Կենաց բանը

1Կենաց Բանին վրայով որ սկիզբէն էր, որու համար լսեցինք, զոր մեր աչքերովը տեսանք, որու նայեցանք ու մեր ձեռքերը շօշափեցին․ 2(Եւ կենաքը յայտնուեցաւ, ու տեսանք և կը վկայնեք ու ձեզի կը պատմենք այն յաւիտենական կեանքը, որ Հօրը քով էր ու մեզի յայտնուեցաւ․) 3Զայն որ տեսանք ու լսեցինք, ձեզի կը պատմենք, որպէսզի դուք ալ մեզի հետ հաղորդութիւն ունենաք, և մեր հաղորդութիւնը Հօրը հետ է՝ ու իր Որդւոյն Յիսուս Քրիստոսի հետ։ 4Եւ այս բաները կը գրենք ձեզի, որպեսզի ձեր ուրախութիւնը կատարեալ ըլլայ։

Աստուած լոյս է

5Եւ ասիկա է այն պատգամը զոր իրմէ լսեցինք ու ձեզի կը պատմենք, թէ Աստուած լոյս է, ու անոր մէջ բնաւ խաւար չկայ: 6Եթէ ըսենք թէ Անոր հետ հաղորդութիւն ունինք, ու խաւարի մէջ պտըտինք, սուտ կը զրուցենք և ճշմարտութիւնը չենք ըներ։ 7Ապա եթէ լոյսի մէջ քալենք, ինչպէս անիկա լոյսի մէջ է, իրարու հետ հաղորդութիւն կ’ունենանք, ու անոր Որդւոյն Յիսուս Քրիստոսի արիւնը մեզ ամէն մեղքէ կը սրբէ։ 8Եթէ ըսենք թէ Մենք մեղք մը չունինք, ինքզինքնիս կը խաբենք, ու մեր մէջ ճշմարտութիւն չկայ։ 9Եթէ խոստովանինք մեղքերնիս, հաւատարիմ ու արդար է անիկա մեր մեղքերուն թողութիւն տալու, և մեզ բոլոր անիրաւութենէ սրբելու։ 10Եթէ ըսենք թէ Մեղք մը չգործեցինք, սուտ զրոյց կ’ընենք զանիկա, ու անոր խօսքը մեր մէջ չէ։