Դաւիթ Յուդայի թագաւոր կ’ըլլայ

1Եւ ասկէ ետև Դաւիթ Տէրոջը հարցուց ու ըսաւ, Յուդայի քաղաքներէն մէկը ելլե՞մ: Եւ Տէրը անոր ըսաւ, Ելիր: Ու Դաւիթ ըսաւ, Ո՞ւր ելլեմ: Եւ Տէրը ըսաւ, Քեբրոն: 2Եւ Դաւիթ իր երկու կիները, այսինքն Յեզրայելացի Աքինոամը ու Կարմելացի Նաբաղի կինը Աբիգեան, իրեն հետ տանելով հոն ելաւ: 3Եւ Դաւիթ իրեն հետ եղող մարդիկն ալ՝ ամէն մէկը իր ընտանիքովը տարաւ. ու Քեբրոնի քաղաքներուն մէջ բնակեցան: 4Եւ Յուդայի մարդիկը եկան, ու հոն Դաւիթը Յուդայի տանը վրայ թագաւոր օծեցին: Եւ Դաւիթի պատմեցին ու ըսին թէ Գաղաադու Յաբիսի բնակիչները Սաւուղը թաղեցին: 5Եւ Դաւիթ Գաղաադու Յաբիսի բնակիչներուն պատգամաւորներ ղրկեց ու անոնց ըսաւ, Դուք Տէրոջմէն օրհնեալ ըլլաք, որ ձեր տէրոջը Սաւուղի այս ողորմութիւնն ըրիք, ու զանիկա թաղեցիք: 6Եւ հիմա Տէրը ձեզի ողորմութիւն ու ճշմարտութիւն ընէ. ու այս բանը ընելնուդ համար՝ ես ալ ձեզի այս աղէկութեան փոխարէնը պիտի հատուցանեմ: 7Եւ հիմա ձեր ձեռքը ուժովնայ ու զօրաւոր կտրիճներ եղէք. քանզի ձեր տէրը Սաւուղ մեռաւ, և Յուդայի տունը զիս իրենց վրայ թագաւոր օծեցին:

Յեբուսթէ Իսրայէլին թագաւոր եղաւ

8Իսկ Սաւուղի զօրավարը, Ներեան Աբեններ, Սաւուղի որդին Յեբուսթէն առաւ, ու զանիկա Մանայիմ անցուց, 9Եւ զանիկա Գաղաադու վրայ, Ասուրիի վրայ, Յեզրայէլի վրայ, Եփրեմի վրայ, Բենիամինի վրայ, ու բոլոր Իսրայէլի վրայ թագաւոր ըրաւ: 10Երբ Սաւուղի որդին Յեբուսթէ Իսրայէլի վրայ թագաւոր եղաւ, քառասուն տարեկան էր, ու երկու տարի թագաւորութիւն ըրաւ. միայն Յուդայի տունը Դաւիթի հպատակ եղաւ: 11Եւ Յուդայի տանը վրայ Քեբրոնի մէջ Դաւիթի թագաւորութիւն ըրած ժամանակը եօթը տարի ու վեց ամիս էր:

Պաերազմ Յուդայի և Իսրայէլի միջև

12Ու Ներեան Աբեններ և Սաւուղի որդւոյն Յեբուսթէի ծառաները Մանայիմէ Գաբաւոն ելան: 13Եւ Շարուհեայի որդին Յովաբ ու Դաւիթի ծառաները Քեբրոնէ ելան, ու Գաբաւոնի աւազանին քով անոնց հանդիպեցան. և ասոնք աւազանին մէկ կողմը՝ ու անոնք աւազանին միւս կողմը նստան: 14Եւ Աբեններ Յովաբի ըսաւ, Թող կտրիճները ելլեն ու մեր առջև խաղան: Եւ Յովաբ ըսաւ, Թող ելլեն: 15Ուստի անոնք թիւով ելան, ու Բենիամինէ ու Սաւուղի որդւոյն Յեբուսթէի կողմէն տասուերկու մարդ, և Դաւիթի ծառաներէն տասուերկու մարդ անցան. 16Ու ամէն մէկը իր ընկերին գլխէն բռնեց, և իր սուրը իր ընկերին կողը խոթեց, ու մէկտեղ ինկան. ու այն տեղին անունը Քեղկաթ-ասուրիմ ըսուեցաւ, որ Գաբաւոնի մէջ է: 17Եւ այն օրը խիստ սաստիկ պատերազմ եղաւ. ու Աբեններ Իսրայէլի մարդոց հետ Դաւիթի ծառաներուն առջև յաղթուեցաւ: 18Եւ Շարուհեայի երեք որդիները, Յովաբ, Աբեսսա ու Ասայէլ, հոն էին. ու Ասայէլ դաշտի այծեամի պէս ոտքով թեթև էր: 19Եւ Ասայէլ Աբենների ետեւէն ինկաւ, ու Աբենների ետեւէն աջ կամ ձախ կողմը չխոտորեցաւ: 20Եւ Աբեններ ետեւը դարձաւ ու ըսաւ, Ասայէլ, դո՞ւն ես: Ու անիկա ըսաւ, Ես եմ: 21Եւ Աբեններ անոր ըսաւ, Քու աջ կամ ձախ կողմդ խոտորէ, ու կտրիճներէն մէկը բռնէ, ու անոր զէնքերը քեզի առ. բայց Ասայէլ անոր ետեւէն դառնալ չուզեց: 22Եւ Աբեններ նորէն մէյմըն ալ Ասայէլի ըսաւ, Ետեւէս դարձիր. քեզ ինչո՞ւ համար գետինը զարնեմ. այն ատեն ի՞նչպէս երեսս վերցնեմ քու եղբօրդ Յովաբի նայիմ: 23Բայց անիկա անոր ետեւէն դառնալ չուզեց: Ու Աբեններ նիզակին ետեւի ծայրովը սնակուշտէն զարկաւ զանիկա, ու նիզակը անոր կռնակէն ելաւ. և հոն ինկաւ ու նոյն տեղը մեռաւ. և ով որ Ասայէլի ինկած ու մեռած տեղը կու գար՝ կանգ կ՚առնէր: 24Եւ Յովաբ ու Աբեսսա Աբենների ետեւէն ինկած կը հալածէին զանիկա. ու երբ անոնք Գիայի դիմաց Գաբաւոնի անապատին ճամբան եղող Ամմայի բլուրը եկան, արեւը մտաւ: 25Եւ Բենիամինի որդիները Աբենների ետեւէն ժողվուեցան, գունդ մը եղան. ու բլուրի մը գլուխը կայնեցան: 26Եւ Աբեններ Յովաբի պոռալով ըսաւ, Միթէ սուրը անդադա՞ր պիտի ուտէ. չե՞ս գիտեր որ ասոր վերջը դառն կ՚ըլլայ. մինչև ե՞րբ ժողովուրդին պիտի չհրամայես որ իրենց եղբայրները հալածելէն ետ դառնան: 27Ու Յովաբ ըսաւ, Կենդանի է Աստուած, եթէ դուն զրուցած չըլլայիր, ժողովուրդին ամէն մէկը առտուընէ ի վեր իր եղբայրները հալածելէն ետ պիտի դառնար: 28Այն ատեն Յովաբ փող հնչեցուց. ու բոլոր ժողովուրդը կանգ առաւ, ու ալ Իսրայէլի ետեւէն չինկան, ու մէյմըն ալ պատերազմ չըրին: 29Եւ Աբեններ ու անոր մարդիկը այն բոլոր գիշերը դաշտին մէջէն երթալով՝ Յորդանանէ անցան, ու բոլոր Բեթրոնը քալելով՝ Մանայիմ եկան: 30Եւ Յովաբ Աբեններէ դարձաւ, ու բոլոր ժողովուրդը ժողվեց. և Դաւիթի ծառաներէն տասնըինը մարդ ու Ասայէլ կը պակսէին. 31Բայց Դաւիթի ծառաները Բենիամինէ ու Աբենների մարդոցմէն երեք հարիւր վաթսուն մարդ զարկին, որոնք մեռան: 32Եւ Ասայէլը վերցուցին, ու զանիկա Բեթլէհէմի մէջ իր հօրը գերեզմանը թաղեցին: Ու Յովաբ և անոր մարդիկը բոլոր գիշերը քալեցին, ու արշալոյսին Քեբրոն հասան: