Չարերը

1Կ’աղաչենք ձեզի, եղբայրներ, մեր Տէր Յիսուս Քրիստոսի գալուստին ու մեր անոր քով ժողվուելուն համար, 2Չըլլայ որ շուտ մը խախտիք ձեր միտքէն, ու չըլլայ որ խռովիք` ոչ հոգիով ու ոչ խօսքով, ոչ ալ թուղթով մը իբր թէ մեզմէ գրուած, որպէս թէ Քրիստոսի օրը եկած հասած ըլլայ: 3Չըլլայ որ մէկը ձեզ խաբէ կերպով մը. վասն զի այն օրը պիտի չգայ` եթէ ապստամբութիւնը առաջ չգայ, ու յայտնուի մեղաց մարդը, կորստեան որդին, 4Այն հակառակորդը հպարտացած ամէնուն վրայ, որ Աստուած կ’ըսուի կամ կը պաշտուի, մինչև անիկա Աստուծոյ տաճարին մէջ պիտի նստի, և ինքզինք ցուցնէ թէ Աստուած է: 5Չէ՞ք յիշեր որ երբ ձեր քով էի, այս բաները կ’ըսէի ձեզի: 6Եւ հիմա դուք ինքնիրեննիդ գիտէք ի°նչ է ան որ կ’արգիլէ, որպէս զի ինք իր ատենին յայտնուի: 7Վասն զի անօրէնութեան խորհուրդը հիմակուընէ կը զօրանայ. բայց ան որ հիմա կ’արգիլէ, պիտի արգիլէ` մինչև ինք մէջտեղէն վերնայ: 8Ու ետքը պիտի յայտնուի այն անօրէնը, զոր Տէր [Յիսուս] իր բերնին հոգիովը պիտի սպառէ, ու իր գալուն յայտնուելովը պիտի կորսընցնէ. 9Որուն գալը սատանայի ազդեցութիւնովն է բոլոր զօրութիւնով և նշաններով ու սուտ հրաշքներով, 10Եւ կորսուածներուն վրայ անիրաւութեան բոլոր խաբէութիւնովը. որովհետև անոնք ճշմարտութեան սէրը չընդունեցին` որ փրկուին, անոր համար Աստուած ալ պիտի ղրկէ անոնց ուժով մոլորութիւն մը` որ ստութեան հաւատան. 11Որպէս զի դատապարտուին ամէն անոնք որ չհաւատացին ճշմարտութեան, հապա անօրէնութեան յօժարեցան:

Փրկութեան համար ընտրուած էք

12Բայց մեզի պէտք է միշտ Աստուծմէ գոհանալ ձեզի համար, Տէրոջմէ սիրուած եղբայրներ, վասն զի Աստուած առաջուընէ ձեզ ընտրեց փրկուելու` Հոգիին սրբելովը ու ճշմարտութեան հաւատքովը. 13Որու ձեզ կանչեց մեր աւետարանելովը` մեր Տէր Յիսուս Քրիստոսի փառքը ստանալու: 14Ուստի, եղբայրներ, հաստատ կեցէք, ու պինդ բռնեցէք այն աւանդութիւնները զորոնք սորվեցաք թէ° խօսքով ու թէ° մեր թուղթովը: 15Եւ ինք մեր Տէր Յիսուս Քրիստոս ու մեր Հայրը Աստուած, որ մեզ սիրեց ու տուաւ մեզի յաւիտենական մխիթարութիւն և բարի յոյս շնորհքով, 16Ձեր սիրտերը մխիթարէ և ձեզ հաստատէ ամէն բարի խօսքերու և գործերու մէջ: