Սուտ վարդապետներ

1Բայց Հոգին յայտնի կ’ըսէ թէ վերջին ատենները մէկ քանիները հաւատքէն պիտի ապստամբին, և մոլորեցուցիչ ոգիներու ու դևերու ուսմունքներու ուշադրութիւն պիտի տան, 2Ստախօսներուն կեղծաւորութիւնովը, որոնց խղճմտանքը խանձուած է. 3Որոնք ամուսնանալէ պիտի արգիլեն, ու ետ պիտի պահեն կերակուրներէն` զորոնք Աստուած ստեղծեր է որպէս զի հաւատացեալները և ճշմարտութիւնը ճանչցողները գոհութեամբ վայելեն: 4Վասն զի Աստուծոյ ամէն ստեղծածը բարի է, ու մերժելու բան մը չկայ, եթէ գոհութեամբ ընդունուի. 5Քանզի Աստուծոյ խօսքովը ու աղօթքով կը սրբուի: 6Այս բաները եղբայրներուն յիշեցնելով` Յիսուս Քրիստոսի բարի պաշտօնեայ մը պիտի ըլլաս, ու պիտի սնանիս հաւատքին խօսքերովը և այն բարի վարդապետութիւնովը` որու հետևող եղար: 7Բայց պիղծ ու պառաւական առասպելներէն ետ կեցիր, և քու անձդ աստուածպաշտութեան վարժեցուր. 8Վասն զի մարմինին վարժութիւնը քիչ բանի օգտակար է, բայց աստուածպաշտութիւնը ամէն բանի օգտակար է, որ թէ° ներկայ և թէ° ապառնի կեանքին խոստմունքը ունի: 9Այս խօսքը հաւատարիմ է և բոլորովին ընդունուելու արժանի: 10Վասն զի բուն ասոր համար կ’աշխատինք ու նախատինք կը կրենք, քանզի կենդանի Աստուծոյ յուսացեր ենք, որ ամէն մարդոց Փրկիչն է, մանաւանդ հաւատացեալներուն: 11Այս բաները պատուիրէ ու սորվեցուր: 12Չըլլայ որ մէկը քու մանկութիւնդ անարգէ, հապա դուն օրինակ եղիր հաւատացեալներուն` խօսքով, վարմունքով, սիրով, հաւատքով և մաքրութեամբ: 13Մինչև ես գամ` միտք դիր կարդալու, յորդորելու, սորվեցնելու: 14Անհոգ մի ըլլար քու վրադ եղած պարգևին վրայով, որ մարգարէութեամբ քեզի տրուեցաւ` երէցներուն ձեռքերը քու վրադ դրուելովը: 15Ատոնց վրայ խորհէ ու ատոնց մէջ պարապէ, որպէս զի քու յառաջադիմութիւնդ ամէնուն յայտնի ըլլայ: 16Զգուշացիր քու անձիդ ու վարդապետութեանը, ու միշտ ատոնց մէջ կեցիր. քանզի այդպէս ընելով` քեզ ալ պիտի ապրեցնես, ու զանոնք ալ որոնք քեզի մտիկ կ’ընեն: