1Պօղոս, Յիսուս Քրիստոսի առաքեալ, Աստուծոյ կամքովը կենաց խոստմունքին պէս` որ Քրիստոս Յիսուսով է, 2Տիմոթէոսի, իմ սիրելի որդիիս, շնորհք, ողորմութիւն և խաղաղութիւն Հօր Աստուծմէ ու Քրիստոս Յիսուս մեր Տէրոջմէն:

Շնորհակալութիւն և քաջալերութիւն

3Շնորհակալ եմ Աստուծոյ, զոր կը պաշտեմ իմ նախնիքներէս` մաքուր խղճմտանքով, (երբ անպակաս քեզ իմ աղօթքներուս մէջ կը յիշեմ գիշեր ու ցորեկ, 4Ցանկալով քեզ տեսնել, ու միտք բերելով քու արցունքներդ, որպէս զի ուրախութիւնով լեցուիմ,) 5Մտածելով քու վրադ եղած անկեղծ հաւատքը, որ առաջ քու մեծ մօրդ Լաւոդեայի ու քու մօրդ Եւնիկէի վրայ բնակեցաւ, և համոզուած եմ որ քու վրադ ալ կայ: 6Անոր համար քու միտքդ կը ձգեմ որ արծարծես Աստուծոյ պարգևը, որ քեզի տրուած է իմ ձեռքերուս քու վրադ դրուելովը: 7Վասն զի Աստուած մեզի երկչոտութեան հոգի չտուաւ, հապա զօրութեան ու սիրոյ և զգաստութեան: 8Ուստի ամօթ մի սեպեր մեր Տէրոջը վկայութիւնը, ոչ ալ զիս անոր համար կապուածս. հապա մասնակից եղիր աւետարանին չարչարանքներուն, Աստուծոյ զօրութեանը համեմատ. 9Որ մեզ փրկեց ու սուրբ կոչումով կանչեց, ոչ թէ մեր գործերուն նայելով, հապա իր նախասահմանութեանը ու շնորհքին նայելով, որ Քրիստոս Յիսուսով մեզի տրուեցաւ յաւիտենական դարերէն առաջ. 10Բայց հիմա յայտնուեցաւ մեր Փրկչին Յիսուս Քրիստոսի երևնալովը. որ մահը խափանեց, և ի լոյս հանեց կեանքը ու անմահութիւնը աւետարանին միջոցաւ: 11Որու ես քարոզիչ ու առաքեալ դրուեցայ ու հեթանոսներուն վարդապետ: 12Անոր համար այս չարչարանքներն ալ կը կրեմ. բայց ամօթ չեմ սեպեր, վասն զի գիտեմ թէ որո°ւ եմ հաւատացեր, և համոզուած եմ որ իմ իրեն աւանդած բանս կրնայ պահել մինչև այն օրը: 13Ամուր բռնէ այն ողջամիտ խօսքերուն օրինակը զորոնք ինծմէ լսեցիր, հաւատքով ու սիրով` որ Քրիստոս Յիսուսով է: 14Այն բարի աւանդը պահէ Հոգւոյն Սրբոյ ձեռքով որ մեր մէջ բնակած է: 15Զայս գիտես որ ինծմէ երես դարձուցին այն ամէնը որոնք Ասիա էին, որոնցմէ են Փիգեղոս ու Հերմոգինէս: 16Տէրը ողորմութիւն տայ Ոնեսիփորոսի տանը, վասն զի շատ անգամ զիս հանգստացուց ու իմ շղթաս ամօթ չսեպեց. 17Հապա երբ Հռովմ եկաւ, շատ ջանքով փնտռեց զիս ու գտաւ: 18(Տէրը իրեն տայ որ այն օրը Տէրոջմէն ողորմութիւն գտնէ.) և Եփեսոսի մէջ ալ որչափ սպասաւորութիւն որ ըրաւ ինծի, դուն զանիկա շատ աղէկ գիտես: