1Ու Եղիսէ ըսաւ, Տէրոջը խօսքը մտիկ ըրէք. Տէրը այսպէս կ’ըսէ. Վաղը այս ատեն Սամարիայի դրանը մէջ մէկ գրիւ բարակ ալիւրը մէկ սիկղ արծաթի, ու երկու գրիւ գարին մէկ սիկղի պիտի ծախուի: 2Եւ այն զօրապետը՝ որուն ձեռքին վրայ թագաւորը կը կռթնէր, Աստուծոյ մարդուն պատասխան տուաւ ու ըսաւ, Եթէ Տէրը երկինքը պատուհաններ ալ շինէ, միթէ ատիկա ըլլալո՞ւ բան է: Եւ անիկա ըսաւ, Դուն քու աչքերովդ պիտի տեսնես, բայց անկէ պիտի չուտես:

Սուրիական բանակը կը հեռանայ

3Ու դրանը առջև չորս բորոտ մարդիկ կային, և անոնք իրարու ըսին, Ինչո՞ւ հոս նստինք մինչև որ մեռնինք. 4Եթէ ըսենք թէ քաղաքը մտնենք, քաղաքին մէջ սով կայ, ու հոն պիտի մեռնինք, և եթէ հոս մնանք, նոյնպէս պիտի մեռնինք. ուրեմն եկէք Ասորւոց բանակը դիմենք. եթէ մեզ ողջ թողուն՝ կ’ապրինք, ու եթէ մեզ մեռցընեն՝ կը մեռնինք: 5Եւ մութ ատեն ելան որպէս զի Ասորւոց բանակը երթան. ու մինչև Ասորւոց բանակին ծայրը գացին, և ահա հոն մարդ մը չկար. 6Քանզի Տէրը Ասորւոց բանակին մէջ կառքերու ձայն ու ձիերու ձայն, մեծ զօրքի մը ձայն լսել տուաւ, և իրարու ըսին, Ահա Իսրայէլի թագաւորը Քետացւոց թագաւորները ու Եգիպտացւոց թագաւորները վարձքով բռնեց որպէս զի մեր վրայ գան: 7Ու ելան մութուն փախան, և իրենց վրանները ու ձիերը ու էշերը և բանակը եղածին պէս թողուցին, ու իրենց անձը ապրեցնելու համար փախան: 8Եւ այս բորոտները մինչև բանակին ծայրը գացին, ու վրան մը մտնելով կերան ու խմեցին. և անկէ արծաթ ու ոսկի ու հանդերձներ վերցուցին ու գացին պահեցին. ու ետ դառնալով՝ ուրիշ վրան մը մտան, և անկէ ալ վերցուցին ու գացին պահեցին: 9Ետքը իրարու ըսին, Աղէկ չէ մեր ըրածը. այսօր աւետեաց օր է, ու մենք լուռ կեցեր ենք. եթէ մինչև առաւօտեան լոյսը սպասենք, մեր անօրէնութեանը պատիժը պիտի կրենք*. ուստի հիմա եկէք երթանք ու թագաւորին տունը պատմենք: 10Եւ գացին քաղաքին դռնապանին պոռացին, ու անոնց պատմեցին ու ըսին, Մենք Ասորւոց բանակը մտանք, և ահա հոն մարդ կամ մարդու ձայն չկայ, բայց միայն ձիերը կապուած ու էշերը կապուած, ու վրաններն ալ այնպէս կեցեր են: 11Եւ դռնապանները պոռացին, ու թագաւորին տանը ներսը իմացուցին: 12Ու թագաւորը գիշերով ելաւ և իր ծառաներուն ըսաւ, Ասորիներուն մեզի ըրած բանը ես ձեզի պատմեմ. Անոնք մեր անօթի ըլլալը գիտնալով՝ բանակէն ելած են, ու դաշտին մէջ պահուած են՝ ըսելով, Երբ անոնք քաղաքէն դուրս ելլեն, զանոնք ողջ բռնենք ու քաղաքը մտնենք: 13Եւ անոր ծառաներէն մէկը պատասխան տուաւ ու ըսաւ, Թող մնացած ձիերէն հինգը առնեն՝ որոնք հոս մնացած են. ահա անոնք բոլոր Իսրայէլի բազմութեանը պէս եղան, [որոնք հոս մնացած են. ահա անոնք բոլոր Իսրայէլի բազմութեանը պէս եղան,] որ հատնելու վրայ է. և հոն ղրկենք ու տեսնենք: 14Ու երկու կառք առին իրենց ձիերովը*, և թագաւորը Ասորւոց բանակին ետեւէն ղրկեց ու ըսաւ, Գացէք նայեցէք: 15Ու անոնց մինչև Յորդանան անոնց ետեւէն գացին, և ահա բոլոր ճամբան լեցուն էր հանդերձներով ու ամաններով՝ զորոնք Ասորիները արտորալով փախած ատեննին ձգեր էին: Եւ պատգամաւորները ետ դարձան ու թագաւորին պատմեցին: 16Այն ատեն ժողովուրդը ելաւ ու Ասորւոց բանակը կողոպտեց. ու Տէրոջը խօսքին համեմատ մէկ գրիւ բարակ ալիւրը մէկ սիկղ արծաթի, ու երկու գրիւ գարին մէկ սիկղի ծախուեցաւ: 17Եւ թագաւորը դրանը վերակացու դրաւ այն զօրապետը՝ որուն ձեռքին վրայ ինք կը կռթնէր. ու ժողովուրդը դրանը մէջ զանիկա կոխկռտեցին, ու մեռաւ, Աստուծոյ մարդուն խօսքին համեմատ որ խօսեր էր՝ թագաւորին անոր քով իջած ատենը: 18Ու եղաւ՝ ինչպէս Աստուծոյ մարդը թագաւորին խօսեր էր՝ ըսելով, Վաղը այս ատեն Սամարիայի դրանը մէջ երկու գրիւ գարին մէկ սիկղ արծաթի, ու մէկ գրիւ բարակ ալիւրը մէկ սիկղի պիտի ծախուի. 19Եւ այն զօրապետը Աստուծոյ մարդուն պատասխան տուեր ու ըսեր էր, Եթէ Տէրը երկինքը պատուհաններ ալ շինէ, միթէ ատիկա ըլլալու բան է. ու Աստուծոյ մարդը ըսեր էր. Ահա դուն քու աչքերովդ պիտի տեսնես, բայց անկէ պիտի չուտես: 20Այսպէս եղաւ անոր, քանզի ժողովուրդը զանիկա դրանը մէջ կոխկռտեցին, ու մեռաւ: