1Եւ Սողոմոն սկսաւ Տէրոջը տունը շինել Երուսաղէմի մէջ, Մօրիա լեռանը վրայ, ուր Տէրը անոր հօրը Դաւիթի երևցեր էր, այն տեղը զոր Դաւիթ Յեբուսացի Ոռնայի կալին մէջ պատրաստեր էր: 2Եւ իր թագաւորութեանը չորրորդ տարին, երկրորդ ամսուն երկրորդ օրը սկսաւ զանիկա շինել: 3Ու Աստուծոյ տունը շինելու համար Սողոմոնի դրած հիմը ասիկա էր. առաջուան չափով վաթսուն կանգուն երկայն, ու քսան կանգուն լայն էր: 4Եւ դիմացը եղող սրահին երկայնութիւնը՝ տանը լայնութիւնովը քսան կանգուն, ու բարձրութիւնը հարիւր քսան կանգուն էր. ու զանիկա ներսէն մաքուր ոսկիով պատեց: 5Եւ մեծ տունը մայր փայտով ծածկեց, ու զանիկա մաքուր ոսկիով պատեց, ու անոր վրայ արմաւենիներ ու շղթաներ փորագրեց: 6Եւ շքեղութեան համար տունը պատուական քարերով զարդարեց. ու ոսկին Փարուիմի ոսկի էր: 7Եւ տանը գերանները, սեմերը, պատերը ու դռները ոսկիով պատեց. ու պատերուն վրայ քերովբէներ քանդակեց: 8Եւ սրբութեանց սրբութիւնին տունը շինեց. անոր երկայնութիւնը տանը լայնութեանը պէս՝ քսան կանգուն, ու լայնութիւնը քսան կանգուն էր. և զանիկա վեց հարիւր տաղանդի չափ մաքուր ոսկիով պատեց: 9Ու բեւեռներուն կշիռքը յիսունական սիկղ ոսկի էր. ու վերնատունները ոսկիով պատեց: 10Եւ սրբութեանց սրբութիւնին տանը մէջ երկու քանդակագործ քերովբէներ շինեց, ու զանոնք ոսկիով պատեց. 11Եւ քերովբէներուն թևերը քսան կանգուն երկայնութիւն ունէին. մէկ թևը հինգ կանգուն էր ու տանը պատին կը դպչէր, և միւս թևը հինգ կանգուն էր ու միւս քերովբէին թևին կը դպչէր. 12Միւս քերովբէին ալ մէկ թևը հինգ կանգուն էր ու տանը պատին կը դպչէր, ու միւս թևը հինգ կանգուն էր ու միւս քերովբէին թևին կցուած էր: 13Այս քերովբէներուն տարածուած թևերուն երկայնութիւնը քսան կանգուն էր. ու անոնք իրենց ոտքերուն վրայ կայնած էին, ու անոնց երեսը դէպ ի տունը կը նայէր: 14Եւ վարագոյրը կապուտակէ, ծիրանիէ, կարմիրէ ու բեհեզէ շինեց, ու անոր վրայ քերովբէներ գործեց:

Երկու պղնձէ սիւները

15Եւ տանը առջև երեսունըհինգ կանգուն երկայնութեամբ երկու սիւն շինեց, ու ամէն մէկուն վրայի խոյակը հինգ կանգուն էր: 16Եւ դաբիրին մէջի շղթաներուն պէս շղթաներ շինեց, ու սիւներուն վրայ դրաւ. և հարիւր նուռ շինեց ու շղթաներուն անցուց: 17Եւ սիւները տաճարին առջև կանգնեց, մէկը աջ կողմէն ու միւսը ձախ կողմէն. և աջ կողմը եղողին անունը Յաքին, ու ձախ կողմը եղողին անունը Բոոզ կոչեց: