Կուռքերուն զոհուած կերակուրին հարցը

1Բայց կուռքերու զոհերուն վրայով` գիտենք որ ամէնս ալ գիտութիւն ունինք. գիտութիւնը կը հպարտացնէ, բայց սէրը շինութիւն կ’ընէ: 2Եւ եթէ մէկը կը կարծէ թէ բան մը գիտէ, դեռ բնաւ բան մը չգիտեր` ինչպէս պէտք է գիտնալ: 3Իսկ եթէ մէկը զԱստուած կը սիրէ, ինք անկէ ճանչցուած է: 4Ուստի կուռքերու զոհուածները ուտելու վրայով` գիտենք որ կուռքը ոչինչ է աշխարհի մէջ, և որ մէկէն զատ ուրիշ Աստուած մը չկայ: 5Քանզի թէև ըլլան ալ անունով աստուածներ, թէ° երկինքը և թէ° երկրի վրայ, (ինչպէս կան շատ աստուածներ ու շատ տէրեր,) 6Բայց մենք մէկ Աստուած ունինք, Հայրը, որմէ են ամէն բաները, և մենք ալ անով. ու մէկ Տէր Յիսուս Քրիստոս, որմէ են ամէն բաները, ու մենք ալ անով: 7Բայց ամէնուն քով գիտութիւն չկայ. և ոմանք կուռքի վրայով խղճմտանք ունենալով` մինչև հիմա կ’ուտեն կուռքերու զոհուածի պէս, և իրենց խղճմտանքը, որովհետև տկար է, կը պղծուի: 8Սակայն կերակուրը մեզ Աստուծոյ առջև չկեցներ. քանզի ոչ եթէ ուտենք՝ կ’աւելնանք. և ոչ եթէ չուտենք` կը պակսինք: 9Բայց զգոյշ կեցէք, որ չըլլայ թէ այդ ձեր իշխանութիւնը տկարներուն գայթակղութիւն ըլլայ: 10Քանզի եթէ մէկը տեսնէ քեզ, որ գիտութիւն ունիս, կռատունի մէջ սեղան նստած, չէ՞ որ այն տկար մարդուն խղճմտանքը համարձակութիւն պիտի առնէ կուռքերու զոհուածը ուտելու, 11Եւ քու գիտութիւնովդ այն տկար եղբայրը կորսուի, որու համար Քրիստոս մեռաւ: 12Եւ այսպէս եղբայրներուն դէմ մեղանչելով` ու անոնց տկար խղճմտանքը վիրաւորելով` Քրիստոսի դէմ կը մեղանչէք: 13Ուստի եթէ կերակուրը կը գայթակղեցնէ իմ եղբայրս, միս պիտի չուտեմ յաւիտեան` որպէս զի իմ եղբայրս չգայթակղեցնեմ: