Պօղոսին գործը Թեսաղոնիկէի մէջ

1Քանզի, եղբայրներ, դուք ինքնիրեննիդ գիտէք ձեր մէջ մտնելնիս` որ պարապ տեղ չեղաւ. 2Հապա առաջ Փիլիպպէի մէջ չարչարանք կրելով ու անարգուելով, ինչպէս գիտէք, համարձակութիւն ըրինք մեր Աստուծովը ձեզի պատմել Աստուծոյ աւետարանը մեծ հակառակութեան մէջ: 3Վասն զի մեր յորդորանքը ոչ մոլորութենէ է ու ոչ պղծութենէ և ոչ խաբեութեամբ. 4Հապա ինչպէս մենք Աստուծմէ ընտրուեցանք ու աւետարանը մեզի հաւտացուեցաւ, այնպէս կը խօսինք, ոչ թէ մարդոց հաճոյ ըլլալու համար, հապա Աստուծոյ` որ մեր սիրտերը կը քննէ. 5Վասն զի մենք բնաւ շողոքորթութեան խօսքեր չգործածեցինք, ինչպէս գիտէք, ոչ ալ ագահութեան պատճառանք, Աստուած վկայ է, 6Եւ մարդոցմէ փառք չփնտռեցինք, ոչ ձեզմէ` ոչ ալ ուրիշներէն, 7Թէև կրնայինք իբրև Քրիստոսի առաքեալներ ծանրութիւն տալ. բայց մենք հեզ եղանք ձեր մէջ, ինչպէս դայեակ մը իր երախաները կը խնամէ: 8Նոյնպէս ալ մենք ձեր վրայ փափաք ունենալով` կը յօժարէինք, ոչ միայն Աստուծոյ աւետարանը ձեզի տալ, հապա մեր անձերն ալ. վասն զի դուք մեզի սիրելիներ եղաք: 9Քանզի կը յիշէք, եղբայրներ, մեր աշխատութիւնը ու ջանքը, որ ձեզմէ մէկո°ւն ծանրութիւն չտալու համար գիշեր ու ցորեկ գործելով` ձեզի Աստուծոյ աւետարանը քարոզեցինք: 10Դուք վկայ էք, և Աստուած ալ` թէ ի°նչպէս սրբութիւնով ու արդարութիւնով և անարատութիւնով վարուեցանք ձեզի հետ` որ հաւատացիք. 11Ինչպէս գիտէք ալ, որ ձեզմէ ամէն մէկը, ինչպէս հայր մը իր որդիները` 12Այնպէս կը յորդորէինք ու կը մխիթարէինք և վկայութիւն կը դնէինք, որպէս զի դուք Աստուծոյ վայլածին պէս քալէք, որ ձեզ իր թագաւորութեանը ու փառքին կանչեց: 13Ասոր համար մենք ալ անդադար կը գոհանանք Աստուծմէ, որ մեզմէ Աստուծոյ խօսքը լսելով ընդունեցիք, ոչ թէ իբրև մարդոց խօսք, հապա, ինչպէս ճշմարտապէս է, Աստուծոյ խօսք, որ նաև կը ներգործէ ձեր մէջ որ կը հաւատաք: 14Քանզի դուք, եղբայրներ, նմանող եղաք Աստուծոյ եկեղեցիներուն, որոնք Հրէաստանի մէջ են Քրիստոս Յիսուսով. վասն զի դուք ալ նոյն չարչարանքները կրեցիք ձեր համազգիներէն, ինչպէս անոնք ալ` Հրեաներէն 15Որոնք Տէր Յիսուսն ալ մեռցուցին` մարգարէներն ալ, և մեզ հալածեցին, ու Աստուծոյ անհաճոյ` և բոլոր մարդոց հակառակ են. 16Ու մեզ կ’արգիլեն հեթանոսներուն խօսելէ անոնց փրկութեանը համար, որպէս զի իրենց մեղքերուն չափը լեցնեն ամէն ատեն. և բարկութիւնը անոնց վրայ հասեր է մինչև վերջը:

Պօղոս կրկին այցելել կը փափաքի

17Իսկ մենք, եղբայրներ, իրաւ քիչ մը ատեն ձեզմէ որբ մնացինք երեսով ու ոչ թէ սրտով, բայց աւելի ջանացինք ձեր երեսը տեսնել մեծ փափաքով: 18Անոր համար ես Պօղոս մէկ երկու անգամ ուզեցի ձեզի գալ, բայց սատանայ մեզ արգիլեց: 19Քանզի ո՞վ է մեր յոյսը կամ ուրախութիւնը կամ մեր պարծանքին պսակը, եթէ ոչ դուք` մեր Տէր Յիսուս Քրիստոսի առջև անոր գալու ատենը: 20Որովհետև դուք էք մեր փառքը և ուրախութիւնը: