1Ուստի ա°լ չկրնալով աւելի համբերել, աղէկ երևցաւ մեզի մինակ Աթէնք մնալ. 2Եւ Տիմոթէոս մեր եղբայրը ու Աստուծոյ պաշտօնեան և մեր գործակիցը Քրիստոսի աւետարանին մէջ, ղրկեցինք ձեզ հաստատելու ու մխիթարելու ձեր հաւատքին համար. 3Որպէս զի այս նեղութիւններուն մէջ ձեզմե մէ°կը չխախտի. վասն զի դուք ինքնիրեննիդ գիտէք որ մենք այդ բաներուն համար կեցեր ենք: 4Քանզի երբ մենք ձեր քով էինք, առաջուընէ ձեզի կը զրուցէինք թէ նեղութիւններու պիտի հանդիպինք, ինչպէս եղաւ ալ, ու գիտէք: 5Ասոր համար ես ալ չկրնալով աւելի համբերել, մարդ ղրկեցի ձեր հաւատքը գիտնալու, որ չըլլայ թէ փորձողը ձեզ փորձած ըլլայ, և մեր աշխատութիւնը պարապ ըլլայ: 6Բայց հիմա երբ Տիմոթէոս ձեզմէ մեզի եկաւ, ու ձեր հաւատքին և սիրոյն աւետիսը մեզի տուաւ, որ ամէն ժամանակ մեր բարի յիշատակը միտքերնիդ ունիք, և կը փափաքիք մեզ տեսնել, ինչպէս մենք ալ ձեզ, 7Ասոր համար, եղբայրներ, ձեր վրայ մխիթարուեցանք մեր բոլոր վիշտերուն ու նեղութիւններուն վրայ ձեր հաւատքովը. 8Վասն զի կենդանի ենք մենք, եթէ դուք հաստատուն կենաք Տէրոջմով. 9Քանզի ի՞նչ գոհութիւն կրնանք մատուցանել Աստուծոյ ձեր վրայով, այն ամէն ուրախութեանը համար զոր կ’ուրախանանք ձեզի համար մեր Աստուծոյն առջև, 10Եւ գիշեր ու ցորեկ խիստ շատ աղաչանք կ’ընենք ձեր երեսը տեսնելու, ու ձեր հաւատքին պակսութիւնները լեցնելու: 11Բայց Աստուած ինք ու մեր Հայրը և մեր Տէրը Յիսուս Քրիստոս մեր ճամբան դէպ ի ձեզ յաջողէ: 12Եւ Տէրը աճեցնէ ու աւելցնէ ձեր սէրը իրարու վրայ ու ամէնուն վրայ, ինչպէս մենք ալ ձեր վրայ ունինք, 13Հաստատելով ձեր սիրտերը անարատ, սրբութեան մէջ Աստուծոյ և մեր Հօրը առջև, մեր Տէրոջը Յիսուս Քրիստոսի գալու ատենը իր բոլոր սուրբերուն հետ մէկտեղ: