1Պետրոս, Յիսուս Քրիստոսի առաքեալ, օտարականներուդ որ ցրուած էք Պոնտոսի, Գաղատիայի, Կապադովկիայի, Ասիայի ու Բիւթանիայի մէջ, ընտրուած 2Հօր Աստուծոյ կանխագիտութեանը համեմատ` Հոգիին սրբացնելովը, հնազանդութեան և Յիսուս Քրիստոսի արիւնին սրսկուելուն համար. շնորհք և խաղաղութիւն ձեր վրայ շատնայ:

Կենդանի յոյս մը

3Օրհնեալ է Աստուած ու մեր Տէր Յիսուս Քրիստոսի Հայրը, որ իր առատ ողորմութեանը համեմատ մեզ նորէն ծնաւ կենդանի յոյսի համար` Յիսուս Քրիստոսի մեռելներէն յարութիւն առնելով, 4Անեղծ ու անարատ և անթառամ ժառանգութեանը համար` որ երկինքը պահուած է ձեզի, 5Որ Աստուծոյ զորութիւնովը պահպանուած էք հաւատքով այն փրկութեանը համար` որ պատրաստուած է վերջին ժամանակը յայտնուելու. 6Որով կուրախանաք, թէև հիմա, ինչպէս հարկը կը պահանջէ, քիչ մը ատեն տրտմած էք զանազան փորձութիւններով. 7Որպէս զի ձեր հաւատքին փորձառութիւնը (որ կորստական ոսկիէն աւելի պատուական է, թէև անիկա կրակով կը փորձուի,) գտնուի գովութիւնով ու պատուով և փառքով Յիսուս Քրիստոսի յայտնուելու ատենը. 8Զոր դուք չտեսած` կը սիրէք, զոր հիմա չէք տեսներ, բայց կը հաւատաք, և ուրախ էք անպատմելի ու փառաւորեալ խընդութիւնով. 9Ձեր հաւատքին վախճանը ընդունելով, այսինքն հոգիներնուդ փըրկութիւնը, 10Որ այն փրկութեանը համար փնտռեցին ու քննեցին մարգարէները` որոնք մարգարէացան ձեզի ըլլալու շնորհքին համար. 11Ու կը քննէին թէ ե°րբ կամ ի°նչպիսի ատեն կ’իմացնէր իրենց մէջ եղած Քրիստոսի Հոգին, որ առաջ կը վկայէր Քրիստոսի չարչարուիլը, ու անկէ ետև փառաւորուիլը: 12Որոնց յայտնուեցաւ, որոնք ոչ թէ իրենց` հապա մեզի մատակարարեցին այն բաները, որոնք հիմա ձեզի պատմուեցան անոնց ձեռքով` որ աւետարանը քարոզեցին ձեզի Հոգւով Սրբով որ երկինքէն ղրկուեցաւ. որ այն բաներուն` հրեշտակները կը ցանկան ակնկառոյց նայիլ:

Կոչ մը սուրբ կեանքի

13Ուստի ձեր միտքերուն մէջքը գօտևորած` արթուն կեցած, կատարելապէս յուսացէք այն ձեր վրայ հասնելու շնորհքին, Յիսուս Քրիստոսի յայտնուելու ատենը, 14Հնազանդ զաւակներու պէս, ոչ թէ ձեր տգիտութեան ատենին առաջին ցանկութիւններովը վարուելով, 15Հապա ձեզ կանչող Սուրբին պէս դուք ալ սուրբ եղէք ձեր բոլոր վարմունքներուն մէջ. 16Վասն զի գրուած է թէ Սուրբ եղէք, քանզի ես սուրբ եմ: 17Եւ եթէ Հայր կը կոչէք զանիկա` որ առանց աչառութեան կը դատէ ամէն մէկուն գործին համեմատ, ուրեմն ձեր պանդխտութեան ժամանակը վախով անցուցէք. 18Գիտնալով որ դուք ոչ թէ ապականացու արծաթով կամ ոսկիով փրկուեցաք ձեր հայրերէն աւանդուած ունայն ճամբաներէն, 19Հապա Քրիստոսի պատուական արիւնովը` որպէս թէ անբիծ ու անարատ գառի մը. 20Որ առաջուընէ ճանչցուած էր աշխարհի սկիզբէն առաջ, ու վերջին ատենները յայտնուեցաւ ձեզի համար, 21Որուն միջոցով Աստուծոյ հաւատացիք, որ զանիկա մեռելներէն յարուց, և անոր փառաւորութիւն տուաւ. որպէս զի ձեր հաւատքը ու յոյսը Աստուծոյ վրայ ըլլայ: 22Ձեր անձերը մաքրելով Հոգիին միջոցաւ` ճշմարտութեանը հնազանդելով, եղբայրսիրութեան մէջ անկեղծ ըլլալով, սուրբ սրտով մէկըզմէկ պինդ սիրեցէք, 23Նորէն ծնած ըլլալով` ոչ թէ ապականացու սերմէն, հապա անապականացուէն Աստուծոյ կենդանի ու յաւիտենական խօսքովը: 24Վասն զի ամէն մարմին խոտի պէս է, և մարդուն բոլոր փառաւորութիւնը` խոտի ծաղիկի պէս. խոտը կը չորնայ ու անոր ծաղիկը կը թափթփի. 25Բայց Տէրոջը խօսքը յաւիտեան կը մնայ, այսինքն է այն խօսքը որ աւետարանով ձեզի քարոզուեցաւ: