Պօղոս կը պաշտպանէ իշխանութիւնը

1Բայց ես Պօղոս ձեզի կ’աղաչեմ Քրիստոսի հեզութիւնովը ու քաղցրութիւնովը, որ երես առ երես գտնուած ատենս խոնարհ եմ ձեր մէջ, բայց հեռուէն կը համարձակիմ ձեզի. 2Կ’աղաչեմ որ չըլլայ թէ մօտէն ալ համարձակիմ այն վստահութիւնովը` որով միտք ունիմ յանդգնիլ մէկ քանիներուն վրայ, որոնք մեր վրայով այնպէս կը կարծեն թէ մարմնաւորապէս կը քալենք: 3Քանզի թէպէտ մարմինի մէջ կը քալենք, բայց ոչ թէ մարմնաւորապէս զինուորութիւն կ’ընենք. 4Վասն զի մեր զինուորութեան զէնքերը մարմնաւոր չեն, հապա Աստուծմէ զօրութիւն առած` ամրոցներ քակելու. մենք խորհուրդներ կը քակենք, 5Եւ Աստուծոյ գիտութեանը դէմ բոլոր հպարտացած բարձր բաները, ու բոլոր միտքերը Քրիստոսի հնազանդութեանը գերի կ’ընենք. 6Եւ պատրաստութիւն ունինք վրէժ առնելու ամէն անհնազանդութենէ, երբ ձեր հնազանդութիւնը կատարեալ ըլլայ: 7Դուրսի երևոյթի՞ն կը նայիք. եթէ մէկը վստահ ըլլայ իր անձին վրայ` թէ ինք Քրիստոսին է, զայս նորէն ինքիրմէ խորհի` որ ինչպէս ինք Քրիստոսին է, նոյնպէս ալ մենք: 8Քանզի եթէ աւելի ալ պարծենալու ըլլամ այս մեր իշխանութեանը վրայով` զոր Տէրը մեզի տուաւ` ձեզ շինելու և ոչ թէ քակելու համար, պիտի չամչնամ. 9Որպէս զի այնպէս չսեպուիմ` որպէս թէ ես թուղթերովս ձեզի վախ մը կը ձգեմ. 10Քանզի Անոր թուղթերը, կ’ըսէ մէկը, ծանր ու զօրաւոր են, բայց անոր մարմնին երևոյթը տկար է, ու խօսքը` անարգ. 11Այնպիսի մարդը զայս թող խորհի, որ մենք հեռուէն ինչպէս ենք խօսքով մեր թուղթերովը, մօտէն ալ այնպէս պիտի ըլլանք գործով: 12Վասն զի մենք չենք համարձակիր մեր անձը կշիռքի դնել ու բաղդատել ոմանց հետ, որ ինքզինքնին կը գովեն. բայց անոնք իրենցմով իրենց անձերը չափելով, և զիրենք իրենց հետ բաղդատելով` չեն հասկնար: 13Բայց մէնք չափէ դուրս բաներով պիտի չպարծենանք, հապա այն կանոնին չափովը` զոր Աստուած մեզի բաժին տուաւ մինչև ձեզի հասնելու. 14Ոչ թէ որպէս թէ մենք ձեզի հասած չենք, ու ինքզինքնիս չափէն աւելի կ’երկնցնենք. վասն զի Քրիստոսի աւետարանովը մինչև ձեզի հասանք: 15Եւ ոչ թէ չափէ դուրս բաներով` ուրիշներուն աշխատանքովը կը պարծենանք, հապա յոյս ունինք որ ձեր հաւատքը աւելնալուն` մեր կանոնին չափովը ձեզմով աւելի ընդարձակինք, 16Ձեզմէ անդիի կողմերը աւետարանը քարոզելու, և ոչ թէ պատրաստ բաներու վրայ պարծենալու ուրիշի մը կանոնով: 17Բայց ան որ կը պարծենայ` թող Տէրոջմով պարծենայ: 18Վասն զի ոչ թէ ան որ իր անձը կը գովէ` անիկա է ընտրուածը, հապա ան զոր Տէրը կը գովէ: