Դաւիթ թագաւոր կ’օծուի

1Եւ Տէրը Սամուէլի ըսաւ, Մինչև ե՞րբ Սաւուղի համար սուգ կ՚ընես. որովհետև ես զանիկա մերժեցի, որպէս զի Իսրայէլի վրայ չթագաւորէ. եղջիւրդ իւղով լեցուր. ու եկուր քեզ Բեթլէհեմացի Յեսսէի ղրկեմ. քանզի անոր որդիներէն մէկը ինծի թագաւոր ընտրեցի: 2Ու Սամուէլ ըսաւ, Ի՞նչպէս երթամ. եթէ Սաւուղ լսէ, զիս կը մեռցնէ. և Տէրը ըսաւ, Քեզի հետ երինջ մը առ, ու ըսէ թէ Տէրոջը զոհ ընելու եկայ. 3Եւ Յեսսէն զոհին հրաւիրէ. ու քու ընելու բանդ ես քեզի կը հասկցնեմ. և ինծի թագաւոր օծես այն մարդը զոր քեզի պիտի ըսեմ: 4Ու Սամուէլ Տէրոջը ըսածը ըրաւ, ու Բեթլէհէմ գնաց: Եւ քաղաքին ծերերը դողալով զանիկա դիմաւորեցին, ու ըսին, Արդեօք խաղաղութեա՞մբ եկար: 5Եւ անիկա ըսաւ, Խաղաղութեամբ. Տէրոջը զոհ ընելու եկայ. սրբուեցէք ու ինծի հետ զոհի եկէք. և Յեսսէն ու անոր որդիները սրբել տուաւ, և զանոնք զոհի հրաւիրեց: 6Ու երբ անոնք եկան, Եղիաբը տեսնելով ըսաւ, Իրաւ որ Տէրոջը օծեալը իր առջև է: 7Բայց Տէրը Սամուէլի ըսաւ, Անոր երեւութին ու հասակին երկայնութեանը մի նայիր, քանզի ես զանիկա անարգեցի. որովհետև մարդուն նայիլը չըլլար. քանզի մարդը երեւցածին կը նայի, բայց Տէրը սրտին կը նայի: 8Եւ Յեսսէ Աբինադաբը կանչեց, ու զանիկա Սամուէլի առջեւէն անցուց. և Սամուէլ ըսաւ, Տէրը ասիկա ալ չընտրեց: 9Ու Յեսսէ Սամաան անցուց. և Սամուէլ ըսաւ, Տէրը ասիկա ալ չընտրեց: 10Ու երբ Յեսսէ Սամուէլի առջեւէն իր եօթը որդիները անցուց, Սամուէլ Յեսսէի ըսաւ, Տէրը ասոնցմէ մէ՛կը չընտրեց: 11Եւ Սամուէլ Յեսսէի ըսաւ, տղաքներդ ա՞յդչափ են: Ու անիկա ըսաւ, Տակաւին ամէնէն պզտիկը մնաց, և ահա անիկա ոչխարները կ՚արածէ: Ու Սամուէլ Յեսսէի ըսաւ, Մարդ ղրկէ ու զանիկա բերել տուր. քանզի մինչև որ անիկա հոս չգայ, մենք սեղան պիտի չնստինք: 12Ուստի մարդ ղրկեց ու զանիկա բերել տուաւ. և անիկա կարմիր էր ու աղուոր աչքեր ունէր, ու դէմքն ալ գեղեցիկ էր: Այն ատեն Տէրը ըսաւ, Ելիր, ասիկա օծէ, քանզի ասիկա է: 13Եւ Սամուէլ իւղին եղջիւրը առաւ, ու զանիկա իր եղբայրներուն մէջ օծեց. ու այն օրէն ետքը Տէրոջը Հոգին Դաւիթի վրայ եկաւ. ու Սամուէլ ելաւ Ռամա գնաց:

Դավիթ Սաւուղին պալատին մէջ

14Եւ Տէրոջը Հոգին Սաւուղէ հեռացաւ. ու Տէրոջը կողմանէ չար ոգի մը անոր նեղութիւն կու տար*: 15Եւ Սաւուղի ծառաները անոր ըսին, Ահա Աստուծոյ կողմանէ չար ոգի մը քեզի նեղութիւն կու տայ. 16Մեր տէրը իր առջև եղող ծառաներուն զրուցէ որ աղէկ քնարահար մը փնտռեն, ու երբ Աստուծոյ կողմանէ այն չար ոգին քու վրադ գայ, անիկա իր ձեռքով քնարը զարնէ, ու դուն հանգստանաս*: 17Եւ Սաւուղ իր ծառաներուն ըսաւ, Հիմա ինծի աղէկ քնարահար մը գտէք, ու զանիկա ինծի բերէք: 18Եւ ծառաներէն մէկը պատասխան տուաւ ու ըսաւ, Ահա Բեթլէհեմացի Յեսսէի մէկ տղան տեսայ, որ քնար զարնելը գիտէ, ու անիկա զօրաւոր, պատերազմող, ճարտասան, ու գեղեցիկ տեսքով կտրիճ մըն է, և Տէրը անոր հետ է: 19Ու Սաւուղ Յեսսէի պատգամաւորներ ղրկեց ու ըսաւ, Ոչխարներուն քով գտնուող տղադ Դաւիթը ինծի ղրկէ: 20Եւ Յեսսէ քանի մը հաց, տիկ մը գինի, ու այծերէն ուլ մը առնելով իշու վրայ բեռնաւորեց, ու զանոնք իր տղուն Դաւիթի ձեռքով Սաւուղի ղրկեց: 21Եւ Դաւիթ Սաւուղի եկաւ, ու անոր առջև կայնեցաւ: Եւ Սաւուղ զանիկա շատ սիրեց, ու Դաւիթ անոր կապարճակիրը եղաւ: 22Եւ Սաւուղ Յեսսէի մարդ ղրկեց՝ ըսելով, Դաւիթ թող իմ առջեւս կայնի, քանզի անիկա իմ առջեւս շնորհք գտաւ: 23Ու երբ Աստուծմէ չար ոգին Սաւուղի վրայ կու գար, Դաւիթ քնարը կ՚առնէր, ու իր ձեռքով կը զարնէր. և Սաւուղ կը հանգստանար ու կը զուարճանար, և չար ոգին անոր վրայէն կ՚երթար: