1Եւ Սողոմոնի Տէրոջը տանը համար շինած բոլոր գործը լմնցաւ. ու Սողոմոն իր հօրը Դաւիթի նուիրած բաները, և արծաթը ու ոսկին ու բոլոր անօթները տարաւ, և Աստուծոյ տանը գանձերուն մէջ դրաւ:

Տապանակ ուխտին տաճար բերուեցաւ

2Այն ատեն Սողոմոն Իսրայէլի ծերերը, ու ցեղերուն բոլոր իշխանները, Իսրայէլի որդիներուն նահապետները, Երուսաղէմի մէջ ժողվեց, որպէս զի Տէրոջը ուխտին տապանակը Դաւիթի քաղաքէն, այսինքն Սիօնէ, հանեն: 3Եւ Իսրայէլի բոլոր մարդիկը եօթներորդ ամսուն տօնին ատենը թագաւորին քով ժողվուեցան: 4Ու Իսրայէլի բոլոր ծերերը եկան. ու Ղևտացիները տապանակը վերցուցին: 5Եւ տապանակը ու ժողովքի խորանը և խորանին մէջ եղած բոլոր սուրբ անօթները հանեցին, զանոնք քահանաները ու Ղևտացիները հանեցին: 6Եւ Սողոմոն թագաւորը ու անոր քով ժողվուած Իսրայէլի բոլոր ժողովքը տապանակին առջև ըլլալով՝ ոչխարներ ու արջառներ կը զոհէին, այնչափ շատ՝ որ անթիւ ու անհամար էին: 7Եւ քահանաները Տէրոջը ուխտին տապանակը ներս տարին իր տեղը, տանը դաբիրը, սրբութիւն սրբութեանցը, ու քերովբէներուն թևերուն տակ դրին: 8Ու քերովբէները տապանակին տեղին վրայ իրենց թևերը կը տարածէին, և քերովբէները տապանակը ու անոր ձողերը վերէն կը ծածկէին: 9Եւ ձողերը երկնցուցին, և ձողերուն ծայրերը տապանակէն դաբիրին առջև կ’երևնային, բայց դուրսէն չէին երևնար. ու մինչև այսօր հոն է: 10Տապանակին մէջ ուրիշ բան չկար, բայց միայն երկու տախտակները, զորոնք Մովսէս Քորեբի մէջ հոն դրաւ, որոնցմով Տէրը Իսրայէլի որդիներուն հետ ուխտ ըրաւ՝ անոնց Եգիպտոսէ ելած ատենը:

Տէրոջը փառքը

11Ու երբ քահանաները սուրբ տեղէն ելան, (վասն զի բոլոր հոն գտնուող քահանաները սրբուեր էին, ոչ թէ իրենց յաջորդական կարգը պահելով. 12Ու երգեցող Ղևտացիներուն բոլորը՝ Ասափի, Եմանի ու Իդիթունի և անոնց որդիներուն ու եղբայրներուն հետ բեհեզներ հագած, ծնծղաներով, տաւիղներով ու քնարներով սեղանին արևելեան կողմը կայնեցան. և անոնց հետ հարիւր քսան քահանայ փող կը հնչեցնէին.) 13Ու երբ փող հնչեցնողները ու երգեցողները միաբերան մէկ ձայնով Տէրը կ’օրհնէին ու կը գովէին, և փողերով, ծնծղաներով ու երգոց նուագարաններով ձայներնին վերցնելով՝ Տէրը կ’օրհնէին, ըսելով, Գոհացէք Տէրոջմէն, վասն զի բարի է, վասն զի անոր ողորմութիւնը յաւիտեան է, այն ատեն Տէրոջը տունը ամպով լեցուեցաւ: 14Եւ ամպին պատճառաւ քահանաները չէին կրնար հոն կենալ, որ իրենց պաշտօնը կատարեն. քանզի Տէրոջը փառքը Աստուծոյ տունը լեցուցեր էր: