Անբարոյութիւնը եկեղեցիին մէջ

1Առ հասարակ կը լսուի ձեր մէջ պոռնկութիւն ըլլալ. և այնպիսի պոռնկութիւն` որ հեթանոսներուն մէջ ալ չկայ, որպէս թէ մէկը իր հօրը կինը ունենայ: 2Ու դուք հպարտացեր էք, և ոչ մանաւանդ սուգ ըրիք, որ ձեր մէջէն վերցուի այս բանը: 3Վասն զի թէպէտ ես մարմնով հեռու եմ, բայց հոգիով ներկա եմ. ուստի հիմա որպես թէ ներկայ ըլլալով` որոշեցի, որ այս բանը ընողը, 4Երբ մեր Տէր Յիսուս Քրիստոսի անունովը մէկտեղ ժողվուիք դուք ու իմ հոգիս մեր Տէր Յիսուս Քրիստոսի զօրութիւնովը, 5Այնպիսին ëատանայի մատնէք, մարմնին կորսուելուն համար, որպէս զի հոգին փրկուի Տէր Յիսուսի օրը: 6Այդ ձեր պարծանքը աղէկ չէ. չէ՞ք գիտեր որ քիչ մը խմորը բոլոր զանգուածը կը խմորէ: 7Մաքրեցէք հին խմորը մէկդի, որպէս զի ըլլաք նոր զանգուած, ինչպէս անխմոր էք. վասն զի Քրիստոս մեր զատիկը մեզի համար զոհուեցաւ: 8Ուստի տօն կատարենք, ոչ թէ հին խմորով և ոչ թէ չարութեան ու անզգամութեան խմորովը, հապա անկեղծութեան ու ճշմարտութեան անխմոր հացովը: 9Գրեցի ձեզի թուղթին մէջ, որ պոռնիկներուն հետ չխառնուիք: 10Եւ գրածս`ոչ թէ այս աշխարհի պոռնիկներուն հետ, կամ ագահներուն հետ, կամ յափշտակողներուն հետ, կամ կռապաշտներուն հետ. ապա թէ ոչ` պէտք էր որ դուք աշխարհէ դուրս ելլէիք: 11Բայց հիմա ձեզի գրեցի չխառնուիլ, այսինքն եթէ մէկը եղբայր ըսուած` կա°մ պոռնիկ ըլլայ, կա°մ ագահ, կա°մ կռապաշտ, կա°մ նախատող, կա°մ գինով, կա°մ յափշտակող, այնպիսիին հետ հաց ալ չուտել: 12Վասն զի ի՞նչ պէտք է ինծի դուրսիններն ալ դատել. չէ՞ որ դուք ներսինները կը դատէք. 13Իսկ դուրսինները Աստուած պիտի դատէ. ուստի չարը ձեր մէջէն վերցուցէք: