Ամաղեկացիներու դէմ պատերազմ

1Եւ Սամուէլ ըսաւ Սաւուղի, Տէրը զիս իր Իսրայէլ ժողովուրդին վրայ քեզ թագաւոր օծելու ղրկեց. ու հիմա Տէրոջը խօսքերուն ձայնը մտիկ ըրէ: 2Զօրաց Տէրը այսպէս կ՚ըսէ, Միտքս բերի ինչ որ Ամաղէկ ըրաւ Իսրայէլի, անոր Եգիպտոսէ ելած ատենը՝ ճամբուն մէջ անոր դէմ դնելով: 3Հիմա գնա ու Ամաղէկը զարկ, և անոր բոլոր ունեցածը նզովուածի պէս բնաջինջ ըրէ, ու անոր չխնայես. և այր մարդէն մինչև կին մարդը ու տղայէն մինչև կաթնկերը, արջառէն մինչև ոչխարը և ուղտէն մինչև էշը մեռցնես: 4Ուստի Սաւուղ ժողովուրդը կանչեց, ու Տեղայիմի մէջ զանոնք համրեց, որոնք երկու հարիւր հազար հետեւակ զօրք էին, ու Յուդայեանք ալ տասը հազար: 5Եւ Սաւուղ մինչև Ամաղեկացւոց մէկ քաղաքը գնաց, ու հեղեղատին մէջ դարանակալ եղաւ: 6Եւ Սաւուղ Կենեցիներուն ըսաւ, Գացէք, զատուեցէք ու Ամաղեկացւոց մէջէն իջէք, չըլլայ որ ձեզ անոնց հետ մէկտեղ զարկեմ. քանզի դուք բոլոր Իսրայէլի որդիներուն ողորմութիւն ըրիք՝ անոնց Եգիպտոսէ ելած ատենը: Ուստի Կենեցիները Ամաղեկացւոց մէջէն զատուեցան: 7Եւ Սաւուղ Եւիլայէ մինչև Եգիպտոսի դիմացի Սուրը Ամաղէկը զարկաւ. 8Ու Ամաղէկի թագաւորը Ագագը ողջ բռնեց, ու բոլոր ժողովուրդը սուրի բերնով ջարդեց: 9Բայց Սաւուղ ժողովուրդին հետ Ագագը, և ոչխարներուն ու արջառներուն աղէկները ու գէրերը և գառները ու ամէն պատուական բաները խնայեցին, և չուզեցին զանոնք ջարդել, հապա բոլոր անարգ ու անպիտան անասունները ջարդեցին:

Սաւուղ կը մերժուի իբր թագաւոր

10Եւ Տէրոջը խօսքը Սամուէլի եղաւ՝ ըսելով, 11Սաւուղը թագաւոր ընելուս զղջացի. քանզի ինծմէ ետ դարձաւ, ու իմ խօսքերս չկատարեց: Եւ Սամուէլ տրտմեցաւ, ու բոլոր գիշերը Տէրոջը աղաղակեց: 12Ու Սամուէլ առաւօտուն կանուխ ելաւ, որպէս զի երթայ Սաւուղը դիմաւորէ. և Սամուէլի իմացուցին ու ըսին, Սաւուղ Կարմեղոս եկաւ, և ահա իրեն համար յաղթութեան նշան* կանգնեց, ու անկէ դառնալով անցաւ, ու Գաղգաղա իջաւ: 13Եւ Սամուէլ Սաւուղի քով գնաց. ու Սաւուղ անոր ըսաւ, Դուն Տէրոջմէն օրհնեալ ըլլաս. Տէրոջը խօսքը կատարեցի: 14Եւ Սամուէլ ըսաւ, Հապա այդ ոչխարներուն ձայնը ի՞նչ պիտի ըլլայ՝ որ իմ ականջիս կու գայ, ու արջառներուն ձայնը՝ զոր ես կը լսեմ: 15Եւ Սաւուղ ըսաւ, Զանոնք Ամաղեկացիներէն բերին. քանզի ժողովուրդը ամէնէն աղէկ ոչխարները ու արջառները ողջ թողուցին, որպէս զի զանոնք քու Տէր Աստուծոյդ զոհ մատուցանեն. սակայն միւսները ջարդեցինք: 16Այն ատեն Սամուէլ ըսաւ Սաւուղի, Կեցիր որ քեզի պատմեմ ինչ որ Տէրը այս գիշեր ինծի խօսեցաւ: Ան ալ անոր ըսաւ, Խօսէ, 17Եւ Սամուէլ ըսաւ Սաւուղի, Ահա դուն որ քու աչքերուդ պզտիկ կ՚երեւնայիր, Իսրայէլի որդւոցը ցեղերուն գլուխ եղար, ու Տէրը քեզ Իսրայէլի վրայ թագաւոր օծեց. 18Եւ Տէրը քեզ ճամբայ մը ղրկեց՝ ըսելով, Գնա, ու այն մեղաւոր Ամաղեկացիները նզովուածի պէս ջարդէ, և անոնց դէմ պատերազմ ըրէ, մինչև որ զանոնք բնաջինջ ընես. 19Իսկ դուն ինչո՞ւ համար Տէրոջը ձայնին հնազանդութիւն չըրիր, ու աւարին վրայ իյնալով՝ Տէրոջը առջև չարութիւն ըրիր: 20Եւ Սաւուղ ըսաւ Սամուէլի, Ահա ես Տէրոջը ձայնին հնազանդութիւն ըրի, ու Տէրը զիս ո՛ր ճամբան որ ղրկեց, այն ճամբան գացի, և Ամաղէկի թագաւորը Ագագը բերի, ու Ամաղէկը նզովուածի պէս բնաջինջ ըրի: 21Սակայն ժողովուրդը այն աւարէն ոչխարներ ու արջառներ առաւ, նզովուածներէն ամէնէն աղէկները՝ որպէս զի զանոնք Գաղգաղայի մէջ քու Տէր Աստուծոյդ զոհ ընեն: 22Եւ Սամուէլ ըսաւ, Միթէ Տէրոջը առջև ողջակէզները ու զոհերը Տէրոջը ձայնին հնազանդութիւն ընելու չափ հաճո՞յ են. ահա հնազանդութիւնը զոհէն, ու խօսքը մտիկ ընելը խոյերուն ճարպէն աղէկ է. 23Քանզի ապստամբութիւնը կախարդութեան մեղքին պէս, ու կամակորութիւնը կռապաշտութեան պէս* է. որովհետև դուն Տէրոջը խօսքը մերժեցիր, անիկա ալ քեզ մերժեց՝ որպէս զի թագաւոր չըլլաս: 24Եւ Սաւուղ ըսաւ Սամուէլի, Մեղք գործեցի՝ որ Տէրոջը հրամանը ու քու խօսքերդ զանց ըրի. քանզի ժողովուրդէն վախնալուս համար անոնց խօսքը մտիկ ըրի: 25Ու հիմա կ՚աղաչեմ, իմ յանցանքս ներէ, և ինծի հետ դարձիր, որպէս զի Տէրոջը երկրպագութիւն ընեմ: 26Եւ Սամուէլ ըսաւ Սաւուղի, Ես քեզի հետ չեմ դառնար. քանզի դուն Տէրոջը խօսքը մերժեցիր, Տէրն ալ քեզ մերժեց՝ որպէս զի Իսրայէլի վրայ թագաւոր չըլլաս: 27Ու Սամուէլ դարձաւ որ Սաւուղի քովէն երթայ. բայց անիկա անոր վերարկուին ծայրէն բռնեց, որ պատռեցաւ: 28Այն ատեն Սամուէլ անոր ըսաւ, Տէրը այսօր քու վրայէդ Իսրայէլի թագաւորութիւնը պատռեց, ու զանիկա քեզմէ աղէկ եղող ընկերիդ տուաւ: 29Եւ Իսրայէլի Ապաւէնը սուտ չզրուցեր ու չզղջար. քանզի անիկա մարդ չէ՝ որ զղջայ: 30Եւ Սաւուղ ըսաւ, Մեղք գործեցի. կ՚աղաչեմ, հիմա իմ ժողովուրդիս ծերերուն առջև ու Իսրայէլի առջև զիս պատուէ, և ինծի հետ դարձիր, որպէս զի քու Տէր Աստուծոյդ երկրպագութիւն ընեմ: 31Ու Սամուէլ Սաւուղի ետեւէն դարձաւ, և Սաւուղ Տէրոջը երկըրպագութիւն ըրաւ: 32Ետքը Սամուէլ ըսաւ, Ամաղէկի թագաւորը Ագագը ինծի բերէք. ու Ագագ քնքշութեամբ անոր մօտեցաւ. և Ագագ ըսաւ, Անշուշտ մահուան դառնութիւնը անցած է: 33Բայց Սամուէլ ըսաւ, Ինչպէս քու սուրդ կիները անզաւակ թողուց, նոյնպէս քու մայրդ կիներուն մէջ անզաւակ մնայ: Ու Սամուէլ Գաղգաղայի մէջ Տէրոջը առջև կտոր կտոր ըրաւ Ագագը: 34Եւ Սամուէլ Ռամա գնաց, ու Սաւուղ իր տունը՝ Սաւուղի Գաբաան ելաւ: 35Եւ Սամուէլ մինչև իր մահուան օրը մէյմըն ալ Սաւուղը չտեսաւ. բայց Սամուէլ Սաւուղի համար սուգ կ՚ընէր. և Տէրը Սաւուղը Իսրայէլի վրայ թագաւոր ընելուն զղջաց: