1Եւ Կարիաթարիմի մարդիկը գացին, ու Տէրոջը տապանակը անկէ հանեցին, և զանիկա տարին Աբինադաբի տունը որ բլուրին վրայ էր. ու անոր որդին Եղիազարը որոշեցին որպէս զի Տէրոջը տապանակին պահպանութիւնը ընէ: 2Եւ տապանակը Կարիաթարիմի մէջ դրուած օրէն ետքը շատ օրեր անցան, ու քսան տարի եղաւ և Իսրայէլի բոլոր տունը Տէրոջը ետեւէն հառաչեցին:

Սամուէլ Իսրայէլը կը կառավարէ

3Այն ատեն Սամուէլ Իսրայէլի բոլոր տանը խօսեցաւ՝ ըսելով, Եթէ դուք ձեր բոլոր սրտովը Տէրոջը դարձեր էք, ձեր մէջէն օտար աստուածները ու Աստարովթը վերցուցէք, և ձեր սիրտերը Տէրոջը պատրաստեցէք, ու միայն զանիկա պաշտեցէք. ու անիկա Փղշտացւոց ձեռքէն ձեզ պիտի ազատէ: 4Եւ Իսրայէլի որդիները Բահաղիմը ու Աստարովթը վերցուցին, ու միայն Տէրոջը ծառայութիւն ըրին: 5Եւ Սամուէլ ըսաւ, Բոլոր Իսրայէլը Մասփայի մէջ ժողվեցէք, ու ձեզի համար Տէրոջը աղօթք ընեմ: 6Եւ Մասփայի մէջ ժողվուեցան, ու ջուր քաշեցին և Տէրոջը առջև թափեցին. ու այն օրը ծոմ բռնեցին, և հոն ըսին, Տէրոջը դէմ մեղք գործեցինք: Եւ Սամուէլ Մասփայի մէջ Իսրայէլի որդիներուն դատաւորութիւն ըրաւ: 7Ու երբ Փղշտացիք լսեցին որ Իսրայէլի որդիները Մասփայի մէջ ժողվուեր են, Փղշտացւոց նախարարները Իսրայէլի դէմ ելան. ու Իսրայէլի որդիները զայս լսելով՝ Փղշտացւոց երեսէն վախցան: 8Եւ Իսրայէլի որդիները Սամուէլի ըսին, Անդադար մեր Տէր Աստուծոյն աղաղակէ մեզի համար, որպէս զի մեզ Փղշտացւոց ձեռքէն ազատէ: 9Ու Սամուէլ կաթնկեր գառնուկ մը առաւ, ու զանիկա բոլորովին ողջակէզ ըրաւ Տէրոջը. և Սամուէլ Իսրայէլի համար Տէրոջը աղաղակելով աղօթք ըրաւ ու Տէրը անոր պատասխան տուաւ: 10Ու երբ Սամուէլ ողջակէզը կը մատուցանէր, Փղշտացիք մօտեցան որպէս զի Իսրայէլի դէմ պատերազմ ընեն. և Տէրը նոյն օրը Փղշտացւոց վրայ մեծ ձայնով մը որոտաց, ու զանոնք խռովեցուց. ու Իսրայէլի առջև զարնուեցան: 11Եւ Իսրայէլի մարդիկը Մասփայէ ելլելով Փղշտացիները հալածեցին, ու մինչև Բեթքովրի տակ զանոնք կոտրեցին: 12Այն ատեն Սամուէլ քար մը առաւ, և Մասփայի ու Սենի մէջտեղ կանգնեց, ու անոր անունը Աբենեզեր կոչեց, ըսելով, Տէրը մինչև այս տեղ մեզի օգնեց: 13Եւ Փղշտացիք կորագլուխ եղան, ու մէյմըն ալ Իսրայէլի սահմանին մէջ չմտան. և Սամուէլի բոլոր օրերը Տէրոջը ձեռքը Փղշտացւոց վրայ էր: 14Ու Փղշտացիք Իսրայէլէ որչափ քաղաքներ որ առեր էին, Ակկարոնէ մինչև Գէթ, բոլորն ալ Իսրայէլի ետ տրուեցան ու Իսրայէլ անոնց սահմանները Փղշտացւոց ձեռքէն ազատեց. և Իսրայէլի ու Ամօրհացւոց մէջտեղ խաղաղութիւն կար: 15Եւ Սամուէլ իր կեանքին բոլոր օրերուն մէջ Իսրայէլը դատեց: 16Ու տարուէ տարի Բեթէլ, Գաղգաղա ու Մասփա կ՚երթար կը պտըտէր, և բոլոր այն տեղերը Իսրայէլը կը դատէր: 17Ու անկէ Ռամա կը դառնար, քանզի իր տունը հոն էր. և հոն կը դատէր Իսրայէլը, ու հոն Տէրոջը սեղան շինեց: