1Ուստի, սիրելիներ, որովհետև մենք այս խոստմունքները ունինք, մեր անձերը մարմինի ու հոգիի ամէն կերպ պղծութենէ մաքրենք, և սրբութիւնը կատարելագործենք Աստուծոյ վախովը:

Պօղոսին ուրախութիւնը

2Ընդունեցէք մեզ. մարդո°ւ վնաս չտուինք, ոչ մէկը եղծեցինք, և ոչ մէկը զրկեցինք: 3Ոչ թէ ձեզ դատապարտելու համար զայս կը զրուցեմ. որովհետև ես առաջուընէ ըսեր եմ որ դուք մեր սիրտերուն մէջ էք` մեռնելու և ապրելու ձեզի հետ: 4Շատ է իմ համարձակութիւնս ձեր վրայ. շատ է իմ պարծանքս ձեզի համար. լեցուն եմ մխիթարութիւնով, աւելցած եմ ուրախութիւնով մեր ամէն նեղութիւններուն մէջ: 5Վասն զի երբ մենք Մակեդոնիա հասանք, բնաւ մեր մարմինը հանգստութիւն չունեցաւ, հապա ամէն կողմանէ նեղութիւն կը քաշէինք. դուրսէն պատերազմներ կային, ու ներսէն` վախեր: 6Բայց Աստուած, որ խոնարհները կը մխիթարէ, մեզ մխիթարեց Տիտոսի գալովը: 7Եւ ոչ թէ միայն անոր գալովը, հապա այն մխիթարութիւնովն ալ` որով ինք մխիթարուեր էր ձեզմով, երբ մեզի պատմեց ձեր բաղձանքը, ձեր ողբը, ձեր ինծի համար ունեցած նախանձաւորութիւնը, այնպէս որ ալ աւելի ուրախ եղայ: 8Վասն զի եթէ ձեզ տրտմեցուցի այն թուղթով, չեմ զղջար, (թէև զղջացեր էի,) քանզի կը տեսնեմ որ այն թուղթը ձեզ տրտմեցուց, թէև քիչ մը ատեն: 9Արդ ուրախ եմ, ոչ թէ` որ տրտմեցաք, հապա որ ապաշխարութեան համար տրտմեցաք. որովհետև դուք Աստուծոյ ուզածին պէս տրտմեցաք, այնպէս որ բանով մըն ալ մեզմէ վնաս չքաշէք: 10Վասն զի Աստուծոյ ուզածին պէս եղած տրտմութիւնը փրկութեան համար ապաշխարութիւն կը գործէ, որ զղջանալու բան չէ. բայց աշխարհի տրտմութիւնը մահ կը գործէ: 11Քանզի ահա այս բանը որ դուք Աստուծոյ ուզածին պէս տրտմեցաք, ձեր մէջ ո°րչափ ջանք գործեց, ո°րչափ չքմեղութիւն, ո°րչափ սրտմտութիւն, ո°րչափ վախ, ո°րչափ բաղձանք, ո°րչափ նախանձաւորութիւն, ո°րչափ վրէժխնդրութիւն. ամէն կերպով ինքզինքնիդ ցուցուցիք թէ այդ բանին մէջ մաքուր էք: 12Ուրեմն այն զոր ես ձեզի գրեցի, ոչ թէ զրկանքը ընողին համար էր, և ոչ թէ զրկանքը կրողին համար, հապա որպէս զի ձեր վրայ մեր ունեցած հոգը յայտնի ըլլայ ձեզի Աստուծոյ առջև: 13Ուստի այն ձեր մխիթարութեանը համար մենք մխիթարուեցանք. շատ աւելի ալ ուրախացանք Տիտոսի ուրախութեանը համար, վասն զի անոր հոգին ձեր ամէնէն հանգստութիւն գտեր էր: 14Վասն զի ինչ որ ես անոր առջև ձեզի համար պարծենցայ` ամօթով չեղայ. հապա ինչպէս ամէն բան ճշմարտութիւնով խօսեցանք ձեզի, նոյնպէս Տիտոսի առջև պարծենալնիս ալ ճշմարիտ եղաւ: 15Նաև անոր սէրը աւելի է ձեր վրայ, երբ կը յիշէ ձեր ամէնուն հնազանդութիւնը, թէ ի°նչպէս վախով ու դողով զանիկա ընդուներ էք: 16Ուստի ուրախ եմ որ ամէն բանի մէջ ձեր վրայ վստահութիւն ունիմ: