Աստուծոյ խօսքը Սամուէլին

1Եւ Սամուէլ մանուկը Հեղիի առջև Տէրոջը ծառայութիւն կ՚ընէր. և այն օրերը Տէրոջը խօսքը հազուագիւտ էր ու յայտնի տեսիլք չկար: 2Ու օր մը* Հեղի իր տեղը պառկեր էր. (և անոր աչքերը սկսեր էին ծանրանալ, ու չէր կրնար տեսնել.) 3Եւ Աստուծոյ կանթեղը տակաւին մարած չէր, ու Սամուէլ Տէրոջը տաճարին մէջ կը քնանար, ուր Աստուծոյ տապանակը կար: 4Եւ Տէրը կանչեց Սամուէլը. ու անիկա Հոս եմ ըսաւ. 5Եւ Հեղիի վազելով, ըսաւ, Ահա հոս եմ. քանզի զիս կանչեցիր: Ու անիկա ըսաւ, Ես չկանչեցի. դարձիր պառկէ: Ան ալ դարձաւ պառկեցաւ: 6Եւ Տէրը մէյմըն ալ Ով Սամուէլ կանչեց. ու Սամուէլ ելաւ Հեղիի գնաց ու ըսաւ, Ահա հոս եմ. քանզի զիս կանչեցիր: Ու անիկա ըսաւ, Որդեակ իմ, ես չկանչեցի. դարձիր պառկէ: 7Եւ Սամուէլ տակաւին Տէրոջը ձայնը չէր ճանչնար, ու Տէրոջը խօսքը դեռ անոր յայտնուած չէր: 8Եւ նորէն երրորդ անգամ Տէրը կանչեց, Ով Սամուէլ. ու Սամուէլ ելաւ Հեղիի գնաց, ու ըսաւ, Ահա հոս եմ. քանզի զիս կանչեցիր: Եւ Հեղի իմացաւ որ մանուկը կանչողը Տէրն է. 9Ու Հեղի Սամուէլի ըսաւ, Գնա պառկէ, ու եթէ մէյմըն ալ քեզ կանչէ, ըսես, Ով Տէր, խօսէ, քանզի քու ծառադ մտիկ կ՚ընէ: Ու Սամուէլ գնաց իր տեղը պառկեցաւ: 10Եւ Տէրը եկաւ կայնեցաւ, ու առաջին անգամներուն պէս Սամուէլ, Սամուէլ, կանչեց. ու Սամուէլ ըսաւ, Խօսէ, Տէր, քանզի քու ծառադ մտիկ կ՚ընէ: 11Այն ատեն Տէրը Սամուէլի ըսաւ, Ահա ես Իսրայէլի մէջ այնպիսի բան մը պիտի ընեմ, որ զանիկա ամէն լսողին երկու ականջները պիտի խօսին: 12Այն օրը Հեղիի վրայ պիտի կատարեմ ամէն ինչ որ անոր տանը վրայով խօսեր եմ. պիտի սկսիմ ու պիտի լմնցընեմ: 13Եւ իրեն իմացուցեր եմ որ անոր տունը պիտի դատեմ մինչև յաւիտեան, իր գիտցած անօրէնութեանը համար. քանզի անոր որդիները իրենց վրայ անէծք կը բերեն, ու անիկա չյանդիմանեց զանոնք: 14Այս պատճառաւ Հեղիի տանը համար երդում ըրի, որ Հեղիի տանը անօրէնութեանը՝ զոհերով ու ընծաներով յաւիտեան քաւութիւն չըլլայ: 15Եւ Սամուէլ մինչև առտու պառկեցաւ, ու ետքը Տէրոջը տանը դռները բացաւ. և Սամուէլ վախցաւ այն տեսիլքը Հեղիի պատմելու: 16Բայց Հեղի Սամուէլը կանչեց ու ըսաւ, Որդեակ իմ Սամուէլ. ու անիկա ըսաւ, Ահա հոս եմ: 17Եւ անիկա ըսաւ, Քեզի ըսած խօսքը ի՞նչ է. ինծմէ մի պահեր. Աստուած քեզի այսպէս ու ասկէ աւելի ընէ, եթէ քեզի զրուցած բոլոր խօսքերէն մէկ խօսք ինծմէ պահես: 18Եւ Սամուէլ բոլոր խօսքերը անոր պատմեց, անկէ չպահեց: Ու Հեղի ըսաւ, Անիկա Տէրն է. իր աչքերուն հաճոյ երեւցածը թող ընէ: 19Եւ Սամուէլ մեծցաւ, ու Տէրը անոր հետ էր, և իր ըսած խօսքերէն մէ՛կը գետինը չձգեց: 20Ու Դանէ մինչև Բերսաբէէ բոլոր Իսրայէլ իմացաւ, որ Սամու-էլ հաստատուած է Տէրոջը մարգարէ ըլլալու: 21Եւ Տէրը Սելովի մէջ նորէն երևցաւ. քանզի Տէրը Սելովի մէջ Սամուէլի կը յայտնուէր Տէրոջը խօսքովը: Ու բոլոր Իսրայէլի մէջ Սամուէլի խօսքը կը տարածուէր: