Սաւուղ Ամմոնացիներուն կը յաղթէ

1Եւ Ամմոնացի Նաաս ելաւ ու Գաղաադու Յաբիսի դէմ բանակեցաւ. և Յաբիսի բոլոր բնակիչները Նաասի ըսին, Մեզի հետ դաշնակցութիւն ըրէ, ու քեզի ծառայենք: 2Բայց Ամմոնացի Նաաս անոնց ըսաւ, Ձեզի հետ այս պայմանով դաշնակցութիւն կ՚ընեմ, որ ձեր ամէնուն աջ կողմի աչքը փորեմ, ու այս բանը բոլոր Իսրայէլի վրայ նախատինք դնեմ: 3Եւ Յաբիսի ծերերը անոր ըսին, Մեզի եօթը օր ժամանակ տուր, որպէս զի Իսրայէլի բոլոր սահմանները պատգամաւորներ ղրկենք, ու եթէ մեզ ազատող չըլլայ, այն ատեն քեզի անձնատուր կ՚ըլլանք*: 4Ուստի պատգամաւորները Սաւուղի Գաբաան գացին, և ժողովուրդին ականջներուն այս խօսքերը զրուցեցին. ու բոլոր ժողովուրդը ձայներնին վերցնելով լացին: 5Եւ ահա Սաւուղ արտէն կու գար իր եզներուն ետեւէն. ու Սաւուղ ըսաւ, Ժողովուրդին ի՞նչ եղաւ որ կու լան. ու Յաբիսի բնակիչներուն խօսքերը անոր պատմեցին: 6Եւ այս խօսքերը երբ լսեց, Աստուծոյ Հոգին Սաւուղի վրայ եկաւ, ու անոր բարկութիւնը խիստ բորբոքեցաւ: 7Եւ զոյգ մը եզ առաւ, ու զանոնք կտոր կտոր ըրաւ, ու պատգամաւորներուն ձեռքով Իսրայէլի բոլոր սահմանները ղրկեց՝ ըսելով, Ով որ Սաւուղի ետեւէն ու Սամուէլի ետեւէն չգայ, անոր եզներուն այսպէս պիտի ընեն: Եւ ժողովուրդին վրայ Տէրոջը վախը ինկաւ, ու ամէնը մէկ մարդու պէս ելան: 8Եւ Սաւուղ Բեզեկի մէջ համրեց զանոնք, ու Իսրայէլի որդիները երեք հարիւր հազար, և Յուդայի մարդիկը երեսուն հազար էին: 9Ու եկող պատգամաւորներուն ըսին, Գաղաադու Յաբիսի բնակիչներուն այսպէս ըսէք. Վաղը երբ արեւը տաքնայ, ձեզի ազատութիւն պիտի ըլլայ: Ուստի երբ պատգամաւորները գացին և Յաբիսի բնակիչներուն այս բանը իմացուցին, անոնք ուրախացան: 10Ու Յաբիսի բնակիչները ըսին Ամմոնացիներուն, Վաղը ձեզի անձնատուր կ՚ըլլանք, ու ձեր աչքերուն ինչ որ հաճելի ըլլայ, զայն ըրէք մեզի: 11Եւ հետեւյալ օրը Սաւուղ ժողովուրդը երեք գունդի բաժնեց, ու առաւօտեան պահուն բանակին մէջ մտան. ու մինչև որ օրը տաքցաւ, Ամմոնացիները զարկին. և մնացածները այնպէս ցրուեցան որ անոնցմէ երկու մարդ մէկտեղ չմնաց: 12Այն ատեն ժողովուրդը Սամուէլի ըսաւ, Սաւո՞ւղ մեր վրայ թագաւոր պիտի ըլլայ՝ ըսողը ո՞վ է. այն մարդիկը տուէք որպէս զի մեռցնենք: 13Ու Սաւուղ ըսաւ, Այսօր մա՛րդ մը չմեռցուի, քանզի այսօր Տէրը Իսրայէլի համար փրկութիւն ըրաւ: 14Եւ Սամուէլ ժողովուրդին ըսաւ, Եկէք Գաղգաղա երթանք, ու հոն թագաւորութիւնը նորէն հաստատենք: 15Ուստի բոլոր ժողովուրդը Գաղգաղա գացին, ու հոն Գաղգաղայի մէջ Տէրոջը առջև Սաւուղը թագաւոր ըրին, և հոն Տէրոջը առջև խաղաղութեան զոհեր մատուցին. ու Սաւուղ և բոլոր Իսրայէլի մարդիկը հոն մեծ ուրախութիւն ըրին: