Յուդայի Յովաթամ թագաւորը

1Յովաթամ քսանըհինգ տարեկան էր երբ թագաւոր եղաւ, ու Երուսաղէմի մէջ տասնըվեց տարի թագաւորութիւն ըրաւ. և անոր մօրը անունը Յերուսա էր, ու Սադովկի աղջիկն էր։ 2Եւ իր հօրը Ոզիայի բոլոր ըրածին պէս Տէրոջը առջև ուղղութիւն ըրաւ. բայց Տէրոջը տաճարը չմտաւ. ու ժողովուրդը տակաւին ապականած էր։ 3Ասիկա Տէրոջը տանը ամէնէն բարձր դուռը շինեց, ու Ոփաղի պարսպին վրայ շատ բաներ շինեց։ 4Եւ Յուդայի լեռնակողմը քաղաքներ, ու անտառներու մէջ բերդեր ու աշտարակներ շինեց։ 5Եւ անիկա Ամմոնի որդիներուն թագաւորին հետ պատերազմ ըրաւ, ու զանոնք յաղթեց. և նոյն տարին Ամմոնի որդիները հարիւր տաղանդ արծաթ, ու տասը հազար քոռ ցորեն, և տասը հազար քոռ գարի տուին անոր. այսպէս երկրորդ ու երրորդ տարին ալ Ամմոնի որդիները բերին անոր։ 6Եւ Յովաթամ զօրացաւ, վասն զի իր ճամբաները իր Տէր Աստուծոյն առջև շիտկեց։ 7Ու Յովաթամի մնացորդ պատմութիւնը ու անոր բոլոր պատերազմները ու ճամբաները ահա Իսրայէլի ու Յուդայի թագաւորաց գիրքին մէջ գրուած են։ 8Անիկա թագաւոր եղած ատենը քսանըհինգ տարեկան էր, ու տասնըվեց տարի Երուսաղէմի մէջ թագաւորութիւն ըրաւ։ 9Եւ Յովաթամ իր հայրերուն հետ քնացաւ, ու զանիկա Դաւիթի քաղաքին մէջ թաղեցին և անոր որդին Աքազ անոր տեղ թագաւորեց։