1Սակայն ես ինծմէ զայս որոշեցի, որ նորէն տրտմութիւնով չգամ ձեզի: 2Վասն զի եթէ ես ձեզ տրտմեցնեմ, ալ ո՞վ է որ զիս պիտի ուրախացնէ, եթէ ոչ ան` որ ինծմէ կը տրտմի: 3Ու զայս գրեցի, որ չըլլայ թէ երբ գամ` տրտմութիւն մը կրեմ անոնցմէ, ուրկէ պէտք է ինծի ուրախ ըլլալ. քանզի ձեր ամէնուն վրայ վստահ եմ, որ իմ ուրախութիւնս ձեր ամէնունն է: 4Վասն զի շատ նեղութենէ և սրտի տագնապէ ես ձեզի գրեցի շատ արցունքով. ոչ թէ` որպէս զի դուք տրտմիք, հապա որպէս զի գիտնաք այն սէրը զոր ես ունիմ աւելի ձեր վրայ:

Նախատողներուն թողութիւն

5Բայց եթէ մէկը տրտմեցուց, ոչ թէ զիս տրտմեցուց, հապա ըստ մասին (որպէս զի խօսքս ծանր չընեմ) ձեզ ամէնդ*: 6Հերիք է այնպիսի մարդուն այն պատիժը, որ շատերէ եղաւ: 7Ուստի ընդհակառակն պէտք է աւելի ներել անոր ու մխիթարել, որ չըլլայ թէ այնպիսին աւելի տրտմութենէն ընկղմի: 8Ուստի կ’աղաչեմ ձեզի, որ անոր վրայ ձեր սէրը հաստատէք. 9(Քանզի ասոր համար ալ գրեցի, որպէս զի ձեզ փորձելով գիտնամ թէ ամէն բանի մէջ հնազա՞նդ էք: 10Եւ որու դուք բան մը կը ներէք, ես ալ կը ներեմ. վասն զի եթէ ես ալ ներեմ, որու որ ներեմ` ձեզի համար է Քրիստոսի կողմանէ.) 11Որ չըլլայ թէ զրկանք մը կրենք ëատանայէ. քանզի անոր խորհուրդները չգիտցող չենք:

Պօղոսին անձկութիւնը Տրովադայի մէջ

12Արդ երբ ես Տրովադա հասայ Քրիստոսի աւետարանը քարոզելու, և ինծի դուռ մը բաց էր Տէրոջմով, 13Իմ հոգւոյս մէջ հանգստութիւն չունէի, վասն զի իմ Տիտոս եղբայրս հոն չգտայ. հապա անոնցմէ հրաժարելով` Մակեդոնիա գացի:

Քրիստոսով յաղթութիւն

14Բայց գոհութիւն Աստուծոյ, որ միշտ յաղթող կ’ընէ մեզ Քրիստոսով, ու զինք ճանչնալուն հոտը մեզմով յայտնի կ’ընէ ամէն տեղ: 15Վասն զի մենք Աստուծոյ առջև Քրիստոսի անոյշ հոտն ենք փրկուածներուն մէջ և կորսուածներուն մէջ. 16Ոմանց մահուան հոտ դէպ ի մահ, և ոմանց կենդանութեան հոտ դէպ ի կեանք. և այս բաներուն ո՞վ բաւական է. 17Քանզի մենք շատերուն պէս չենք, որոնք Աստուծոյ խօսքին խարդախութիւն կ’ընեն. հապա որպէս թէ անկեղծութեամբ, հապա որպէս թէ Աստուծմէ` Աստուծոյ առջև Քրիստոսով կը խօսինք: