խօսքին համեմատ անոր դարձնեն Սաւուղի թագաւորութիւնը. 24Յուդայի որդիներէն վահան ու նիզակ կրող վեց հազար ութ հարիւր սպառազինեալ զօրք. 25Շմաւոնի որդիներէն եօթը հազար հարիւր պատերազմական զօրաւոր կտրիճներ. 26Ղևիի որդիներէն չորս հազար վեց հարիւր. 27Եւ Ահարոնեաններուն առաջնորդը Յովիադա, ու անոր հետ երեք հազար եօթը հարիւր մարդիկ. 28Եւ զօրաւոր կտրիճ Սադովկ երիտասարդը, ու անոր հօրը տունէն քսանուերկու իշխան. 29Եւ Սաւուղի եղբայրներէն, Բենիամինի որդիներէն, երեք հազար մարդիկ. քանզի մինչև այն ատեն անոնց շատը Սաւուղի տանը պահպանութիւնը կ’ընէին. 30Ու Եփրեմի որդիներէն անոնց ազգատոհմներուն անուանի մարդիկը քսան հազար ութ հարիւր զօրաւոր կտրիճներ. 31Եւ Մանասէի կէս ցեղէն տասնըութ հազար մարդիկ, որոնք իրենց անուններովը որոշուեցան երթալու` ու Դաւիթը թագաւոր դնելու. 32Եւ Իսաքարի որդիներէն երկու հարիւր իմաստուն իշխաններ, որոնք ժամանակներուն համեմատ գիտէին թէ Իսրայէլ ի՛նչ ընելու է. ու անոնց բոլոր եղբայրները անոնց բերանը կը նայէին. 33Զաբուղոնէ պատերազմի ելլող և ամէն տեսակ պատերազմական գործիքներով պատերազմող յիսուն հազար մարդիկ, որոնք մէկ սրտով* կարգաւ կը շարուէին. 34Ու Նեփթաղիմէ հազար իշխան, և անոնց հետ երեսունըեօթը հազար վահանաւոր ու նիզակաւոր մարդիկ. 35Ու Դանեաններէն քսանըութ հազար վեց հարիւր պատերազմական մարդիկ. 36Եւ Ասերէ քառասուն հազար պատերազմի գացող զօրք. 37Ու Յորդանանու անդիի կողմէն, Ռուբենեաններէն ու Գադեաններէն և Մանասէի կէս ցեղէն, ամէն տեսակ պատերազմական գործիքներով պատերազմող հարիւր քսան հազար մարդիկ: 38Բոլոր այս գունդով շարուող պատերազմական մարդիկը անկեղծ սրտով Քեբրոն եկան` Դաւիթը բոլոր Իսրայէլի վրայ թագաւոր դնելու համար. ու Իսրայէլի բոլոր մնացորդն ալ մէկ սրտով էր` Դաւիթը թագաւոր ընելու: 39Եւ հոն Դաւիթի հետ ուտելով ու խմելով երեք օր կեցան. քանզի անոնց եղբայրները անոնց համար պատրաստութիւն տեսեր էին: 40Եւ անոնց մօտ եղողներն ալ, մինչև անգամ Իսաքար, Զաբուղոն ու Նեփթաղիմ, էշերով, ուղտերով, ջորիներով ու եզներով հաց բերին. նաև ուտելիքի համար շատ ալիւր, չոր թուզ, չամիչ, գինի, իւղ, արջառներ ու ոչխարներ. քանզի Իսրայէլի մէջ ուրախութիւն կար: