Մեր յաղթանակը աշխարհի վրայ

1Ամէն ով որ կը հաւատայ թէ Յիսուս՝ Քրիստոսն է, Աստուծմէ ծնած է. և ամէն ով որ ծնողը կը սիրէ՝ անկէ ծնածն ալ կը սիրէ։ 2Ասով կը ճանչնանաք թէ Ասուծոյ որդիները կը սիրենք, երբ զԱստուած սիրենք ու անոր պատուիրանքները պահենք։ 3Վասն զի ասիկա է Աստուծոյ սէրը, որ անոր պատուիրանքները պահենք, և անոր պատուիրանքները ծանր բան չեն։ 4Վասն զի այն ամէնը որ Աստուծմէ ծնած է՝ աշխարհի կը յաղթէ, և ասիկա է յաղթութիւնը որ աշխարհի կը յաղթէ, այսինքն մեր հաւատքը։ 5Ո՞վ է որ աշխարհի կը յաղթէ, եթէ ոչ անիկա որ կը հաւատայ թէ Յիսուս Որդի Աստուծոյ է։

Վկայութիւն Յիսուս Քրիսոսին

6Ասիկա է որ եկաւ ջուրով և արիւնով, այսինքն Յիսուս Քրիստոս, ոչ թէ միայն ջուրով, հապա ջուրով ու արիւնով, և Հոգին է որ կը վկայէ, վասն զի Հոգին ճշմարտութիւն է։ 7Վասն զի երեք են որ երկինքի մէջ կը վկայեն. Հայրը, Բանը ու Սուրբ Հոգին, և այս երեքը մէկ են։ 8Ու երեք են որ երկրի վրայ* կը վկայեն. Հոգին, ջուրը ու արիւնը, և երեքը միաբան են։ 9Եթէ մարդոց վկայութիւնը կ’ընդունինք, Աստուծոյ վկայութիւնը աւելի մեծ է. վասն զի ասիկա է Աստուծոյ վկայութիւնը, որ իր Որդւոյն համար վկայեց։ 10Ան որ Աստուծոյ Որդւոյն կը հաւատայ՝ վկայութիւնը իր մէջ ունի. ան որ Աստուծոյ չհաւատար՝ ստախօս կ’ընէ՝ զանիկա, վասն զի չհաւատար այն վկայութեանը՝ զոր Աստուած իր Որդւոյն համար վկայեց։ 11Եւ վկայութիւնը այս է, որ Աստուած մեզի յաւիտենական կեանք տուաւ, ու այս կեանքը անոր Որդւոյն մէջ է։ 12Ան որ Որդին ընդունած է՝ կեանք ունի, և ան որ Աստուծոյ Որդին ընդունած չէ՝ կեանք չունի։

Յաւիտենական կեանք

13Այս բաները գրեցի ձեզի՝ որպէս զի գիտնաք թէ յաւիտենական կեանք ունիք դուք՝ որ Աստուծոյ Որդւոյն անուանը կը հաւատաք։ 14Եւ այն համարձակութիւնը զոր մենք անոր քով ունինք՝ այս է, որ ինչ բան որ խնդրելու ըլլանք իր կամքին համեմատ, կը լսէ մեզի։ 15Եւ եթէ գիտնանք թէ մեզի կը լսէ ինչ որ խնդրելու ըլլանք, ուրեմն կը գիտնանք թէ կ’առնենք խնդիրքնիս զոր կը խնդրենք իրմէ։ 16Եթէ մէկը տեսնէ որ իր եղբայրը մեղք մը գործեց, ոչ թէ մահացու, թող խնդրէ, ու Աստուած անոր կեանք պիտի տայ այն մահացու չեղած մեղքը գործողին. մեղք կայ որ մահացու է, չեմ ըսեր որ անոր համար խնդրէ։ 17Ամէն անիրաւութիւն մեղք է, և մեղք կայ որ մահացու չէ։ 18Գիտենք որ այն ամէնը որ Աստուծմէ ծնած է՝ մեղք չգործեր. հապա ան որ Աստուծմէ ծնած է՝ իր անձը կը պահէ, ու չարը իրեն չդիպչիր։ 19Գիտենք որ մենք Աստուծմէ ենք, ու բոլոր աշխարհ չարին մէջ է։ 20Եւ գիտենք որ Աստուծոյ Որդին եկաւ, ու մեզի միտք տուաւ, որպէս զի ճշմարիտը ճանչնանք. և այն ճշմարիտին մէջ ենք, իր Որդւոյն Յիսուս Քրիստոսի մէջ. ասիկա է ճշմարիտ Աստուած ու յաւիտենական կեանք։ 21Որդեակներ, ինքզինքնիդ կուռքերէն պահեցէք։