1Վասն զի գիտենք որ եթէ մեր վրանի նման երկրաւոր տունը քակուի, շինուածք մը ունինք Աստուծմէ, անձեռագործ յաւիտենական տուն մը երկինքի մէջ: 2Եւ յիրաւի ասոր մէջ կը հառաչենք` մեր երկնաւոր բնակութիւնը հագնելու փափագելով. 3Միայն թէ երբ զայն հագնելու ըլլանք, մերկ չգտնուինք: 4Վասն զի մենք որ այս վրանին տակ ենք, կը հառաչենք ծանրութիւն քաշելով. վասն զի չենք ուզեր մեր վրայէն հանել, հապա զանիկա ասոր վրայէն հագնիլ, որպէս զի մահկանացութիւնը ընկղմի կեանքէն: 5Իսկ ան որ մեզ այս բանին կը պատրաստէ, Աստուած է, որ նաև մեզի տուաւ Հոգւոյն գրաւը: 6Ուստի ամէն ատեն վստահութիւն ունինք, և գիտենք թէ որչափ մարմնի մէջ կը կենանք, Տէրոջմէ հեռու ենք. 7(Վասն զի հաւատքով կը քալենք, ու ոչ թէ երևութով.) 8Ուստի վստահութիւն ունինք` և ալ աւելի կ’ուզենք մարմինէն հեռանալ ու Տէրոջը քով կենալ: 9Ասոր համար կը ջանանք ալ, որ թէ° կենանք և թէ° հեռանանք` անոր հաճոյ ըլլանք: 10Վասն զի պէտք է որ ամէնս ալ Քրիստոսի ատեանին առջև ներկայանանք, որպէս զի ամէն մէկը իր մարմնովը ըրածներուն փոխարէնը առնէ` ինչ որ գործէր է, թէ՛ բարի և թէ° չար:

Աստուծոյ հետ հաշտութիւն Քրիստոսով

11Ուստի Տէրոջը վախը գիտնալով` մարդոց միտքը կը հաճեցնենք. սակայն մենք Աստուծոյ առջև յայտնի ենք, և կը յուսամ որ ձեր խղճմտանքին մէջ ալ յայտնի ենք: 12Ոչ թէ նորէն անձերնիս ձեզի կ’ընծայենք. հապա առիթ կու տանք ձեզի` մեր վրայով պարծենալու. որպէս զի բան մը ունենաք պատասխանելու անոնց` որ աչքի երևցածով կը պարծենան, ու ոչ թէ սրտով: 13Վասն զի եթէ խելըռած ենք` այն Աստուծոյ համար է, և եթէ զգաստ ենք` այն ձեզի համար է. 14Վասն զի Քրիստոսի սէրը մեզ կը ստիպէ. քանզի մեր դատումը այս է որ եթէ մէկը ամէնուն համար մեռաւ, ուրեմնն ամէնն ալ մեռան. 15Եւ ամէնուն համար մեռաւ, որպէս զի կենդանի եղողները ա°լ իրենց անձերուն կենդանի չըլլան, հապա անոր` որ իրենց համար մեռաւ ու յարութիւն առաւ: 16Ուստի ասկէ ետև մենք մէ°կը մարմնով չենք գիտեր. ու թէև Քրիստոսը մարմնով ճանչցանք, բայց հիմա ա°լ այնպէս չենք ճանչնար: 17Ուրեմն եթէ մէկը Քրիստոսի մէջ է, անիկա նոր ստեղծուած մըն է. հիները անցան, և ահա ամէն բան նոր եղաւ: 18Սակայն ամէն բան Աստուծմէ է, որ մեզ իրեն հետ հաշտեցուց Յիսուս Քրիստոսի ձեռքով, ու տուաւ մեզի հաշտութեան պաշտօնը. 19Այսինքն Աստուած էր, որ Քրիստոսով աշխարհս իրեն հետ հաշտեցուց, և անոնց յանցանքները իրենց չսեպեց, ու հաշտութեան խօսքը մեր մէջ դրաւ: 20Ուրեմն Քրիստոսի կողմանէ դեսպանութիւն կ’ընենք, իբրև թէ Աստուած կը բարեխօսէր մեզմով. կ’աղաչենք ձեզի Քրիստոսի կողմանէ, հաշտուեցէք Աստուծոյ հետ: 21Վասն զի Աստուած զանիկա որ մեղք չէր գիտեր, մեզի համար մեղաւոր սեպեց, որպէս զի մենք անոր միջոցով Աստուծոյ արդարներն ըլլանք: