1Այս երրորդ անգամ է որ ձեզի կու գամ. երկու կամ երեք վկաներու բերնէ պիտի հաստատուի ամէն բան: 2Առաջուընէ ըսեր եմ` և նորէն առաջուընէ կը զրուցեմ (որպէս թէ երկրորդ անգամ ներկայ կը գտնուիմ` թէև հիմա հեռուէն կը գրեմ) առաջուան մեղանչողներուն և ուրիշ ամէնուն, որ եթէ նորէն գամ` պիտի չխնայեմ. 3Որովհետև Քրիստոսի ինծմով խօսելուն ապացոյցը կը փնտռէք, որ ձեր վրայ տկարացած չէ, հապա ձեր մէջ զօրացած է. 4Որ թէպէտ խաչուեցաւ տկարութիւնով, բայց կենդանի է Աստուծոյ զօրութիւնով. քանզի մենք ալ թէպէտ կը տկարանանք անով, բայց կենդանի պիտի ըլլանք անոր հետ Աստուծոյ զօրութիւնովը ձեր մէջ: 5Փորձեցէք ձեր անձերը թէ հաւատքին մէ՞ջ էք. քննեցէք ձեր անձերը. չէ՞ք գիտեր ինքզինքնիդ, որ Յիսուս Քրիստոս ձեր մէջ է, միայն եթէ խոտելի չըլլաք: 6Բայց կը յուսամ որ պիտի գիտնաք թէ մենք խոտելի չենք: 7Եւ կը խնդրեմ Աստուծմէ որ դուք չարութիւն մը չընէք. ոչ թէ որպէս զի մենք ընտիր երևինք, հապա որպէս զի դուք բարին գործէք, թէև մենք իբրև խոտելի ըլլանք: 8Վասն զի ճշմարտութեան դէմ կարողութիւն մը չունինք, հապա ճշմարտութեան համար: 9Քանզի ուրախ ենք` երբ մենք կը տկարանանք ու դուք զօրաւոր կ’ըլլաք, և մենք ալ այդ ձեր հաստատութեանը համար կ’աղօթենք: 10Ուստի զայս կը գրեմ ձեզի հեռուէն, որ չըլլայ թէ երբ գամ` սաստկութեամբ վարուիմ այն իշխանութեանը համեմատ, զոր Տէրը ինծի տուաւ շինելու և ոչ թէ քակելու համար: 11Վերջապէս, եղբայրներ, ողջ եղէք, հաստատ կեցէք, մխիթարուեցէք, միաբան եղէք, խաղաղութիւն ըրէք. և սիրոյ ու խաղաղութեան Աստուածը ձեզի հետ պիտի ըլլայ: 12Բարև տուէք իրարու սուրբ համբուրով. բարև կ’ընեն ձեզի բոլոր սուրբերը: 13Տէր Յիսուս Քրիստոսի շնորհքը և Աստուծոյ սէրը ու Հոգւոյն Սրբոյ հաղորդութիւնը ձեր ամէնուն հետ ըլլայ: Ամէն: