1Եւ Բաասայի համար Տէրոջը խօսքը Անանիի որդւոյն Յէուի եղաւ՝ ըսելով, 2Որովհետև քեզ փոշիէն բարձրացուցի, ու քեզ իմ ժողովուրդիս Իսրայէլի վրայ իշխան դրի, և դուն Յերոբովամի ճամբան գացիր, ու իմ ժողովուրդիս Իսրայէլի մեղանչել տուիր, ու անոնց մեղքերովը զիս բարկացուցիր, 3Ահա ես Բաասան ու անոր տունը* բնաջինջ պիտի ընեմ, և քու տունդ Նաբատեան Յերոբովամի տանը պէս պիտի ընեմ: 4Բաասայէ քաղաքի մէջ մեռնողը շուները պիտի ուտեն, ու դաշտի մէջ մեռնողը երկինքի թռչունները պիտի ուտեն: 5Եւ Բաասայի մնացորդ պատմութիւնը ու անոր ըրածը ու զօրութիւնը՝ ահա Իսրայէլի թագաւորներուն յիշատակաց գիրքին մէջ գրուած են: 6Եւ Բաասա իր հայրերուն հետ քնացաւ ու Թերսայի մէջ թաղուեցաւ, և անոր տեղ անոր որդին Էլա թագաւոր եղաւ: 7Նաև Անանիի որդւոյն Յէու մարգարէին ձեռքով Տէրոջը խօսքը եղաւ Բաասայի ու անոր տանը վրայ այն ամէն չարիքներուն համար, զորոնք ինք Տէրոջը առջև ըրած էր, զանիկա իր ձեռքերուն գործովը բարկացնելով ու Յերոբովամի տանը պէս ըլլալով, նաև զանիկա մեռցնելուն համար:

Իսրայէլին Էլա թագաւորը

8Յուդայի Ասա թագաւորին քսանըվեցերորդ տարին Բաասայի որդին Էլա Թերսայի մէջ Իսրայէլի վրայ թագաւոր եղաւ, ու երկու տարի թագաւորութիւն ըրաւ: 9Անիկա երբ Թերսայի մէջ Թերսայի տանը հազարապետին Արսայի տունը խմեր ու գինովցեր էր, անոր ծառան Զամբրի, որ անոր կառքերուն կէսին վրայ իշխան էր, անոր դէմ գլուխ վերցուց. 10Եւ Զամբրի ներս մտնելով՝ զանիկա զարկաւ մեռցուց, և անոր տեղ ինք թագաւոր եղաւ՝ Յուդայի Ասա թագաւորին քսանըեօթներորդ տարին: 11Ու երբ թագաւոր եղաւ ու իր աթոռը նստաւ, իսկոյն Բաասայի բոլոր տունը, թէ՛ անոր ազգականները և թէ՛ բարեկամները, մեռցուց, ու անոր մէ՛կ այր մարդը ողջ չթողուց: 12Եւ Զամբրի Բաասայի բոլոր տունը բնաջինջ ըրաւ, Բաասայի վրայով Յէու մարգարէին ձեռքով Տէրոջը ըսած խօսքին համեմատ, 13Բաասայի բոլոր մեղքերուն համար ու անոր որդւոյն Էլայի մեղքերուն համար, որոնցմով իրենք մեղանչեցին և Իսրայէլի մեղանչել տուին, ու իրենց սնապաշտութիւններովը Իսրայէլի Տէր Աստուածը բարկացուցին: 14Ու Էլայի մնացորդ պատմութիւնը և անոր բոլոր ըրածը՝ ահա Իսրայէլի թագաւորներուն յիշատակաց գիրքին մէջ գրուած են:

Իսրայէլին Զամբրի թագաւորը

15Յուդայի Ասա թագաւորին քսանըեօթներորդ տարին Զամբրի Թերսայի մէջ եօթը օր թագաւորութիւն ըրաւ. բայց ժողովուրդը Փղշտացւոց Գաբաթոնին դէմ բանակեր էր: 16Եւ բանակին մէջ եղող ժողովուրդը լսելով որ Զամբրի գլուխ վերցուցեր է, ու նաև թագաւորը մեռցուցեր է, նոյն օրը բոլոր Իսրայէլ բանակին մէջ Ամրի զօրաւարը Իսրայէլի վրայ թագաւոր դրին: 17Եւ Ամրի ու անոր հետ բոլոր Իսրայէլ Գաբաթոնէ ելան ու Թերսան պաշարեցին: 18Ու երբ Զամբրի քաղաքին առնուիլը տեսաւ, թագաւորական տանը ներսի կողմը* մտաւ, և իր վրայ թագաւորական տունը կրակով այրեց ու մեռաւ, 19Իր գործած մեղքերուն համար, որոնցմով Տէրոջը առջև չարութիւն ըրաւ, ու քալեց Յերոբովամի ճամբուն մէջ ու անոր ըրած մեղքին մէջ, որով անիկա Իսրայէլի մեղանչել տուեր էր: 20Եւ Զամբրիի մնացորդ պատմութիւնը ու անոր ըրած դաւաճանութիւնը ահա Իսրայէլի թագաւորներուն յիշատակաց գիրքին մէջ գրուած է:

Իսրայէլին Ամրի թագաւորը

21Այն ատեն Իսրայէլի ժողովուրդը երկուքի բաժնուեցաւ. ժողովուրդին կէսը Գինաթի որդւոյն Թաբնիի ետեւէն գնաց, որպէս զի զանիկա թագաւոր դնեն. ու կէսն ալ Ամրիի ետեւէն գնաց: 22Եւ Ամրիի ետեւէն գացող ժողովուրդը Գինաթեան Թաբնիի ետեւէն գացող ժողովուրդէն զօրաւոր գտնուեցաւ. ու Թաբնի մեռաւ, և Ամրի թագաւոր եղաւ: 23Յուդայի Ասա թագաւորին երեսունըմէկերորդ տարին Ամրի Իսրայէլի վրայ թագաւոր եղաւ, ու տասուերկու տարի թագաւորութիւն ըրաւ. վեց տարի Թերսայի մէջ թագաւորութիւն ըրաւ. 24Ու Սամերէ երկու տաղանդ արծաթով Սամարիայի լեռը ծախու առաւ, ու լեռանը վրայ քաղաք շինեց, և շինած քաղաքին անունը այն լեռանը տէրոջը Սամերի անունով Սամարիա կոչեց: 25Ու Ամրի Տէրոջը առջև չարութիւն ըրաւ, և բոլոր իրմէ առաջ եղողներէն աւելի չար եղաւ. 26Քանզի անիկա Նաբատեան Յերոբովամի բոլոր ճամբուն մէջ քալեց, ու անոր մեղքին մէջ՝ որով Իսրայէլի մեղանչել տուաւ. այնպէս որ իրենց սնապաշտութիւններովը Իսրայէլի Տէր Աստուածը բարկացուցին: 27Եւ Ամրիի ըրած գործերուն մնացորդ պատմութիւնը ու անոր ըրած զօրութիւնը՝ ահա Իսրայէլի թագաւորներուն յիշատակաց գիրքին մէջ գրուած են: 28Եւ Ամրի իր հայրերուն հետ քնացաւ ու Սամարիայի մէջ թաղուեցաւ. ու անոր տեղ անոր որդին Աքաաբ թագաւոր եղաւ:

Իսրայէլին Աքաաբ թագաւորը

29Եւ Ամրիի որդին Աքաաբ Յուդայի Ասա թագաւորին երեսունըութերորդ տարին Իսրայէլի վրայ թագաւոր եղաւ. ու Ամրիի որդին Աքաաբ Իսրայէլի վրայ Սամարիայի մէջ քսանուերկու տարի թագաւորութիւն ըրաւ: 30Եւ Ամրիի որդին Աքաաբ բոլոր իրմէ առաջ եղողներէն աւելի Տէրոջը առջև չարութիւն ըրաւ: 31Ու Նաբատեան Յերոբովամի մեղքերուն մէջ քալելը անոր առջև ոչինչ բան մը սեպուելով, Սիդոնացւոց Եթբաաղ թագաւորին աղջիկը Յեզաբէլը կին առաւ, և գնաց Բահաղի ծառայութիւն ըրաւ ու անոր երկրպագութիւն ըրաւ: 32Եւ Սամարիայի մէջ՝ իր շինած Բահաղի տանը մէջ Բահաղի սեղան մը կանգնեց: 33Ու Աքաաբ Աստարովթի կուռք մը շինեց. և Աքաաբ իր ըրած գործերովը իրմէ առաջ եղող Իսրայէլի բոլոր թագաւորներէն աւելի Իսրայէլի Տէր Աստուածը բարկացուց: 34Այն օրերը Բեթելացի Յիէլ Երիքովը շինեց. ու իր անդրանիկ տղովը Աբիրոնով անոր հիմը դրաւ, և իր պզտիկ տղովը Սեգուրով անոր դռները կանգնեց՝ Նաւեան Յեսուի ձեռքով Տէրոջը ըսած խօսքին համեմատ: