Գոթողիայի դէմ ապստամբութիւն

1Ու եօթներորդ տարին Յովիադա ուժովցաւ, դաշնադրութեամբ իրեն հետ առնելով հարիւրապետները, Յերոամի որդին Ազարիան, և Յօհանանի որդին Իսմայէլը, ու Ովբէդի որդին Ազարիան, և Ադայիայի որդին Մաասիան, ու Զեքրիի որդին Եղիսափատը։ 2Եւ անոնք Յուդայի մէջ պտըտեցան, ու Յուդայի ամէն քաղաքներէն Ղևտացիները ու Իսրայէլի տոհմերուն իշխանները ժողվեցին, ու Երուսաղէմ եկան։ 3Եւ բոլոր ժողովքը Աստուծոյ տանը մէջ թագաւորին հետ դաշնակցութիւն ըրին. ու Յովիադա անոնց ըսաւ, Ահա թագաւորին որդին թագաւոր պիտի ըլլայ, ինչպէս Տէրը Դաւիթի որդիներուն համար ըսաւ։ 4Ձեր ընելու բանը այս է. ձեր երրորդ մասը, թէ՛ քահանաներէն և թէ՛ Ղևտացիներէն, շաբաթ օրը մտնողները, դռներուն պահպանութիւնը ընեն. 5Ու ձեր երրորդ մասը թագաւորին տունը, ու երրորդ մասը հիման դուռը ըլլան. բայց բոլոր ժողովուրդը Տէրոջը տանը գաւիթներուն մէջ կայնի: 6Իսկ Տէրոջը տունը՝ քահանաներէն ու ծառայութիւն ընող Ղևտացիներէն զատ ուրիշ մարդ չմտնէ, անոնք թող մտնեն, քանզի անոնք սուրբ են. և բոլոր ժողովուրդը Տէրոջը պահպանութիւնը պահեն. 7Ու Ղևտացիք ամէն մարդ իր զէնքը ձեռքը բռնած՝ թագաւորին բոլորտիքը կայնին, ու տունը մտնողը մեռցուի. և թագաւորին հետ ըլլաք անոր մտած ու ելած ատենը։ 8Ու Ղևտացիք ու բոլոր Յուդա Յովիադա քահանային բոլոր պատուիրածին պէս ըրին. և ամէն մէկը իր մարդիկը առաւ. թէ՛ շաբաթ օրը մտնողները և թէ՛ շաբաթ օրը ելլողները, քանզի Յովիադա քահանան դասակարգութիւնները չարձակեց։ 9Եւ Յովիադա քահանան Դաւիթ թագաւորին նիզակները, ասպարները ու վահանները, որոնք Աստուծոյ տանը մէջ էին, հարիւրապետներուն տուաւ. 10Եւ բոլոր ժողովուրդը, ամէն մարդ իր զէնքը ձեռքը, տանը աջ կողմէն մինչև ձախ կողմը, սեղանին ու տանը քով թագաւորին բոլորտիքը կայնեցուց։ 11Եւ թագաւորին որդին հանեցին, ու անոր վրայ դրին թագը ու վկայութիւնը, ու զանիկա թագաւոր ըրին. և Յովիադա ու անոր որդիները զանիկա օծեցին, ու ըսին, Կեցցէ արքայ։ 12Իսկ Գոթողիա, լսելով ժողովուրդին ձայնը որոնք կը վազէին ու թագաւորը կ’օրհնէին, Տէրոջը տունը ժողովուրդին եկաւ. 13Ու տեսաւ որ ահա թագաւորը իր սիւնին քով սրահին մուտքը կայներ էր, և զօրապետները ու փողերը թագաւորին քով էին, ու երկրին բոլոր ժողովուրդը ուրախանալով՝ փողեր կը հնչեցնէին ու երգեցողները երգի նուագարաններով ու երաժշտապետները օրհնութիւններ կ’երգէին. այն ատեն Գոթողիա իր հանդերձները պատռեց, ու ըսաւ, Դաւաճանութիւ՛ն է, դաւաճանութի՜ւն։ 14Եւ Յովիադա քահանան զօրքին վրայ եղող հարիւրապետները հանեց, ու անոնց ըսաւ, Ասիկա կարգերուն մէջէն հանեցէք, ու ասոր ետևէն գացողը սրով մեռցուի. (քանզի քահանան ըսեր էր, Զանիկա Տէրոջը տանը մէջ մի մեռցնէք): 15Եւ անոր վրայ՝ ձեռքերնին երկնցուցին ու երբ անիկա թագաւորական տանը ձիերու դռնէն ներս կը մտնէր, զանիկա հոն մեռցուցին:

Յովիադային բարեկարգութիւնը

16Եւ Յովիադա իրեն ու բոլոր ժողովուրդին ու թագաւորին մէջտեղ դաշնակցութիւն ըրաւ, որպէս զի Տէրոջը ժողովուրդը ըլլան: 17Եւ բոլոր ժողովուրդը Բահաղի տունը մտան, ու զանիկա կործանեցին, և անոր սեղանները ու կուռքերը կտոր կտոր ըրին, ու Բահաղի քուրմը, Մատթանը, սեղաններուն առջև սպաննեցին: 18Եւ Յովիադա Ղևտացի քահանաներուն ձեռքով Դաւիթի Տէրոջը տանը վրայ որոշած Տէրոջը տանը պաշտօնեաները դրաւ, որպէս զի Մովսէսի օրէնքին մէջ գրուածին պէս՝ Տէրոջը ողջակէզներ մատուցանեն ուրախութեամբ ու երգով, ինչպէս Դաւիթ սահմաներ էր: 19Եւ դռնապանները Տէրոջը տանը դռները կայնեցուց, որպէս զի ինչևիցէ կերպով անմաքուր եղող մարդ մը չմտնէ: 20Ու անիկա հարիւրապետները ու ազնուականները և ժողովուրդին իշխանները ու երկրին բոլոր ժողովուրդը առաւ, ու թագաւորը Տէրոջը տունէն իջեցուց. և բարձր դռնէն թագաւորին տունը մտան, ու թագաւորը նստեցուցին թագաւորութեան աթոռին վրայ: 21Ու երկրին բոլոր ժողովուրդը ուրախացաւ, և քաղաքը հանգստութեան մէջ էր. ու Գոթողիան սրով մեռցուցին: