Ուխտին տապանակին գրաւումը

1Եւ Իսրայէլ պատերազմով Փղշտացիները դիմաւորելու ելաւ, ու Աբենեզերի մէջ բանակեցաւ. ու Փղշտացիք Ափէկի մէջ բանակեցան: 2Եւ Փղշտացիք Իսրայէլի դիմաց շարուեցան. ու պատերազմը տարածուեցաւ, և Իսրայէլ յաղթուեցաւ Փղշտացւոց առջև, որոնք պատերազմի ասպարէզին մէջ չորս հազար մարդու չափ կոտրեցին: 3Ու ժողովուրդը բանակը դարձաւ. և Իսրայէլի ծերերը ըսին, Ինչո՞ւ համար Տէրը Փղշտացւոց առջև կոտրեց մեզ այսօր. Տէրոջը ուխտին տապանակը Սելովէ մեր քով առնենք, ու մեր մէջ գտնուի, ու մեզ ազատէ մեր թշնամիներուն ձեռքէն: 4Ուստի ժողովուրդը մարդիկ ղրկեց դէպ ի Սելով, և քերովբէներուն վրայ նստող զօրութեանց Տէրոջը ուխտին տապանակը անկէ վերցուցին. ու Հեղիի երկու որդիները, Ոփնի ու Փենէհէս, հոն Աստուծոյ ուխտին տապանակին հետ էին: 5Ու երբ Տէրոջը ուխտին տապա-նակը բանակին մէջ մտաւ, բոլոր Իսրայէլ մեծ ձայնով մը աղաղակեց, ու գետինը ձայն տուաւ: 6Եւ Փղշտացիք այն աղա-ղակի ձայնը լսելով՝ ըսին, Եբրայեցւոց բանակին մէջ այս բարձրաձայն աղաղակը ի՞նչ պիտի ըլլայ. ու իմացան որ Տէրոջը տապանակը բանակը եկեր է: 7Եւ Փղշտացիք վախցան, քանզի ըսին, Աստուած բանակին մէջ եկաւ. ու նաև ըսին, Վա՜յ մեզի, քանզի մինչև հիմա այսպիսի բան եղած չէ. 8Վա՜յ մեզի, այս զօրաւոր Աստուածներուն ձեռքէն ո՞վ մեզ պիտի ազատէ. ասոնք այն Աստուածներն են, որ Եգիպտոսը ամէն հարուածներով զարկին անապատին մէջ: 9Ուժովցէք ու կտրիճ եղէք, ով Փղշտացիք, չըլլայ որ Եբրայեցւոց ծառայ ըլլաք, ինչպէս անոնք ձեզի ծառայ եղան. ուստի կտրիճ եղէք և անոնց հետ պատերազմեցէք: 10Ու երբ Փղշտացիք պատերազմեցան, Իսրայէլ յաղթուեցաւ և ամէն մարդ իր վրանը փախաւ, ու շատ մեծ կոտորած եղաւ, և Իսրայէլէ երեսուն հազար հետեւակ զօրք ինկաւ. 11Նաև Աստուծոյ տապանակը առնուեցաւ. և Հեղիի երկու որդիները, Ոփնի ու Փենէհէս, մեռան:

Հեղիին մահը

12Եւ Բենիամինեան մարդ մը բանակէն վազելով՝ նոյն օրը Սելով հասաւ, ու իր լաթերը պատռեր էր, և իր գլխուն վրայ հող դրեր էր: 13Ու երբ հոն հասաւ, ահա Հեղի աթոռով մը ճամբուն վրայ նստած կը սպասէր, քանզի Աստուծոյ տապանակին համար սիրտը կը դողար: Ու երբ այն մարդը քաղաքը մտնելով՝ այս բանը պատմեց, բոլոր քաղաքը աղաղակեց: 14Եւ Հեղի այն աղաղակին ձայնը լսելով՝ ըսաւ, Այս աղմուկին ձայնը ի՞նչ պիտի ըլլայ: Ու այն մարդը շուտով վազեց եկաւ, ու եղած բաները Հեղիի պատմեց: 15Եւ Հեղի իննսունըութ տարեկան էր, ու աչքերը այնպէս տկարացած էին, որ չէր կրնար տեսնել: 16Եւ այն մարդը Հեղիի ըսաւ, Զօրքին մէջէն եկողը ես եմ, և պատերազմէն այսօր փախայ. ու անիկա ըսաւ, Որդեակ, ի՞նչ եղաւ: 17Եւ լուր բերողը պատասխան տուաւ ու ըսաւ, Իսրայէլ Փղշտացւոց առջեւէն փախաւ, ու ժողովուրդին մէջ մեծ կոտորած եղաւ, և քու երկու որդիներդ, Ոփնի ու Փենէհէս, մեռան, ու Աստուծոյ տապանակը առնուեցաւ: 18Ու երբ անիկա Աստուծոյ տապանակը յիշեց, Հեղի աթոռէն կռնակի վրայ ինկաւ դրանը քով, և վիզին ոսկորը կոտրեցաւ ու մեռաւ, քանզի ծեր ու ծանրացած մարդ մըն էր. և անիկա Իսրայէլի մէջ քառասուն տարի դատաւորութիւն ըրած էր:

Փենէհէսի կնոջ մահը

19Ու անոր հարսը, Փենէհէսի կինը, յղի ու ծնանելու մօտ ըլլալով, երբ Աստուծոյ տապանակին առնուելուն և իր կեսրայրին ու էրկանը մեռնելուն լուրը լսեց, ծունկ ծռելով ծնաւ, քանզի ցաւերը անոր վրայ կոխեցին: 20Ու երբ կը մեռնէր, քովը կայնող կիները անոր ըսին, Մի վախնար, վասն զի քու ծնածդ տղայ է. բայց անիկա պատասխան չտուաւ և ուշադրութիւն չըրաւ: 21Եւ տղուն անունը Իքաբօդ կոչեց, ըսելով, Իսրայէլէ փառքը վերցաւ. (քանզի Աստուծոյ տապանակը առնուեցաւ, և անոր կեսրայրը ու այրը մեռան.) 22Անոր համար ըսաւ, Աստուծոյ տապանակին առնուելուն համար Իսրայէլէ փառքը վերցաւ: