Յուդայի Եզեկիա թագաւորը

1Եզեկիա քսանըհինգ տարեկան էր երբ թագաւոր եղաւ, ու Երուսաղէմի մէջ քսանըինը տարի թագաւորութիւն ըրաւ. և անոր մօրը անունը Աբիա էր, ու Զաքարիայի աղջիկն էր։ 2Եւ անիկա իր հօրը Դաւիթի բոլոր ըրածին պէս Տէրոջը առջև ուղղութիւն ըրաւ։

Տաճարին մաքրութիւնը

3Անիկա իր թագաւորութեան առաջին տարւոյն առաջին ամիսը Տէրոջը տանը դռները բացաւ, ու զանոնք նորոգեց։ 4Եւ քահանաները ու Ղևտացիները բերել տուաւ, ու զանոնք արևելեան հրապարակին մէջ ժողվեց, 5Եւ անոնց ըսաւ, Ինծի մտիկ ըրէք, ով Ղևտացիներ, հիմա սրբուեցէք, ու ձեր հայրերուն Տէր Աստուծոյն տունը սրբեցէք, և պղծութիւնը սրբարանէն դուրս հանեցէք. 6Քանզի մեր հայրերը ապստամբեցան, ու մեր Տէր Աստուծոյն առջև չարութիւն ըրին, ու զանիկա թողուցին. և իրենց երեսը Տէրոջը խորանէն դարձուցին, ու արհամարհեցին զանիկա*. 7Սրահին դռներն ալ գոցեցին, ճրագները մարեցին, խունկ չծխեցին ու սուրբ տեղը Իսրայէլի Աստուծոյն ողջակէզ չմատուցին։ 8Անոր համար Յուդայի ու Երուսաղէմի վրայ Տէրոջը բարկութիւնը եկաւ, ու զանոնք խռովութեան, աւերման ու խայտառակութեան մէջ ձգեց, ինչպէս հիմա ձեր աչքերովը կը տեսնէք։ 9Եւ այս պատճառաւ ահա մեր հայրերը սրով ինկան, ու մեր տղաքները և աղջիկները ու կիները գերութեան մէջ են։ 10Հիմա իմ սրտիս մէջ փափաք ունիմ, որ Իսրայէլի Տէր Աստուծոյն հետ ուխտ ընեմ, որպէս զի իր սաստիկ բարկութիւնը մեզմէ դառնայ։ 11Արդ, որդեակք իմ, անհոգութիւն մի ընէք. վասն զի Տէրը ձեզ ընտրեց, որպէս զի իրեն ծառայութիւն ընելու համար իր առջև կայնիք, իրեն սպասաւորներ ըլլաք ու խունկ ծխէք։ 12Այն ատեն ոտք ելան Ղևտացիները, այսինքն Կահաթի որդիներէն Ամեսայիի որդին Մաաթ, ու Ազարիայի որդին Յովէլ. և Մերարիի որդիներէն Աբդիի որդին Կիս, ու Յալէլէլի որդին Ազարիա. ու Գերսոնեաններէն՝ Զամմայի որդին Յովաք, և Յովաքի որդին Եդէն. 13Ու Եղիսափանի որդիներէն՝ Սամարի ու Յէիէլ. և Ասափի որդիներէն՝ Զաքարիա ու Մաթանիա. 14Ու Եմանի որդիներէն՝ Յեքիէլ ու Սեմէի. և Իդիթունի որդիներէն՝ Սեմայիա ու Ոզիէլ։ 15Եւ իրենց եղբայրները ժողվեցին ու սրբուեցան. և թագաւորին հրամանովը ու Տէրոջը խօսքովը Տէրոջը տունը մաքրելու գացին։ 16Եւ քահանաները, մաքրելու համար, Տէրոջը տանը ներսի կողմը մտան, ու Տէրոջը տաճարին մէջ գըտնուած բոլոր աղտեղութիւնը Տէրոջը տանը գաւիթը հանեցին, ու Ղևտացիները զանիկա վերցուցին, որպէս զի դուրսը Կեդրոն հեղեղատը տանին։ 17Եւ առաջին ամսուն առաջին օրը սկսան սրբել. ու ամսուն ութերորդ օրը Տէրոջը սրահը եկան, ու Տէրոջը տունը ութ օրուան մէջ սրբեցին. և առաջին ամսուն տասնըվեցերորդ օրը լմնցուցին։

Տաճարը վերընծայուած

18Ու Եզեկիա թագաւորին քով գացին ու ըսին, Տէրոջը բոլոր տունը, ու ողջակէզի սեղանը ու անոր բոլոր գործիքները, և առաջաւորութեան հացին սեղանը ու անոր բոլոր գործիքները մաքրեցինք. 19Ու նաև պատրաստեցինք ու սրբեցինք այն բոլոր ամանները, զորոնք Աքազ թագաւորը իր թագաւորութեանը ու իր անօրէնութեանը ատեն պղծեց. և ահա անոնք Տէրոջը սեղանին առջեւ են: 20Ու Եզեկիա թագաւորը կանուխ ելաւ, ու քաղաքին իշխանները ժողվելով Տէրոջը տունը գնաց. 21Եւ իր թագաւորութեանը ու սրբարանին ու Յուդայի համար եօթը զուարակ, եօթը խոյ ու եօթը գառ, ու մեղքի պատարագ ըլլալու համար եօթը նոխազ բերին. և անիկա Ահարոնի որդիներուն, քահանաներուն, հրամայեց որ զանոնք Տէրոջը սեղանին վրայ մատուցանեն։ 22Ու զուարակները մորթեցին, և քահանաները արիւնը առին ու սեղանին վրայ սրսկեցին. և խոյերն ալ մորթեցին, ու արիւնը սեղանին վրայ սրսկեցին. և գառներն ալ մորթեցին, ու արիւնը սեղանին վրայ սրսկեցին: 23Ու մեղքի պատարագի նոխազները թագաւորին ու ժողովքին առջև բերին. և անոնք ձեռքերնին անոնց վրայ դրին։ 24Ու քահանաները զանոնք մորթեցին, և անոնց արիւնը սեղանին վրայ սրսկեցին բոլոր Իսրայէլի քաւութիւն ընելու համար, վասն զի թագաւորը ըսեր էր որ ողջակէզը ու մեղքի պատարագը բոլոր Իսրայէլի համար մատուցանեն։ 25Ու Ղևտացիները ծնծղաներով, տավիղներով ու քնարներով Տէրոջը տանը մէջ կայնեցուց, ինչպէս Դաւիթ ու Դաւիթ թագաւորին տեսանողը Գադ և Նաթան մարգարէն պատուիրեր էին. վասն զի Տէրը իր մարգարէներուն ձեռքով այսպես հրամայեր էր։ 26Ու Ղևտացիները Դաւիթի նուագարաններովը՝ և քահանաները փողերով կայնեցան։ 27Ու Եզեկիա հրամայեց որ ողջակէզը սեղանին վրայ մատուցանեն. ու ողջակէզին սկսած ատենը Տէրոջը օրհնութիւնն ալ փողերով ու Իսրայէլի թագաւորին Դաւիթի նուագարաններովը սկսաւ։ 28Ու մինչև ողջակէզին լմննալը բոլոր ժողովքը երկրպագութիւն կ’ընէր, երգեցողները օրհնութիւն կ’երգէին, և քահանաները փողերը կը հնչէցնէին։ 29Ու երբ ողջակէզ մատուցանելը լմնցուցին, թագաւորը և բոլոր քովը գտնուողները ծռելով երկրպագութիւն ըրին։ 30Ու Եզեկիա թագաւորը ու իշխանները Ղևտացւոց ըսին որ Տէրոջը օրհնութիւն երգեն Դաւիթի ու Ասափ տեսանողին խօսքերովը. անոնք ալ ուրախութեամբ երգեցին, ու խոնարհելով երկրպագութիւն ըրին։ 31Ու Եզեկիա պատասխան տուաւ ու ըսաւ, Հիմա ինքզինքնիդ Տէրոջը նուիրեցիք. մօտեցէք ու Տէրոջը տունը զոհեր ու օրհնութեան ընծաներ բերէք։ Եւ ժողովքը զոհեր ու օրհնութեան ընծաներ բերաւ. և ամէն յօժարութիւն ունեցողը ողջակէզներ բերաւ։ 32Ու ժողովքին բերած ողջակէզներուն թիւը այս էր. եօթանասուն արջառ, հարիւր խոյ ու երկու հարիւր գառ. ասոնց ամէնը Տէրոջը ողջակէզ ըլլալու համար էին։ 33Եւ նուիրուածները վեց հարիւր արջառ ու երեք հազար ոչխար էին։ 34Բայց քահանաները քիչուոր ըլլալնուն համար՝ բոլոր ողջակէզներուն մորթերը հանելու կարող չեղան, ու մինչև այս գործին լմննալը, ու մինչև միւս քահանաներուն սրբուիլը, իրենց Ղևտացի եղբայրները իրենց օգնութիւն ըրին, քանզի Ղևտացիք քահանաներէն աւելի յօժարութեամբ սրբուեցան. 35Ու նաև ողջակէզները խաղաղութեան զոհերուն ճարպովը և ողջակէզներուն թափելու նուէրներովը մէկտեղ շատ էին։ Այսպէս Տէրոջը տանը պաշտօնը կարգի դրուեցաւ։ 36Ու Եզեկիա և բոլոր ժողովուրդը ուրախացան որ Աստուած ժողովուրդը այսպես պատրաստեց. քանզի այս բանը յանկարծ եղաւ։