1Պօղոս, առաքեալ Յիսուսի Քրիստոսի Աստուծոյ կամքովը, ու Տիմոթէոս մեր եղբայրը. Կորնթոսի մէջ եղած Աստուծոյ եկեղեցիին, և բոլոր Աքայիայի մէջ եղող ամէն սուրբերուն. 2Շնորհք և խաղաղութիւն ձեզի Աստուծմէ մեր Հօրմէն ու Տէր Յիսուս Քրիստոսէ:

Պօղոս շնորհակալութիւն կը յայտնէ Աստուծոյ

3Օրհնեալ ըլլայ Աստուած ու մեր Տէր Յիսուս Քրիստոսի Հայրը, գթութեան Հայրը և ամէն մխիթարութեան Աստուածը. 4որ մեզ կը մխիթարէ մեր ամէն նեղութիւններու մէջ, որպէս զի մենք կարող ըլլանք մխիթարել զանոնք` որ ամէն նեղութիւններուն մէջ են, այն մխիթարութիւնովը` որով մենք Աստուծմէ կը մխիթարուինք. 5Քանզի ինչպէս Քրիստոսի չարչարանքները մեր վրայ շատ եղան, նմանապէս Քրիստոսի ձեռքով մեր մխիթարութիւնն ալ շատ կ’ըլլայ: 6Եւ եթէ նեղութիւն քաշենք ձեր մխիթարութեանը ու փրկութեանը համար է, և եթէ մխիթարուինք` ձեր մխիթարութեանը ու փրկութեանը համար է, որ կը յաջողի համբերելով այն չարչարանքներուն` որոնցմով մենք ալ կը չարչարուինք. 7Եւ մեր յոյսը հաստատուն է ձեզի համար, վասն զի գիտենք թէ ինչպէս չարչարանքներուն հաղորդ էք, նոյնպէս ալ մխիթարութեանը պիտի ըլլաք: 8Վասն զի Ասիայի մէջ մեզի պատահած նեղութիւններուն վրայով` չեմ ուզեր որ չգիտցող ըլլաք, եղբայրներ, թէ մեր կարողութենէն շատ աւելի ծանրաբեռնեցանք. մինչև կեանքերնէս ալ անյոյս եղանք: 9Բայց մահուան վճիռը մենք մեր վրայ պահեցինք, որպէս զի ինքզինքնուս չապաւինինք, հապա Աստուծոյ` որ մեռելները կը յարուցանէ. 10Որ այնպիսի մեծ մահուանէ մեզ փրկեց ու կը փրկէ. 11Որու կը յուսանք թէ տակաւին պիտի փրկէ, մեզի համար ձեր ըրած աղօթքին օգնականութիւնովը. որպէս զի շատերուն աղօթքին պատճառաւ մեզի եղած շնորհքին համար` շատերէն գոհութիւն տրուի մեզի համար:

Պօղոսին ծրագրին փոփոխութիւնը

12Վասն զի մեր պարծանքը այս է, մեր խղճմտանքին վկայութիւնը, թէ մենք Աստուծոյ առջև պարզմտութեամբ ու անկեղծութեամբ, և ոչ թէ մարմնաւոր իմաստութիւնով մը, հապա Աստուծոյ շնորհքովը աշխարհի մէջ վարուեցանք, բայց աւելի դէպ ի ձեզ: 13Քանզի ուրիշ բան չենք գրեր ձեզի, հապա զայն որ դուք կը կարդաք ու կը ճանչնաք. և կը յուսամ թէ մինչև վերջը պիտի ճանչնաք. 14Ինչպէս քիչ շատ ճանչցաք մեզ, որ ձեր պարծանքն ենք, ինչպէս դուք ալ մերը` Տէր Յիսուսի օրը: 15Եւ այս վստահութիւնով կ’ուզէի առաջ ձեզի գալ, որպէս զի դուք երկրորդ անգամ շնորհք ընդունիք. 16Ու ձեզմէ անցնիլ դէպ ի Մակեդոնիա, և դարձեալ Մակեդոնիայէ ձեզի գալ, ու ձեզմէ ճամբայ դրուիլ դէպ ի Հրէաստան: 17Ուստի զայս որ ես մտածեցի, միթէ թեթևութիւնո՞վ շարժեցայ. կամ թէ զայն որ ես կը խորհիմ, մարմնաւորապէ՞ս կը խորհիմ, որպէս զի իմ կողմանէս այո այո և ոչ ոչ ըլլայ*: 18Սակայն հաւատարիմ է Աստուած, որ մեր խօսքը ձեզի որ հասաւ` այո և ոչ չէր: 19Վասն զի Աստուծոյ Որդին Յիսուս Քրիստոս, որ մեզմով ձեզի քարոզուեցաւ, (ինծմով և Սիղուանոսով ու Տիմոթէոսով,) այո ու ոչ չեղաւ, հապա իր մէջ եղաւ այոն: 20Քանզի որչափ որ Աստուծոյ խոստմունքները կան` իր մէջ Այո են, ու իր մէջ Ամէն են Աստուծոյ փառքին համար մեր ձեռքով: 21Բայց ան որ մեզ ձեզի հետ մէկտեղ Քրիստոսով հաստատեց, ու մեզ օծեց, Աստուած է. 22Որ մեզ կնքեց ալ, և մեզի տուաւ Հոգւոյն գրաւը մեր սիրտերուն մէջ: 23Բայց ես զԱստուած վկայ կը կանչեմ իմ անձիս, որ ձեզի խնայելուս համար տակաւին Կորնթոս չեկայ. սակայն ոչ թէ ձեր հաւատքին վրայ կը տիրապետենք, հապա գործակից ենք ձեր ուրախութեանը. վասն զի դուք հաւատքով կը կենաք: