Յորդորանք հաւատացեալներուն

1Բայց սուրբերուն համար ողորմութիւն ժողվելու վրայով, ինչպէս պատուէր տուի Գաղատացւոց եկեղեցիներուն, դուք ալ այնպէս ըրէք: 2Ամէն մէկշաբթի օրերը ձեզմէ ամէն մէկը իր քով թող դիզէ ինչ որ կը յաջողի, 3Որ չըլլայ թէ երբ գամ, այն ատեն ժողովումներ ըլլան. ու երբ գամ, որոնց որ դուք հաճիք, ես զանոնք թուղթերով պիտի ղրկեմ ձեր պարգևները Երուսաղէմ տանելու:

Պօղոսին ծրագիրները

4Եւ եթէ իմ երթալս ալ արժան սեպուի, ինծի հետ թող երթան: 5Սակայն ես ձեզի պիտի գամ երբ Մակեդոնիայէ անցնիմ. (քանզի Մակեդոնիայէ կ’անցնիմ.) 6Եւ կարելի է որ ձեր քով մնամ, կամ ձմեռն ալ անցնեմ. որպէս զի դուք զիս ճամբայ դնէք, ուր որ ես պիտի երթամ: 7Վասն զի չեմ ուզեր ձեզ հիմա հարևանցի մը տեսնել, բայց յոյս ունիմ որ ատեն մը ձեր քով կենամ, եթէ Տէրը հրաման տայ: 8Սակայն հիմա ես Եփեսոս պիտի մնամ մինչև Պէնտէկոստէ. 9Վասն զի ինծի մեծ ու արդիւնաւոր դուռ մը բացուած է, ու շատ հակառակորդներ կան: 10Արդ եթէ Տիմոթէոս գայ, նայեցէք որ ձեր քով առանց վախի ըլլայ. քանզի անիկա Տէրոջը գործը կը գործէ, ինչպէս ես ալ: 11Ուստի չըլլայ որ մէկը զանիկա արհամարհէ, հապա խաղաղութեամբ զանիկա ճամբայ դրէք, որպէս զի ինծի գայ. վասն զի անոր կը սպասեմ եղբայրներով մէկտեղ: 12Իսկ Ապողոս եղբօրը համար, շատ աղաչեցի անոր, որ ձեզի գայ եղբայրներուն հետ մէկտեղ. ու բնաւ կամք չունեցաւ որ հիմա գայ, բայց պիտի գայ` երբ յարմար ժամանակ գտնէ:

Վերջին խօսքեր

13Արթուն կեցէք, հաւատքի մէջ հաստատ կեցէք, ժիր եղէք, զօրացէք: 14Ձեր ամէն բաները սիրով ըլլան: 15Կ’աղաչեմ ձեզի, եղբայրներ, (գիտէք դուք Ստեփանէսի ընտանիքը թէ Աքայիայի առաջին պտուղն է, ու անձերնին սուրբերուն սպասաւորութեանը նուիրեցին.) 16Որ հնազանդ ըլլաք այնպիսիներուն, և ամէնուն որ մեզի հետ մէկտեղ կը գործեն ու կ’աշխատին: 17Ուրախ եմ ես Ստեփանէսի ու Փորտունատոսի ու Աքայիկոսի գալուն վրայ, որ ձեր պակսութիւնը անոնք լեցուցին. 18Քանզի հանգստացուցին իմ հոգիս ու ձերը. ուստի այնպիսիները ճանչցէք: 19Բարև կ’ընեն ձեզի Ասիայի եկեղեցիները. շատ բարև կ’ընեն ձեզի Տէրոջմով Ակիւղաս ու Պրիսկիղա` իրենց տանը մէջի եկեղեցիով մէկտեղ: 20Բարև կ’ընեն ձեզի բոլոր եղբայրները. բարև տուէք իրարու սուրբ համբուրով: 21Այս բարևը իմ ձեռքիս` Պօղոսին է: 22Եթէ մէկը Տէր Յիսուս Քրիստոսը չսիրեր, նզովեալ ըլլայ երբ մեր Տէրը գայ: 23Տէր Յիսուս Քրիստոսի շնորհքը ձեզի հետ. 24Իմ սէրս ձեր ամէնուն հետ ըլլայ Քրիստոս Յիսուսով: Ամէն: