Սողոմոնին պաշտօնէութիւնը

1Եւ Սողոմոն թագաւորը բոլոր Իսրայէլի վրայ թագաւոր էր: 2Ու անոր իշխանները ասոնք էին. Սադովկի որդին Ազարիա քահանայ էր. 3Սիսայի որդիները Ելիքորէփ ու Աքիա ատենադպիրներ էին. և Աքիղուդի որդին Յովսափատ յիշատակաց դպիր էր. 4Ու Յովիադայի որդին Բանեա զօրքերուն վրայ էր. և Սադովկ ու Աբիաթար քահանաներ էին. 5Ու Նաթանի որդին Ազարիա պաշարաց գործակալներուն վրայ էր. ու Նաթանի որդին Զաբուդ նախարար ու թագաւորին բարեկամն էր. 6Ու Աքիսար տանը հրամանատարն էր. ու Աբդայի որդին Ադոնիրամ հարկերուն վրայ էր: 7Եւ Սողոմոն բոլոր Իսրայէլի վրայ տասուերկու գործակալներ ունէր, ու անոնք թագաւորը ու անոր տունը կը կերակըրէին. ու կերակրելը ամէն մէկուն տարին մէկ ամիս կ՚իյնար: 8Եւ անոնց անունները ասոնք են. Եփրեմի լեռան մէջ՝ Բենովր. 9Մաքասի, Սաղաբինի, Բեթսամիւսի ու Ելօն-բեթանանի մէջ՝ Բենդակար. 10Արաբովթի մէջ՝ Բենհեսեդ, որու կը վերաբերէր Սոքով ու բոլոր Ոփերի երկիրը. 11Բոլոր Դովրի գաւառին մէջ՝ Բենաբինադաբ. Սողոմոնի աղջիկը Տափաթ ասոր կինն էր. 12Թանաքի ու Մակեդդովի մէջ, ու Յեզրայէլի տակ՝ Սարթանի քով եղող բոլոր Բեթսանի մէջ, ու Բեթսանէ մինչև Աբէլմաուլա, ու մինչև Յեկմամի անդիի կողմը՝ Աքիղուդի որդին Բաանա. 13Ռամովթ-գաղաադի մէջ՝ Բենգաբեր. Գաղաադի մէջ եղող Մանասեան Յայիրի գիւղաքաղաքները, ու Բասանի մէջ եղող Արգովրի նահանգը՝ վաթսուն մեծ պարսպաւոր ու պղնձանիգ քաղաքներ անոր կը վերաբերէին: 14Մանայիմի մէջ Ադդովի որդին Աքինադաբ. 15Նեփթաղիմի մէջ՝ Աքիմաաս. ասիկա ալ Սողոմոնի աղջիկը Բասեմաթը կին առաւ. 16Ասերի ու Բաալօթի մէջ՝ Քուսիի որդին Բաանա. 17Իսաքարի մէջ՝ Փարուայի որդին Յովսափատ. 18Բենիամինի մէջ՝ Էլայի որդին Սեմէի. 19Գաղաադի երկիրը ու Ամօրհացւոց Սեհոն թագաւորին ու Բասանի Ովգ թագաւորին երկիրը՝ Ուրիի որդին Գաբեր. ու այն երկրին մէջ միայն մէկ գործակալ կար:

Սողոմոնին բարգաւաճ իշխանութիւնը

20Յուդա ու Իսրայէլ շատուորութեան կողմանէ ծովուն եզերքը եղող աւազին չափ շատ էին. կ՚ուտէին, կը խմէին և ուրախութիւն կ՚ընէին: 21Եւ Սողոմոն Եփրատ գետէն մինչև Փղշտացւոց երկիրը ու մինչև Եգիպտոսի սահմանը՝ բոլոր թագաւորութիւններուն վրայ կ՚իշխէր. և անոր ընծաներ կը բերէին, ու Սողոմոնի ծառայութիւն կ՚ընէին՝ անոր կեանքին բոլոր օրերուն մէջ: 22Եւ Սողոմոնի մէկ օրուան ռոճիկը այս էր. երեսուն քոռ նաշիհ ու վաթսուն քոռ ալիւր, 23Տասը գէր արջառ ու քսան արօտական արջառ ու հարիւր ոչխար, բաց ի եղջերուներէն, այծեամներէն, վիթերէն ու գիրցուած թռչուններէն: 24Քանզի անիկա Գետին բոլոր ասդիի կողմի՝ Թափսայէ մինչև Գազա՝ Գետին ասդիի կողմը եղող բոլոր թագաւորներուն վրայ կ՚իշխէր. ու իր բոլորտիքը եղողներուն հետ խաղաղութիւն ունէր: 25Եւ Սողոմոնի բոլոր օրերուն մէջ՝ Յուդա ու Իսրայէլ, Դանէ մինչև Բերսաբէէ, իւրաքանչիւր մարդ իր որթին տակ ու իր թզենիին տակ ապահովութեամբ կը նստէր: 26Եւ Սողոմոն իր կառքի ձիերուն համար քառասուն հազար ախոռ ունէր, ու տասուերկու հազար ձիաւոր: 27Եւ այն գործակալները, ամէն մէկը իր ամսուն մէջ, Սողոմոն թագաւորը ու Սողոմոն թագաւորին սեղանը բոլոր մօտեցողները կը կերակրէին՝ բան մը պակաս չընելով. 28Նաև ձիերուն ու երիվարներուն համար, անոնց եղած տեղը, ամէն մէկը իր վրայ դրուած հարկին չափովը գարի ու յարդ կը բերէին: 29Եւ Աստուած Սողոմոնի իմաստութիւն ու խիստ շատ հանճար և սրտի լայնութիւն տուաւ ծովուն եզերքը եղող ավազին չափ: 30Ու Սողոմոնի իմաստութիւնը բոլոր արեւելցիներուն իմաստութենէն ու Եգիպտացւոց բոլոր իմաստութենէն աւելի էր: 31Եւ անիկա ամէն մարդոցմէ իմաստուն էր. Եզրահացի Եթանէ, ու Մաւուլի որդւոցմէն, Եմանէ, Քալքօլէ ու Դարդայէ, իմաստուն էր. ու բոլոր շրջակայ ազգերուն մէջ անուանի եղաւ: 32Եւ անիկա երեք հազար առակ խօսեցաւ, ու անոր շարադրած երգերը հազար ու հինգ էին: 33Եւ անիկա ծառերուն վրայ խօսեցաւ, Լիբանանի եղեւինէն մինչև պատի վրայ բուսնող զոպան. ու նաև անասուններուն վրայ, թռչուններուն վրայ, սողուններուն վրայ ու ձուկերուն վրայ խօսեցաւ: 34Եւ ամէն ժողովուրդներէն, ու անոր իմաստութեան համբաւը լսող երկրի բոլոր թագաւորներէն՝ Սողոմոնի իմաստութիւնը մտիկ ընելու կու գային: