Աստուծոյ հաճելի կեանք մը

1Ալ հիմա, եղբայրներ, ձեզի կ’աղաչենք ու կը յորդորենք Տէր Յիսուսով, որ ինչպէս մեզմէ առիք` թէ ի°նչպէս պէտք է ձեզի քալել ու Աստուծոյ հաճոյ ըլլալ, ալ աւելի անոր մէջ շատնաք: 2Քանզի գիտէք թէ ի°նչ պատուէրներ տուինք ձեզի Տէր Յիսուսով: 3Վասն զի Աստուծոյ կամքը այս է, այսինքն ձեր սուրբ ըլլալը, որ դուք ետ կենաք պոռնկութենէ. 4Ձեզմէ ամէն մէկը գիտնայ իր ամանը սրբութիւնով ու պատուով ստանալ. 5Ոչ թէ ցանկութեան կիրքով` ինչպէս հեթանոսները, որոնք զԱստուած չեն ճանչնար: 6Չըլլայ որ այդ բանին* մէջ չափէ անցնի մէկը ու իր եղբայրը զրկէ, վասն զի Տէրը այդ բոլոր բաներուն համար վրեժխնդիր է. ինչպէս առաջուընէ ըսինք ձեզի ու վկայութիւն տուինք: 7Վասն զի Աստուած մեզ պղծութեան չկանչեց, հապա սրբութեան: 8Ուստի ան որ կ’անարգէ` ոչ թէ մարդ մը կ’անարգէ, հապա զԱստուած` որ իր Սուրբ Հոգին ալ մեզի տուաւ: 9Բայց եղբայրասիրութեան վրայով պէտք չէ ձեզի բան գրել, վասն զի դուք ինքնիրեննիդ Աստուծմէ սորված էք մէկզմէկ սիրել. 10Եւ իրաւ այդ բանը կ’ընէք դուք բոլոր Մակեդոնիայի մէջ եղող ամէն եղբայրներուն. սակայն կ’աղաչենք ձեզի, եղբայրներ, որ ա°լ աւելի առատանաք. 11Եւ ջանք ընէք որ հանդարտ կենաք, ու ամէն մէկդ իր գործը գործէ, ու ձեր ձեռքերովը աշխատիք, (ինչպէս ձեզի պատուիրեցինք,) որպէս զի դուրսիններուն հետ պարկեշտութեամբ վարուիք, ու բանի մը* կարօտ չըլլաք: 12Չենք ուզեր, եղբայրներ, որ տգէտ ըլլաք ննջեցեալներուն վրայով, որպէս զի չտրտմիք ինչպէս ուրիշները` որոնք յոյս չունին:

Տէրոջը գալուստը

13Քանզի եթէ կը հաւատանք թէ Յիսուս մեռաւ ու յարութիւն առաւ, նոյնպէս ալ Աստուած ննջեցեալները Յիսուսով պիտի բերէ անոր հետ: 14Վասն զի զայս կը զրուցենք ձեզի Տէրոջը խօսքովը, թէ մենք որ մինչև Տէրոջը գալուստը ողջ կը մնանք, բնաւ ննջեցեալներէն առաջ պիտի չանցնինք: 15Վասն զի Տէրը ինք ազդարարութեան հրամանով, հրեշտակապետին ձայնովը ու Աստուծոյ փողովը երկինքէն պիտի իջնէ, և Քրիստոսով մեռածները առաջ յարութիւն պիտի առնեն: 16Ետքը մենք ալ որ ողջ մնացած ենք` անոնցմով մէկտեղ պիտի յափշտակուինք ամպերով Տէրոջը առջև ելլելու օդին մէջ, և այնպէս յաւիտեան Տէրոջը հետ պիտի ըլլանք: 17Ուստի մէկզմէկ մխիթարեցէք այս խօսքերով: