Քրիստոս մեր օգնականն է

1Իմ որդեակներս, այս բաները ձեզի կը գրեմ, որպէս զի մեղք չգործէք. և եթէ մէկը մեղք գործելու ըլլայ, Հօրը քով բարեխօս ունինք Յիսուս Քրիստոս արդարը: 2Եւ անիկա մեր մեղքերուն քաւութիւն է, և ոչ թէ միայն մերիններուն, հապա բոլոր աշխարհի ալ։ 3Ու ասով գիտենք թէ զանիկա ճանչցանք, եթէ անոր պատուիրանքները պահենք։ 4Ան որ կ’ըսէ թէ Ես զանիկա ճանչցայ, ու անոր պատուիրանքները չպահեր, ստախօս է, ու անոր մէջ ճշմարտութիւն չկայ։ 5Բայց ան որ անոր խօսքը կը պահէ, իրաւցընէ իր մէջ կատարեալ է Աստուծոյ սէրը. ասով կը ճանչնանք թէ անոր մէջ ենք։ 6Ան որ կ’ըսէ թէ անոր մէջ կը բնակի, այնպէս պէտք է քալէ՝ ինչպէս անիկա քալեց։

Նոր պատուիրանք

7Եղբայրներ, ոչ թէ նոր պատուիրանք մը կը գրեմ ձեզի, հապա այն հին պատուիրանքը զոր սկիզբէն ի վեր ունէիք. և հին պատուիրանքը այն խօսքն է, զոր դուք սկիզբէն լսեցիք։ 8Դարձեալ նոր պատուիրանք մը կը գրեմ ձեզի, որ ճշմարիտ է անոր մէջ ու ձեր մէջ. վասն զի խաւարը կ’անցնի ու ճշմարիտ լոյսը արդէն կ’երևնայ։ 9Ան որ կ’ըսէ թէ լոյսի մէջ է, ու իր եղբայրը կ’ատէ, անիկա տակաւին խաւարի մէջ է։ 10Ան որ իր եղբայրը կը սիրէ, լոյսի մէջ կը բնակի, ու իր մէջ գայթակղութիւն չկայ: 11Բայց ան որ իր եղբայրը կ’ատէ, խաւարի մէջ է ու խաւարի մէջ կը քալէ, ու չգիտեր թէ ո՛ւր կ’երթայ, վասն զի խաւարը անոր աչքերը կուրցուցեր է։ 12Կը գրեմ ձեզի, որդեակներ, վասն զի ձեր մեղքերը թողուած են անոր անուան համար։ 13Կը գրեմ ձեզի, հայրեր, վասն զի դուք ճանչցաք զանիկա որ սկիզբէն է։ Կը գրեմ ձեզի, երիտասարնդներ, վասն զի դուք չարին յաղթեցիք։ 14Կը գրեմ ձեզի, տղաքներ, վասն զի դուք ճանչցաք Հայրը։ Գրեցի ձեզի, հայրեր, վասն զի դուք ճանչցաք զանիկա որ սկիզբէն է։ Գրեցի ձեզի, երիտասարդներ, վասն զի դուք ուժով էք, և Աստուծոյ խօսքը ձեր մէջ կը բնակի, ու չարին յաղթեցիք։ 15Մի սիրէք աշխարհը, ոչ ալ ինչ որ աշխարհի մէջ է։ 16Եթէ մէկը աշխարհը կը սիրէ, անոր ներսիդին Հօրը սէրը չկայ. քանզի ամէն բան որ աշխարհի մէջ է, մարմնի ցանկութիւնը ու աչքերու ցանկութիւնը և այս կեանքին ամբարտաւանութիւնը, Հօրմէն չէ, հապա այս աշխարհէն է։ 17Աշխարհս ալ կ’անցնի, անոր ցանկու-թիւնն ալ, բայց ան որ Աստուծոյ կամքը կը կատարէ, յաւիտեան կը մնայ։

Քրիստոսին թշնամին

18Որդեակներ, վերջին ժամանակն է. ու ինչպէս լսեցիք թէ Նեռը պիտի գայ, և արդէն շատ նեռեր եկած են, անկէ կ’իմանանք թէ վերջին ժամանակ է։ 19Մեզմէ ելան ոմանք, բայց մեզմէ չէին. վասն զի եթէ մեզմէ ըլլային, մեզի հետ պիտի մնային. հապա մեզմե ելան, որպէս զի յայտնի ըլլան թէ անոնք ամէնը մեզմէ չէին։ 20Բայց դուք օծութիւն ունիք Սուրբէն, ու ամէն բան գիտէք։ 21Չգրեցի ձեզի՝ իբր թէ ճշմարտութիւնը չէք գիտեր, հապա թէ գիտէք զանիկա, ու նաև թէ ամէն ստութիւն ճշմարտութենէն չէ։ 22Ո՞վ է ստախօս, եթէ ոչ ան որ կ’ուրանայ թէ Յիսուս՝ Քրիստոս չէ. անիկա է Նեռը որ կ’ուրանայ Հայրը ու Որդին։ 23Ամէն ով որ կ’ուրանայ Որդին, անիկա Հայրն ալ չընդունիր. [բայց ան որ կը խոստովանի Որդին, անիկա Հայրն ալ կ’ընդունի։] 24Ուրեմն ինչ որ դուք սկիզբէն լսեցիք, թող անիկա ձեր մէջ բնակի. եթէ այն սկիզբէն լսածնիդ ձեր մէջ բնակի, դուք ալ Ոդրւոյն ու Հօրը մէջ պիտի բնակիք։ 25Եւ ասիկա է այն խոստմունքը զոր ինք մեզի խոստացաւ, այսինքն յաւիտենական կեանքը։ 26Այս բաները ձեզի գրեցի՝ ձեզ մոլորեցնողներուն համար։ 27Եւ այն օծութիւնը զոր դուք իրմէ ընդունեցիք, ձեր մէջ կը մնայ, ու պետք չէ որ մէկը ձեզի սորվեցնէ. հապա ինչպէս նոյն օծութիւնը ձեզի կը սորվեցնէ ամէն բանի վրայով, և ճշմարիտ է ու սուտ չէ, և ինչպէս անիկա ձեզի սորվեցուց, անոր մէջ կեցէք։ 28Ու հիմա, որդիակներ, անոր մէջ կեցէք, որպէս զի երբ անիկա յայտնուի, մենք համարձակութիւն ունենանք, ու անկէ չամչնանք իր գալու ատենը։ 29Եթէ գիտէք թէ անիկա արդար է, կիմանաք թէ ամէն ով որ արդարութիւն կը գործէ, անկէ ծնած է։