Սաւուղին սերունդը մահուան կը դատապարտուի

1Եւ Դաւիթի օրերը իրարու ետեւէ երեք տարի սով եղաւ. ու Դաւիթ Տէրոջը հարցուց: Եւ Տէրը ըսաւ, Ասիկա Սաւուղի ու անոր արիւնահեղ տանը համար է, քանզի անիկա Գաբաւոնացիները մեռցուց: 2Ու թագաւորը Գաբաւոնացիները կանչեց ու անոնց խօսեցաւ. (և Գաբաւոնացիք Իսրայէլի որդիներէն չէին, այլ Ամօրհացւոց մնացորդէն էին. ու Իսրայէլի որդիները անոնց երդում ըրեր էին. բայց Սաւուղ Իսրայէլի ու Յուդայի որդիներուն համար նախանձաւորութիւն ընելով՝ զանոնք զարնել ուզեր էր:) 3Եւ Դաւիթ Գաբաւոնացիներուն ըսաւ, Ձեզի ի՞նչ ընեմ, ու ինչո՞վ քաւութիւն ընեմ, որպէս զի Տէրոջը ժառանգութիւնը օրհնէք: 4Եւ Գաբաւոնացիք անոր ըսին, Սաւուղէ ու անոր տունէն արծաթ կամ ոսկի չենք ուզեր, ու Իսրայէլէ մարդ մը մեռցնել չենք ուզեր: Եւ անիկա ըսաւ, Դուք ինչ որ ըսէք՝ ձեզի պիտի ընեմ: 5Ու անոնք թագաւորին ըսին, Այն մարդը որ մեզ ջարդեց, ու մեզ այնպէս կորսնցնել ուզեց, որպէս զի ամենեւին Իսրայէլի սահմաններուն մէջ չգտնուինք: 6Անոր որդիներէն մեզի եօթը մարդ տրուի, ու զանոնք Տէրոջը ընտրեալ Սաւուղի Գաբաային մէջ Տէրոջը համար կախենք: Եւ թագաւորը Կու տամ, ըսաւ: 7Բայց թագաւորը Սաւուղեան Յովնաթանի որդւոյն Մեմփիբոսթէի խնայեց: Սաւուղի որդւոյն Յովնաթանի ու Դաւիթի մէջտեղ եղած Տէրոջը երդումին համար: 8Բայց թագաւորը Այիայի աղջկան Ռեսփայի երկու որդիները զորոնք Սաւուղի ծներ էր, այսինքն Արմոնին ու Մեմփիբոսթէն և Սաւուղի աղջկան Մեղքողի հինգ որդիները, զորոնք Մաուլացի Բերզելիի որդւոյն Եդրիէլի ծներ էր, առավ, 9Ու զանոնք Գաբաւոնացւոց ձեռքը տուաւ. ու զանոնք Տէրոջը առջև լեռանը վրայ կախեցին, և եօթն ալ մէկտեղ մեռան. և անոնք հնձոց առաջին օրերը, գարիի հնձոց սկիզբը, մեռցուեցան: 10Ու Այիայի աղջիկը Ռեսփա քուրձ մը առաւ, ու զանիկա իրեն համար ապառաժի մը վրայ փռեց, հնձոց սկիզբէն մինչև անոնց վրայ երկինքէն անձրև գալը. ու ցորեկը երկինքի թռչունները, ու գիշերը անապատին գազանները չէր թողուր որ անոնց դպչին: 11Եւ Սաւուղի հարճին, Այիայի աղջկան Ռեսփայի, ըրածը Դաւիթի պատմեցին: 12Ու Դաւիթ գնաց, և Սաւուղի ու անոր որդւոյն Յովնաթանի ոսկորները առաւ Գաղաադու Յաբիսի բնակիչներէն, որոնք Բեթսանի հրապարակէն զանոնք գողցեր էին. վասն զի Փղշտացիք զանոնք հոն կախեր էին այն օրը որ Փղշտացիք Գեղբուէի վրայ Սաւուղը մեռցուցեր էին. 13Եւ Սաւուղի ոսկորները ու անոր որդւոյն Յովնաթանի ոսկորները անկէ վերցուց. ու կախուածներուն ոսկորներն ալ ժողվեցին: 14Եւ Սաւուղի ու անոր որդւոյն Յովնաթանի ոսկորները Բենիամինի երկիրը՝ Սելայի մէջ անոր հօրը Կիսի գերեզմանը թաղեցին, ու թագաւորին բոլոր պատուիրածը ըրին. ու անկէ ետքը Աստուած երկրին համար եղած աղօթքը ընդունեց: (Ա Մնաց. 20:4-8)

Պատերազմ փղշտացի հսկաներու դէմ

15Եւ Փղշտացիք նորէն Իսրայէլի հետ պատերազմ ըրին. և Դաւիթ ու իր ծառաները իրեն հետ իջան ու Փղշտացւոց հետ պատերազմ ըրին ու Դաւիթ ուժէ կտրեցաւ: 16Եւ Յեսբիբենոբ, որ Ռափայի որդիներէն էր, ու երեք հարիւր սիկղի ծանրութեամբ պղնձէ նիզակ մը ունէր, ու մէջքը նոր սուր մը կապեր էր, ուզեց որ Դաւիթը զարնէ: 17Բայց Շարուհեայի որդին Աբեսսա անոր օգնութեան հասաւ, ու Փղշտացին զարկաւ ու զանիկա մեռցուց: Այն ատեն Դաւիթի մարդիկը անոր երդում ըրին ու ըսին, Ասկէ ետքը դուն մեզի հետ պատերազմի չելլես, որպէս զի Իսրայէլի ճրագը չմարես: 18Եւ ասկէ ետքը նորէն Փղշտացւոց հետ պատերազմ եղաւ Գովբի մէջ. այն ատեն Ովսացի Սովբաք Ռափայի որդիներէն եղող Սեփիան մեռցուց: 19Եւ նորէն Փղշտացւոց հետ պատերազմ եղաւ Գովբի մէջ. ու Բեթլէհեմացի Արիովըրգիմի որդին Ելէանան Գեթացի Գողիաթի եղբայրը զարկաւ, որուն նիզակին բունը ոստայնանկներու գլանին պէս էր: 20Եվ նորէն Գէթի մէջ պատերազմ եղաւ. ու երկայնահասակ մարդ մը կար, որուն ձեռքերուն մատերը ու ոտքերուն մատերը վեց վեց հատ ըլլալով՝ քսանը-չորս մատ ունէր. անիկա ալ Ռափայի որդիներէն էր: 21Եւ անիկա Իսրայէլը նախատեց. բայց Դաւիթի եղբօրը Սամաայի որդին Յովնաթան զանիկա զարկաւ: 22Այս չորսը Գէթի մէջ Ռափայէ ծներ էին, և Դաւիթի ձեռքով ու անոր ծառաներուն ձեռքով ինկան: