Մեզի համար աղօթեցէք

1Վերջապէս, եղբայրներ, մեզի համար աղօթք ըրէք, որպէս զի Տէրոջը խօսքը յառաջանայ ու փառաւոր ըլլայ, ինչպէս ձեր մէջ. 2Եւ որպէս զի անիրաւ ու չար մարդոցմէ ազատինք. վասն զի ամէնը հաւատք չունին. 3Բայց Տէրը հաւատարիմ է, որ ձեզ պիտի հաստատէ, ու չարէն պահէ: 4Եւ ձեր վրայ վստահութիւն ունինք Տէրոջմով, թէ ինչ որ ձեզի պատուիրեցինք` կ’ընէք, ու պիտի ընէք ալ: 5Եւ Տէրը ձեր սիրտերը Աստուծոյ սիրոյն ու Քրիստոսի համբերութեանը ուղղէ:

Գործելու հարկադրանք

6Եւ ձեզի կը պատուիրենք, եղբայրներ, մեր Տէր Յիսուս Քրիստոսի անունովը, որ ետ քաշուիք ամէն եղբօրմէ` որ անկարգութեամբ կը վարուի, ու ոչ թէ այն աւանդութեանը պէս` զոր մեզմէ առաւ: 7Վասն զի դուք ինքնիրեննիդ գիտէք թէ ի°նչպէս պարտիք մեզի նմանող ըլլալ. քանզի մենք ձեր մէջ անկարգութեամբ չվարուեցանք, 8Ոչ ալ մէկուն հացը ձրի կերանք. հապա ջանքով և աշխատանքով գիշեր ու ցորեկ կը գործէինք` ձեզմէ մէկո°ւն ծանրութիւն չտալու համար. 9Ոչ թէ` որ մենք իշխանութիւն չունէինք, հապա որ անձերնիս ձեզի օրինակ ընենք` որպէս զի մեզի նմանող ըլլաք: 10Վասն զի երբ մենք ձեր քով էինք` զայս ձեզի կը պատուիրէինք, թէ Ան որ չուզեր գործ գործել, հաց ալ թող չուտէ: 11Արդ կը լսենք որ ձեր մէջէն ոմանք անկարգութեամբ կը վարուին, ու գործ մը չեն գործեր, հապա հետաքրքիր կը պտըտին: 12Այնպիսիներուն պատուէր կու տանք ու կ’աղաչենք մեր Տէր Յիսուս Քրիստոսով, որ հանդարտութեամբ գործեն և իրենց հացը ուտեն: 13Բայց դուք, եղբայրներ, մի ձանձրանաք բարիք գործելէ: 14Իսկ եթէ մէկը չհնազանդիր մեր խօսքին այս թուղթով, դուք նշանակեցէք զանիկա, ու անոր հետ մի խառնուիք, որպէս զի ամչնայ: 15Բայց չըլլայ թէ թշնամիի պէս սեպէք զանիկա, հապա եղբօր պէս խրատեցէք: 16Եւ ինք խաղաղութեան Տէրը ամէն կերպով ձեզի խաղաղութիւն տայ ամէն ատեն. Տէրը ձեր ամէնուն հետ ըլլայ:

Վերջին խօսք

17Այս ողջոյնը իմ ձեռքիս` Պօղոսին է, որ ամէն թուղթերուն մէջ նշան է. այսպէս կը գրեմ: 18Մեր Տէր Յիսուս Քրիստոսի շնորհքը ձեր ամենուն հետ ըլլայ: Ամէն: