Սամուէլին հրաժեշտի պատգամը

1Եւ Սամուէլ բոլոր Իսրայէլի ըսաւ, Ահա դուք ինծի ինչ որ զրուցեցիք, ես ձեր խօսքը մտիկ ըրի, ու ձեր վրայ թագաւոր դրի: 2Եւ ահա հիմա ձեր առջեւէն թագաւորը կ՚երթայ. բայց ես ծերացայ ու մազերս ճերմկեցան. և ահա իմ որդիներս ձեզի հետ են. ու ես իմ մանկութենէս մինչև այսօր ձեր առջև քալեցի: 3Ահա ես հոս կայներ եմ. Տէրոջը առջև ու անոր օծեալին առջև ինծի համար յայտնապէս զրուցեցէք, թէ ես որո՞ւն եզը առի, ու որո՞ւն էշը առի, որո՞ւ զրկանք կամ անիրաւութիւն ըրի, ու որո՞ւն ձեռքէն կաշառք առի և անով իմ աչքերս գոցեցի. ու ես ձեզի ետ դարձնեմ: 4Եւ ըսին, Մեզի զրկանք կամ անիրաւութիւն ըրած չես, ու բնաւ մարդո՛ւ ձեռքէ բան մը առած չես: 5Եւ անիկա ըսաւ անոնց, Այսօր Տէրը ու անոր օծեալը ձեզի վկայ ըլլան, որ դուք իմ ձեռքիս մէջ բան մը չգտաք: Եւ անոնք ըսին, Վկայ ըլլան: 6Այն ատեն Սամուէլ ժողովուրդին ըսաւ, Մովսէսը ու Ահարոնը ընտրողը,և ձեր հայրերը Եգիպտոսի երկրէն հանողը Տէրն է: 7Ու հիմա առաջ եկէք, և ձեզի հետ Տէրոջը առջև քննեմ այն բոլոր արդարութիւնները զորոնք Տէրը ձեզի ու ձեր հայրերուն ըրաւ: 8Երբ Յակոբ Եգիպտոս գնաց, հոն ձեր հայրերը Տէրոջը աղաղակեցին. և Տէրը Մովսէսը ու Ահարոնը ղրկեց, որոնք ձեր հայրերը Եգիպտոսէ դուրս հանեցին, ու զանոնք այս տեղ բնակեցուցին: 9Բայց անոնք իրենց Տէր Աստուածը մոռցան. անիկա ալ զանոնք Հասորի զօրագլուխը եղող Սիսարայի ձեռքը ու Փղշտացւոց ձեռքը և Մովաբի թագաւորին ձեռքը մատնեց, ու անոնց հետ պատերազմ ըրին: 10Եւ Տէրոջը աղաղակելով՝ ըսին, Մենք մեղք գործեցինք, քանզի Տէրը թողուցինք, և Բահաղիմի ու Աստարովթի ծառայութիւն ըրինք. և հիմա մեզ մեր թշնամիներուն ձեռքէն ազատէ, ու քեզի ծառայութիւն պիտի ընենք: 11Ուստի Տէրը Յերոբաաղը, Բեդանը, Յեփթայէն ու Սամուէլը ղրկեց, և ձեր շրջակայ թշնամիներուն ձեռքէն ձեզ ազատեց, ու ապահովութեամբ բնակեցաք: 12Ու երբ տեսաք որ Ամմոնացւոց թագաւորը Նաաս ձեր վրայ կու գայ, ինծի ըսիք, Ոչ, անպատճառ մեր վրայ թագաւոր մը ըլլայ. թէպէտև ձեր թագաւորը ձեր Տէր Աստուածն էր: 13Եւ հիմա ահա այն թագաւորը զոր ընտրեցիք և ուզեցիք. ահա Տէրը ձեր վրայ թագաւոր մը դրաւ: 14Եթէ Տէրոջմէ վախնաք, ու անոր ծառայութիւն ընէք, և անոր խօսքին հնազանդ ըլլաք, ու Տէրոջը պատուիրանքին դէմ չկենաք, այն ատեն թէ՛ դուք և թէ՛ ձեր թագաւորը որ ձեր վրայ կը թագաւորէ, ձեր Տէր Աստուծոյն ետեւէն պիտի երթաք: 15Բայց եթէ Տէրոջը խօսքին հնազանդութիւն չընէք, ու Տէրոջը հրամանին դէմ կենաք, այն ատեն Տէրոջը ձեռքը ձեր վրայ ու ձեր հայրերուն վրայ պիտի ըլլայ: 16Եւ հիմա կայնեցէք ու տեսէք այն մեծ բանը՝ զոր Տէրը ձեր աչքերուն առջև պիտի ընէ: 17Այսօր ցորենի հունձքի ժամանակը չէ՞. ես Տէրոջը պիտի աղաղակեմ, և անիկա որոտում ու անձրև պիտի ղրկէ, որպէս զի հասկնաք ու տեսնէք թէ դուք Տէրոջը առջև մեծ չարութիւն ըրիք՝ ձեզի թագաւոր ուզելով: 18Այն ատեն Սամուէլ Տէրոջը աղաղակեց, ու Տէրը նոյն օրը որոտում ու անձրև տուաւ. և բոլոր ժողովուրդը Տէրոջմէն ու Սամուէլէ խիստ վախցաւ: 19Ու բոլոր ժողովուրդը Սամուէլի ըսաւ, Քու Տէր Աստուծոյդ աղօթք ըրէ քու ծառաներուդ համար որպէս զի չմեռնինք. քանզի մեր ամէն մեղքերուն վրայ այս չարութիւնն ալ աւելցուցինք որ մեզի թագաւոր ուզեցինք: 20Եւ Սամուէլ ժողովուրդին ըսաւ, Մի վախնաք. դուք թէև այս բոլոր չարութիւնը ըրիք, սակայն Տէրոջմէ մի խոտորիք, ու բոլոր սրտովնիդ Տէրոջը ծառայութիւն ըրէք. 21Եւ անկէ մի խոտորիք. քանզի ոչինչ բաներու ետեւէ գացած կ՚ըլլաք, որոնք ձեզի օգուտ մը ընելու ու ձեզ ազատելու կարող չեն, վասն զի անոնք ոչինչ են: 22Քանզի Տէրը իր մեծ անուանը համար իր ժողովուրդը չթողուր. որովհետև Տէրը ուզեց ձեզ իրեն ժողովուրդ ընել: 23Բայց ես քա՜ւ լիցի որ Տէրոջը դէմ մեղք գործեմ, ձեզի համար աղօթք ընելէ ետ կենալով. հապա ես ձեզի աղէկ ու շիտակ ճամբան պիտի սորվեցնեմ: 24Միայն թէ Տէրոջմէն վախցէք, և ճշմարտութեամբ ու բոլոր սրտովնիդ անոր ծառայութիւն ըրէք. քանզի տեսաք որ անիկա ձեզի համար ի՛նչ մեծ բաներ ըրաւ: 25Իսկ եթէ չարութիւն ընելը շարունակէք, թէ՛ դուք և թէ՛ ձեր թագաւորը պիտի կորսուիք: