1Պօղոս, Աստուծոյ կամքովը Յիսուս Քրիստոսի առաքեալ ըլլալու կանչուած, ու Սոսթենէս եղբայրը, 2Կորնթոսի մէջ եղած Աստուծոյ եկեղեցւոյն, Քրիստոս Յիսուսով սրբուածներուն, սուրբեր ըլլալու կանչուածներուն, այն ամէնուն հետ` որոնք ամէն տեղ մեր Տէր Յիսուս Քրիստոսի անունը կը կանչեն, իրենցը ու մերը. 3Ձեզի շնորհք և խաղաղութիւն Աստուծմէ մեր Հօրմէն ու Տէր Յիսուս Քրիստոսէ:

Քրիստոսով օրհնութիւններ

4Ամէն ատեն իմ Աստուծմէս ձեզի համար կը գոհանամ Աստուծոյ շնորհքին վրայ, որ ձեզի տրուած է Քրիստոս Յիսուսով․ 5Որ դուք անով ամէն բանի մէջ հարստացաք ամէն խօսքով և ամէն գիտութիւնով. 6Ինչպէս Քրիստոսի վկայութիւնը ձեր մէջ հաստատուեցաւ. 7Որպէս զի դուք բնաւ շնորհքով մըն ալ չնուազիք` մեր Տէր Յիսուս Քրիստոսի յայտնուելուն սպասելով. 8Որ նաև ձեզ պիտի հաստատէ մինչև վերջը` անմեղադրելի ըլլալու մեր Տէր Յիսուս Քրիստոսի օրը: 9Հաւատարիմ է Աստուած, որով կանչուեցաք հաղորդ ըլլալու իր Որդւոյն, մեր Տէր Յիսուս Քրիստոսի:

Եկեղեցիի մէջ բաժանում

10Ձեզի կ’աղաչեմ, եղբայրներ, մեր Տէր Յիսուս Քրիստոսի անունովը, որ միեւնոյն խօսքը ունենաք ամէնդ, ու երկպառակութիւններ չըլլան ձեր մէջ. հապա դուք մէկ միտքի ու մէկ խորհուրդի վրայ հաստատուած ըլլաք: 11Վասն զի ձեզի համար ինծի լուր հասաւ, եղբայրներ, Քղուէի տունէն եղողներէն, թէ ձեր մէջ հակառակութիւններ կան: 12Հիմա զայս կը զրուցեմ, որ ձեզմէ ամէն մէկը կըսէ եղեր թէ Ես Պօղոսեան եմ, ու միւսը` թէ Ես Ապողոսեան, և ուրիշը` թէ Ես Կեփասեան, ու միւսը` թէ Ես Քրիստոսեան: 13Միթէ Քրիստոս բաժնո՞ւած է. միթէ Պօղո՞ս խաչը ելաւ ձեզի համար, կամ թէ Պօղոսի՞ անունով մկըրտուեցաք: 14Կը գոհանամ Աստուծմէ որ ձեզմէ մէ°կը չմկրտեցի, միայն թէ Կրիս-պոսը ու Գայիոսը. որպէս զի մէ°կը չըսէ 15Թէ իմ անունովս մկրտեցի: 16Իրաւ, Ստեփանէսի ընտանիքն ալ մկրտեցի. ալ ուրիշ մէ°կը չեմ գիտեր ամենևին թէ մկրտեցի: 17Վասն զի Քրիստոս զիս մկրտելու չղրկեց, հապա աւետարանը քարոզելու, ոչ թէ խօսքերու ճարտարութիւնով, որպէս զի Քրիստոսի խաչը ոչինչ չըլլայ:

Քրիստոս Աստուծոյ ոյժը

18Քանզի խաչին քարոզութիւնը կորսուածներուն յիմարութիւն է, բայց մեզի փրկուածներուս Աստուծոյ զօրութիւնն է: 19Վասն զի գրուած է, Իմաստուններուն իմաստութիւնը պիտի կորսնցնեմ, ու հանճարեղներուն հանճարը պիտի խափանեմ: 20Ո՞ւր է իմաստունը, ո՞ւր է դպիրը, ո՞ւր է այս աշխարհին քննողը. չէ՞ որ Աստուած յիմարեցուց այս աշխարհին իմաստութիւնը: 21Քանզի որովհետև Աստուծոյ իմաստութիւնովը աշխարհ չճանչցաւ զԱստուած իր իմաստութիւնովը, Աստուած հաճեցաւ քարոզութեան յիմարութիւնովը հաւատացեալները ապրեցնել: 22Վասն զի Հրեաները նշան կ’ուզեն, և Յոյները իմաստութիւն կը փնտռեն. 23Իսկ մենք կը քարոզենք խաչեալ Քրիստոսը, Հրեաներուն գայթակղութիւն, ու Յոյներուն յիմարութիւն: 24Բայց անոնց որ կանչուած են, թէ° Հրեաներուն և թէ° Յոյներուն, Քրիստոսը` Աստուծոյ զօրութիւնը և Աստուծոյ իմաստութիւնը: 25Վասն զի Աստուծոյ յիմարը մարդոցմէ աւելի իմաստուն է, և Ասուծոյ տկարը մարդոցմէ աւելի զօրաւոր է: 26Արդարև դուք ձեր կոչումը կը տեսնէք, եղբայրներ, որ ոչ թէ մարմնի կողմանէ շատ իմաստուններ, և ոչ թէ շատ զօրաւորներ, և ոչ թէ շատ ազնուականներ կանչուեցան. 27Բայց Աստուած աշխարհիս յիմարները ընտրեց, որպէս զի ամօթով ընէ իմաստունները. ու աշխարհիս տկարները ընտրեց Աստուած, որպէս զի ամօթով ընէ զօրաւորները. 28Եւ աշխարհիս ցածազգիները ու անարգները ընտրեց Աստուած, և ոչինչները, որպէս զի բան մը եղողները խափանէ. 29Որպէս զի մարմին մը չպարծի Աստուծոյ առջև: 30Իսկ դուք անկէ էք Քրիստոս Յիսուսով, որ մեզի Աստուծմէ իմաստութիւն, արդարութիւն, սրբութիւն և փրկութիւն եղաւ. 31Որպէս զի, ինչպէս գրուած է, Ան որ կը պարծենայ, Տէրոջմով թող պարծենայ: