Ասային բարեկարգութիւնները

1Ու Ովդեդի որդւոյն Ազարիայի վրայ Աստուծոյ Հոգին եկաւ. 2Եւ Ասայի առջև ելլելով՝ ըսաւ անոր, Ով Ասա ու բոլոր Յուդա ու Բենիամին, ինծի մտիկ ըրէք. Տէրը ձեզի հետ կ’ըլլայ, քանի որ դուք անոր հետ էք. ու եթէ զանիկա փնտռէք, զանիկա կը գտնէք. բայց եթէ զանիկա թողուք, անիկա ալ ձեզ պիտի թողու: 3Եւ Իսրայէլ երկար ժամանակ առանց ճշմարիտ Աստուծոյ, առանց սորվեցնող քահանայի, ու առանց օրէնքի մնացեր էր. 4Բայց իրենց նեղութեանը մէջ Իսրայէլի Տէր Աստուծոյն դարձան, ու զանիկա փնտռելով գտան: 5Եւ այն ատենները ելլողին ու մտնողին ապահովութիւն չկար. քանզի երկիրներուն բոլոր բնակիչներուն մէջ շատ խռովութիւններ կային. 6Եւ ազգ ազգի հետ ու քաղաք քաղաքի հետ կը զարնուէր. վասն զի Աստուած ամէն նեղութիւններով զարհուրեցուց զանոնք: 7Եւ հիմա դուք զօրացէք, ու ձեռքերնիդ չթուլնայ. վասն զի ձեր գործին վարձքը կայ: 8Եւ Ասա այս խօսքերը ու Ովդեդ մարգարէին մարգարէութիւնը լսելով՝ զօրացաւ, և Յուդայի ու Բենիամինի բոլոր երկրէն, ու Եփրեմի լեռնէն իր առած քաղաքներէն պղծութիւնները վերցուց, ու Տէրոջը տաճարին սրահին առջև եղող Տէրոջը սեղանը նորոգեց. 9Եւ բոլոր Յուդան ու Բենիամինը, ու Եփրեմէ և Մանասէէ ու Շմաւոնէ անոնց քով գտնուած պանդուխտները ժողվեց. քանզի Իսրայէլէ շատ մարդիկ անոր կողմը անցան, տեսնելով որ անոր Տէր Աստուածը անոր հետ է: 10Եւ անոնք Ասայի թագաւորութեանը տասնըհինգերորդ տարւոյն երրորդ ամիսը Երուսաղէմի մէջ ժողվուեցան. 11Ու այն օրը իրենց բերած աւարէն Տէրոջը զոհ ըրին, եօթը հարիւր արջառ ու եօթը հազար ոչխար. 12Եւ ուխտ ըրին որ իրենց հայրերուն Տէր Աստուածը բոլոր սրտով ու բոլոր հոգիով խնդրեն. 13Եւ ով որ Իսրայէլի Տէր Աստուածը չփնտռէ, թէ՛ պզտիկ և թէ՛ մեծ, թէ՛ այր մարդ և թէ՛ կին ըլլայ՝ մեռցուի: 14Ու մեծ ձայնով և ցնծութեան աղաղակով ու փողերով ու շեփորներով Տէրոջը երդում ըրին: 15Եւ բոլոր Յուդա այն երդումին վրայ ուրախացաւ. քանզի իրենց բոլոր սրտովը երդում ըրին, ու իրենց բոլոր կամքովը խնդրելով՝ գտան զանիկա. ու Տէրը ամէն կողմանէ հանգստացուց զանոնք: 16Եւ Ասա թագաւորը իր մայրը Մաաքան ալ տիկնութենէ հանեց, վասն զի անիկա Աստարովթի կուռք շիներ էր. իսկ Ասա անոր կուռքը կոտրեց ու փշրեց, ու Կեդրոն հեղեղատին մէջ այրեց: 17Բայց բարձր տեղերը Իսրայէլէ չվերցան. սակայն Ասայի սիրտը իր կեանքին բոլոր օրերուն մէջ ուղիղ էր: 18Եւ իր հօրը նուիրած ու իր նուիրած բաները, արծաթը ու ոսկին ու անօթները, Աստուծոյ տունը տարաւ: 19Ու մինչև Ասայի թագաւորութեան երեսունըհինգերորդ տարին պատերազմ չեղաւ: ԳԼՈՒԽ ԺԶ -16