Սուրբ Հոգիին պարգևները

1Բայց հոգևոր պարգևներուն վրայով չեմ ուզեր, եղբայրներ, որ չգիտցող ըլլաք: 2Դուք գիտէք որ երբ հեթանոս էիք, մունջ կուռքերուն կը տարուէիք` ինչպէս կ’առաջնորդուէիք: 3Ուստի զայս ձեզի կ’իմացնեմ թէ մէկը չըլլար որ Աստուծոյ Հոգիովը խօսի` ու Յիսուսը նզովեալ կոչէ. և մէկն ալ չկրնար Յիսուսը Տէր կոչել` եթէ ոչ Հոգւով Սրբով: 4Եւ պարգևները զանազան են, բայց նոյն Հոգին է: 5Նաև պաշտօնները զանազան են, բայց նոյն Տէրն է: 6Նոյնպէս ներգործութիւնները զանազան են, բայց նոյն Աստուածն է` որ կը ներգործէ ամէնը ամէն բանի մէջ: 7Բայց ամէն մէկուն Հոգւոյն յայտնութիւնը տրուած է օգուտի համար: 8Մէկուն` Հոգիով իմաստութեան խօսք տրուած է, ուրիշին գիտութեան խօսք` նոյն Հոգիին տուած չափովը. 9Միւսին հաւատք` նոյն Հոգիով. ուրիշին բժշկութեան պարգևներ` նոյն Հոգիով. 10Ուրիշին` հրաշագործութիւններ, ուրիշին` մարգարէութիւն, ուրիշին` հոգիներու ընտրութիւն, ուրիշին` զանազան լեզուներ, ուրիշին` լեզուներու թարգմանութիւն: 11Բայց զայս ամէնը միևնոյն Հոգին կը ներգործէ, և ամէն մէկուն զատ զատ կը բաժնէ` ինչպէս կ’ուզէ:

Մէկ մարմին՝ շատ անդամներով

12Քանզի ինչպէս մարմինը մէկ է ու շատ անդամներ ունի, և այն մարմինին բոլոր անդամները. որոնք շատ են, մէկ մարմին են, նոյնպէս Քրիստոս ալ: 13Վասն զի մենք ամէնս մէկ Հոգիով մէկ մարմին ըլլալու մկրտուեցանք, թէ° Հրեաներ, թէ հեթանոսներ, թէ° ծառաներ, թէ° ազատներ, և ամէնս ալ մէկ Հոգիէ խմեցինք: 14Վասն զի մարմինը մէկ անդամ չէ, հապա շատ: 15Եթէ ոտքը ըսէ, Որովհետև ես ձեռք չեմ` մարմինէն չեմ, ոչ թէ անով այն մարմինէն չէ: 16Եւ եթէ ականջը ըսէ, Որովհետև ես աչք չեմ` մարմինէն չեմ, ոչ թէ անով այն մարմինէն չէ: 17Եթէ բոլոր մարմինը աչք ըլլար, լսելիքը ո՞ւր պիտի ըլլար. և եթէ բոլորը լսելիք ըլլար, ո՞ւր պիտի ըլլար հոտոտելիքը: 18Բայց հիմա Աստուած անդամները դրաւ` անոնց ամէն մէկը մարմինին մէջ, ինչպէս ինք ուզեց: 19Ապա եթէ ամէնը մէկ անդամ ըլլար, մարմինը ո՞ւր պիտի ըլլար: 20Բայց հիմա անդամները շատ են, ու մարմինը` մէկ: 21Չկրնար աչքը ըսել ձեռքին թէ Դուն ինծի պէտք չես. և ոչ դարձեալ գլուխը ոտքերուն` թէ Ինծի պէտք չէք: 22Մանաւանդ մարմինին այն անդամները որոնք շատ տկար կ’երևան, աւելի հարկաւոր են. 23Ու մարմինին այն անդամները զորոնք յաւէտ անպատիւ ըլլալ կը սեպենք, անոնց վրայ աւելի պատիւ կը դնենք. ու այսպէս մեր անվայելուչ անդամները աւելի վայելչութիւն ունին: 24Ու մեր վայելուչ անդամներուն բան մը պէտք չէ. բայց Աստուած մարմինը բարեխառնեց, ու պակասութիւն ունեցողին աւելի պատիւ տուաւ, 25Որպէս զի մարմինին մէջ երկպառակութիւն չըլլայ, հապա անդամները միևնոյն հոգը ունենան իրարու վրայ: 26Եւ եթէ մէկ անդամը նեղութիւն կրէ, բոլոր անդամները կը նեղուին անոր հետ. և եթէ փառաւորուի մէկ անդամը, բոլոր անդամները կ’ուրախանան անոր հետ: 27Արդ, դուք Քրիստոսի մարմինն էք, ու մասնաւորապէս անոր անդամները: 28Եւ Աստուած եկեղեցիին մէջ դրաւ մէկ քանիները, նախ` առաքեալներ, երկրորդ` մարգարէներ, երրորդ` վարդապետներ, ետքը հրաշքներ, ետքը բժշկութիւններու պարգևներ, օգնութիւններ, կառավարութիւններ, լեզուներու տեսակներ: 29Միթէ ամէնը առաքեալնե՞ր են. միթէ ամէնը մարգարէներ են. միթէ ամէնը վարդապետնե՞ր են. միթէ ամէնը հրաշքնե՞ր կը գործեն. 30Միթէ ամէնը բժշկութեան պարգևնե՞ր ունին. միթէ ամէնը լեզունե՞ր կը խօսին. միթէ ամէնը թարգմանութի՞ւն կ’ընեն: 31Բայց դուք նախանձաւոր եղէք այն շնորհքներուն որոնք լաւագոյն են. և ես` ալ աւելի աղէկ ճամբայ մը կը ցուցնեմ ձեզի: