Սեմայիային մարգարէութիւնը

1Եւ Ռոբովամ Երուսաղէմ եկաւ, ու Յուդայի և Բենիամինի տունէն հարիւր ութսուն հազար ընտիր պատերազմողներ ժողվեց, որպէս զի Իսրայէլի հետ պատերազմ ընեն, ու թագաւորութիւնը Ռոբովամի դարձնեն: 2Բայց Աստուծոյ մարդուն Սեմայիայի Տէրոջը խօսքը եղաւ՝ ըսելով, 3Սողոմոնի որդւոյն, Յուդայի Ռոբովամ թագաւորին, ու Յուդայի ու Բենիամինի մէջ եղող բոլոր Իսրայելացիներուն խօսիս ու ըսես, 4Տէրը այսպէս կ’ըսէ. Մի ելլէք ու ձեր եղբայրներուն հետ մի պատերազմիք. ամէն մարդ թող իր տունը դառնայ, վասն զի այս բանը ինծմէ եղաւ: Եւ Տէրոջը խօսքը մտիկ ըրին, ու Յերոբովամի վրայ երթալէն ետ կեցան:

Ռոբովամ քաղաքները կը զօրացնէ

5Եւ Ռոբովամ Երուսաղէմ բնակեցաւ, ու Յուդայի մէջ պարսպաւոր քաղաքներ շինեց: 6Բեթլէհէմը, Ետամը, Թեկուէն, 7Բեթսուրը, Սոքովը, Ոդողոմը, 8Գէթը, Մարեսան, Զիփը, 9Ադորայիմը, Լաքիսը, Ազեկան: 10Սարաան, Այեղոնը ու Քեբրոնը շինեց, որոնք Յուդայի ու Բենիամինի մէջ պարսպաւոր քաղաքներ էին: 11Եւ պարիսպները ամրացուց, ու անոնց մէջ զօրապետներ, և կերակուրի ու իւղի և գինիի շտեմարաններ, 12Ու ամէն մէկ քաղաքին մէջ վահաններ ու նիզակներ դրաւ. և զանոնք խիստ շատ ամրացուց, ու Յուդա և Բենիամին անոր հպատակ էին:

Քահանաներ և ղեւտացիներ Յուդա կու գան

13Եւ բոլոր Իսրայէլի մէջ եղող քահանաները ու Ղևտացիները իրենց բոլոր սահմաններէն անոր քով ժողվուեցան. 14(Քանզի Ղևտացիք իրենց արուարձանները ու կալուածքները թողուցին, և Յուդայի երկիրը ու Երուսաղէմ գացին. վասն զի Յերոբովամ ու անոր որդիները զանոնք Տէրոջը քահանայութենէն մերժեցին. 15Եւ անիկա բարձր տեղերուն համար ու դևերու համար ու իր շինած որթերուն համար իրեն քուրմեր դրաւ:) 16Եւ անոնց ետևէն՝ Իսրայէլի բոլոր ցեղերէն Իսրայէլի Տէր Աստուածը սրտանց փնտռողները* իրենց հայրերուն Տէր Աստուծոյն զոհ ընելու համար Երուսաղէմ կ’երթային: 17Ու Յուդայի թագաւորութիւնը զօրացուցին, և Սողոմոնի որդին Ռոբովամը երեք տարուան մէջ ուժովցուցին. քանզի երեք տարի Դաւիթի ու Սողոմոնի ճամբովը քալեցին:

Ռոբովամին ընտանիքը

18Եւ Ռոբովամ Դաւիթի որդւոյն Յերիմովթի աղջիկը, Մայէլէթը, իրեն կին առաւ. նաև Յեսսէի որդւոյն Եղիաբի աղջիկը Աբիքէլը. 19Ու անիկա որդիներ ծնաւ անոր, Յեուսը, Սամարիան ու Զաամը: 20Եւ անկէ ետքը Աբիսողոմի աղջիկը Մաաքան առաւ, որ անոր ծնաւ Աբիան, Եթթին, Զիզան ու Սաղօմիթը: 21Եւ Ռոբովամ Աբիսողոմի աղջիկը Մաաքան իր բոլոր կիներէն ու հարճերէն աւելի կը սիրէր. (վասն զի անիկա տասնըութ կին ու վաթսուն հարճ առեր էր. և քսանըութ տղայ ու վաթսուն աղջիկ ծնաւ.) 22Եւ Ռոբովամ՝ Մաաքայի որդին Աբիան գլուխ դրաւ, այսինքն իր եղբայրներուն վրայ իշխան. քանզի զանիկա թագաւոր ընելու միտք ունէր: 23Ու խելացութիւն ընելով, իր բոլոր տղաքները բոլոր Յուդայի ու Բենիամինի գաւառներուն մէջ, բոլոր պարսպաւոր քաղաքներուն մէջ տեղաւորեց. և անոնց առատ ապրուստ կու տար. ու շատ կիներ փնտռեց: