Յուդայի Գոթողիա թագուհին

1Եւ Ոքոզիայի մայրը Գոթողիա իր որդւոյն մեռնիլը տեսնելով, ելաւ բոլոր թագաւորական սերունդը բնաջինջ ըրաւ: 2Բայց Յովրամ թագաւորին աղջիկը, Ոքոզիայի քոյրը Յօսաբէէ, Ոքոզիայի որդին Յովասը առաւ, ու թագաւորին սպաննուած որդիներուն մէջէն գողցաւ զանիկա ու անոր դայեակը. և Գոթողիայի երեսէն անկողիններու սենեակին մէջ պահեցին զանիկա, ու չմեռցուեցաւ: 3Եւ անիկա անոր հետ վեց տարի Տէրոջը տանը մէջ պահուեցաւ. ու երկրին վրայ Գոթողիա թագաւորութիւն կ’ընէր: 4Ու եօթներորդ տարին Յովիադա մարդ ղրկեց, և հարիւրապետները, թիկնապահները ու սուրհանդակները կանչեց, և զանոնք իր քով Տէրոջը տունը բերաւ, ու անոնց հետ ուխտ ըրաւ, ու Տէրոջը տանը մէջ անոնց երդում ընել տուաւ, ու թագաւորին որդին անոնց ցուցուց: 5Եւ անոնց պատուիրելով ըսաւ, Ձեր ընելու բանը այս է. ձեր երրորդ մասը՝ որ շաբաթ օրը պիտի մտնեն, թագաւորին տանը պահպանութիւն ընեն. 6Ու երրորդ մասը՝ Սուրի դուռը, ու երրորդ մասն ալ սուրհանդակներու ետեւի դուռը կայնին. և այսպէս տանը պահպանութիւնը ընէք որպէս զի մարդ չմտնէ: 7Ու ձեզմէ երկու գունդը, այսինքն այն ամէնը որ շաբաթ օրը պիտի ելլեն, թագաւորին բոլորտիքը Տէրոջը տանը պահպանութիւնը ընեն: 8Եւ ամէն մարդ իր զէնքերը ձեռքը՝ թագաւորին չորս կողմը առնէք. ու կարգերէն ներս մտնողը սպաննուի. ու թագաւորին հետ ըլլաք անոր ելած ու մտած ատենը: 9Եւ հարիւրապետները Յովիադա քահանային բոլոր պատուիրածները ըրին. ու ամէն մէկը իր մարդիկը առաւ, թէ՛ շաբաթ օրը մտնողները և թէ՛ շաբաթ օրը ելլողները, ու Յովիադա քահանայի քով եկան: 10Եւ քահանան Տէրոջը տունը եղած Դաւիթ թագաւորին նիզակները ու վահանները հարիւրապետներուն տուաւ: 11Ու սուրհանդակները ամէն մարդ իր զէնքը ձեռքը՝ տանը աջ կողմէն մինչև ձախ կողմը՝ սեղանին ու տանը քով թագաւորին բոլորտիքը կայնեցան: 12Եւ թագաւորին որդին հանեց, ու անոր վրայ թագը ու վկայութիւնը դրաւ. և զանիկա թագաւոր ըրին ու օծեցին, ու ծափ զարնելով ըսին, Կեցցէ արքայ: 13Եւ Գոթողիա երբ վազող ժողովուրդին ձայնը լսեց, Տէրոջը տունը ժողովուրդին եկաւ. 14Ու տեսաւ որ ահա թագաւորը ըստ սովորութեան սիւնին քով կայներ էր, և զօրապետները ու փողերը թագաւորին քով էին, ու երկրին բոլոր ժողովուրդը ուրախանալով փողեր կը հնչեցնէին. այն ատեն Գոթողիա իր հանդերձները պատռեց ու պոռաց, Դաւաճանութի՜ւն է, դաւաճանութի՜ւն: 15Եւ Յովիադա քահանան զօրքերուն վրայ եղող հարիւրապետներուն հրամայեց, ու անոնց ըսաւ, Ասիկա կարգերուն մէջէն հանեցէք, ու ասոր ետեւէն գացողը սրով մեռցուցէք, (քանզի քահանան ըսեր էր որ Տէրոջը տանը մէջ չմեռցուի:) 16Եւ անոր վրայ ձեռքերնին երկնցուցին. ու երբ անիկա թագաւորական տունը մտնող ձիերուն ճամբայէն կ’երթար, հոն մեռցուեցաւ:

Յովիադային բարեկարգութիւնը

17Եւ Յովիադա Տէրոջը ու թագաւորին ու ժողովուրդին մէջտեղ ուխտ ըրաւ, որպէս զի Տէրոջը ժողովուրդը ըլլան. նաև թագաւորին ու ժողովուրդին մէջտեղ: 18Ու երկրին բոլոր ժողովուրդը Բահաղի տունը մտան, և զանիկա կործանեցին, և անոր սեղանները ու կուռքերը կտոր կոտորին, և Բահաղի քուրմը Մատթանը սեղաններուն առջև սպաննեցին. ու քահանան Տէրոջը տանը մէջ պաշտօնեաներ դրաւ: 19Եւ հարիւրապետները, թիկնապահները ու սուրհանդակները, ու երկրին բոլոր ժողովուրդը առաւ, և թագաւորը Տէրոջը տունէն իջեցուցին, ու սուրհանդակներուն դրանը ճամբայէն թագաւորին տունը մտան. և անիկա թագաւորներուն աթոռին վրայ նստաւ: 20Ու երկրին բոլոր ժողովուրդը ուրախացաւ, ու քաղաքը հանդարտութեան մէջ էր. իսկ Գոթողիան թագաւորական տանը քով սրով մեռցուցին: 21Յովաս եօթը տարեկան էր երբ թագաւոր եղաւ: